阿飞10月13号到驾校报到，却被通知推迟到23号上车，因为部教练车有学员仲未能够毕业。等多10日，阿飞又多嘢惗，远忧近虑，睇晚报报道：普宁县山区有对中年夫妇将自己有病嘅女掉低喺医院不管而去，女孩叫海花，长期营养不良，骨瘦如柴，宜家奄奄一息。报道话对夫妇每日只系用辣椒粉送白米充饥，当医院要求交100文入院费，对父母就不辞而别，海花最后终于再生无力，离开咗人世。报道大力抨击斥责对父母无人性，但对点解社会有人饿死却无去深究，阿飞先知道目前仲有人挣扎喺温饱线。
10月底，广州嘅秋天仲好热，阿飞去花果山驾校报到，一部灰褐色东方牌大货车摆喺培训中心大楼前面。教练身材高大，可能长期坐喺副驾驶位缘故，肚腩大过冬瓜，晒到黑嗮，对眼要眯住望人。宜家就眯实前面8个徒弟，讲未来学车课程同安排：“按车管所规定，学车要够四个月时间学时，75日后考倒桩，100日后考盘山，然后考埋路面三项合格你就毕业。唔合格就要考多几次，睇你哋运气喇。每日驾校中心有大客车送大家到岑村教练场，全广州市都系从嗰度考出嚟咖啦。你哋如果8个人一齐，大家每日都学唔到几多时间，我安排分成4个人一组，隔日一轮就大家都够时间学到嘢，你哋觉得点？大家商量下。”无人有意见，阿飞分咗同阿德，阿金，客家仔一组。当日就学入排档，上午入档下午退档。教练人人都叫佢新教练，将近60岁，火气好猛，首先声明自己教车严格，果然第一日就大声闹人。汽车对于大多数人嚟仲陌生过宇宙飞船，个个都懵盛盛。客家仔从梅县乡下嚟，首先就俾攞嚟杀鸡儆猴试下马威，更加手忙脚乱不知所措，阿德识得驾校高层入嚟学车，新教练唔敢大声闹佢，阿金，阿飞，客家仔就成咗出气筒。
中午，8个人请师傅食饭。阿金年纪最大，已经做人老窦。讲：“师傅系就系恶啲，大家未惯，不过能够遇到个老师傅教，我哋有福啦，起码会有心机教。”阿飞有过酒店教训只翕头唔出声。一早听讲学车要每日买烟买清凉饮料俾师傅，仲要请饮早茶。新教练都唔例外，每日一包三个五香烟大家轮住送，早茶就大家分摊，中午饭喺岑村教练场门口路边村食，哩度啲村民家家开档做饮食。新教练食饭只有一个嗜好：游水鲤鱼屈姜葱，食咗阿飞一个学车时期，燥热不堪。饮料新教练饮唔惯，要大家买斤茶叶冲算了。哩下㗂返唔少，要知道宜家汽水饮料鬼死咁贵。阿飞原来就喺商店卖茶叶，教练最中意嘅乌龙茶就包俾佢去买。
第二日学打方向，反手，正手，单手，仲要边打边入档。第三日学呼油，哒着部货车，积起4个轳，由轻到重起油听声，跟住入档试离合感觉，仲要学睇仪表板。呼油入档离合系开车最基本两个要点，离，呼油都唔会去，合，汽车先会行，阿飞不明就里无用心领会。第四日教练车真正落地开，哩下真家伙。阿飞呼得油嚟唔放离合，部车一味叫唔走，放离合又唔俾油，部车死火，方向更加分唔出天南地北，净系知自己顾得头嚟脚反根完全唔掂。阿飞俾师傅劈头盖脑闹个狗血淋头，前所未有难听都嚟埋。越闹阿飞越慌，眼睇就要冲野外去，新教练一脚踩死匹脱缰野马，阿飞从驾驶室落嚟失魂落魄好似完全被人彻底改造过咁，藕嗮。佢开始觉得嚟学车系错误嘅选择：“真系唔衰攞嚟衰，留喺酒店咪几自在安乐，自细从嚟未同机械打过交道，宜家未学行先学走，哩步跨得太大。”佢认真怀疑自己会考得到车牌嘅能力。
精神困倦坐几十公里车从岑村返到屋企，老窦见佢唔出声，以为喺外面食饱就无煮饭。过咗一阵见无嘢食，阿飞饿到突然发起癫嚟大声咆哮，不断拳击屋企家私台凳，打到个冰箱门都凹咗。有气无啶出，所有都系自己攞嚟嘅，一路打击一道流眼泪，佢相信所有一切都会喺佢拳头下粉碎。
晚上，工衣组个姑娘仔咕咕突然嚟到阿飞屋企。阿飞啱啱同自己屋企打完场拳击，发泄完心情好返好多，就系攰到死下死下，坐喺杠床睇紧电视。咕咕坐喺佢身边，讲阿飞离去之后酒店境况，主动提出以后有机会一齐去饮茶啊，一起饮啤酒，去踩雪屐玩。唔知系少女常态系咁亦或系阿飞过分敏感，言谈之间感觉到人哋女仔流露出对自己有好感，至少系有意思想同佢做个知心好友，阿飞却无咁惗法，而且一直都无。咕咕话要送一幅自己画嘅油画俾阿飞，佢宜家业余时间学紧画油画，哩晚系有备而来，谈话中再强调同酒店工程部钟生已经真正分手，因为男朋友要出国。佢话仲好爱男朋友，最后两人系称兄道妹咁分开。其实喺洗衣房倾计，咕咕都一直将佢同男友之间啲事讲俾阿飞听，要阿飞帮手攞主意。而对于阿飞，咕咕咁热情嘅新时代少女，佢系害怕嘅，打下哈哈可以，再进一步就无自信。所以，阿飞从一开始对咕咕就有无动于衷嘅主观基础。啯晚阿飞一夜都无觉好瞓，睡意浓浓嘅脑袋点都惗唔到自己想惗嘅嘢。
一晚，老道喺茹女屋企请阿飞，老懵，阿肥，尤榄，女人头成班同学聚餐，打打啤牌。个个都想知道阿飞学车学成点，询问驾校招生状况，哩个问题大家尤其关心。阿飞将咕咕嚟搵嘅事问茹女意见，茹女都唔知咩居心，一阵话哩啲女仔唔要得，一阵又话不妨试下拍拖，无零两可。阿飞却十分忧虑咕咕好强嘅个性，太过现代嘅主动所为。
过咗两晚，咕咕又嚟揾阿飞，阿飞过咗去荷包蛋五金店俾人三娘教子，咕咕交带阿飞爸爸要阿飞听晚去佢屋企揾佢，并留低详细地址。阿飞惗佢可能想搞咩聚会，第二日学完车返嚟虽然攰到死，都按住地址去隔离青年路揾到佢屋企。
阿飞系有生以嚟初次去人少女屋企， 都系 要鼓咗好耐勇气先有胆去。单独去女仔屋企，佢啲鲁莽成性青年，好怕被人哋女仔屋企睇穿自己外强中干，睇到一无是处。咕咕一个人喺屋企，佢带阿飞入咗自己房间， 坐上床，闷闷不乐，粒声唔出， 一脸嘅愁容。阿飞企喺度都唔知讲咩好，问：“ 不如一齐揾埋边个工友出去宵夜，好唔好。” 咕咕话要搵一间咖啡厅坐坐， 将阿飞带到佢熟识嘅第十甫南信啡厅，嚟到啡厅佢又唔饮咖啡， 话要饮啤酒。咕咕饮住酒，倾吐住思念男朋友嘅愁闷 ：“我哋系花园酒店开业一齐入去认识嘅，两个人一齐嘅日子好温馨浪漫，相识以嚟，之间从无哎过一次交，佢乜都好迁就我嗝。” 哀哀之情溢于言表。阿飞尽量开解佢， 搞尽脑汁揾啲适当嘅言辞，无奈哩晚学咗一日车返嚟实在困倦，无办法集中精神同佢交谈。两人讲啲各自人生际遇，对社会嘅睇法，分享啲生活嘅小乐趣。咕咕话佢想继续读书，亦要离开花园酒店。两人不觉由8点饮到11点，咕咕已经接近大醉，仲想继续饮，咖啡厅环境气氛幽静，阿飞唔方便制止，咕咕一气饮咗三支大啤酒。 阿飞都好饮得，但见到咕咕起势猛饮，佢自己反而唔敢尽情豪饮。
咕咕醉啦，坚决一定要俾佢自己嚟埋单，阿飞只好由佢，然后扶佢返屋企。阿飞攰到个死样，比咕咕嘅愁肠百结仲憔悴，寂静嘅街道一啲风都无，一声唔出嘅大月光冷冷清清挂喺天际，照到条麻石小巷惨白惨白，照住两个无言无语可怜小人儿， 照到阿飞嘅无奈无所遁形，佢嬲起自己嚟仰头夜空对嫦娥姐姐苦起泡面， 做咗个鬼脸。一路上，咕咕不停反胃想呕吐 ，“噁，噁”声难受到不得了，但仲喺间歇中 不停口咁多谢阿飞花成晚时间嚟开解佢。阿飞 好老实咁话 ：“我都系第一次同女仔咁倾心事咋，大家系朋友就唔使讲咩多谢。”
咕咕话：“阿飞，你喺我识嘅朋友中，最知音嘅人。”
阿飞好高兴能够成为佢嘅知音朋友：“咁希望我今晚讲嘅话对你有帮助啦。”喺咕咕家门口，咕咕一再握紧佢嘅手讲多谢，一直唔愿意松开。
第二晚，阿飞揾埋阿肥去工人俱乐部对面德记士多：“德记，两支珠江生力，有咁冻得咁冻嘅。”佢亟待要冷却一下自己。阿飞将咕咕嘅事话俾阿肥听，讲自己嘅尴尬难处。 阿肥非常有经验咁叫起嚟：“ 你死喇！”跟住好权威咁讲：“ 你睇住啊，佢啱啱同男朋友分手，好容易喺你身上揾精神寄托咖，我劝你千其唔好再发展落去喇。” 吓到阿飞不知如何是好。
出于咕咕饮醉酒讲过嘅一句话，佢话怕阿飞见到咁失态，以后会睇佢唔起。隔晚，阿飞只好再次鼓起余勇去探访，问下佢身体同近况。咕咕屋企喺青年路同德星路交接嘅小巷，两层嘅广州旧楼房，佢对上有两个哥哥，咕咕系最细，咕咕父母对于阿飞或其它男仔嚟都无问多句，睇得出一家人好疼锡佢。开门嘅系咕咕妈妈，阿飞好有礼貌点头打招呼，叫：“阿姨好。” 咕咕妈妈指指楼上咕咕嘅房间。
咕咕瞓喺床度听音乐，精神麻麻哋 。阿飞喺床边坐低同佢倾咗一阵计，两个人玩起捉飞行棋。佢又提起男朋友， 话同男朋友仲有联系，各自冷静考虑紧两人嘅关系。阿飞听到个心有啲唔舒服，提出要告辞，咕咕系都唔俾阿飞走，要佢留底陪佢，要阿飞教佢玩锄大弟。阿飞成晚心不在弦，一心想尽快脱离目前哩个环境：“ 喺女仔屋企房间入面成晚，唔知人哋父母点睇 ？”玩咗一阵就邀请佢去啡厅坐，请返佢饮咖啡，咕咕唔愿落床唔想去。当晚将近要到凌晨， 咕咕先俾阿飞离开。 落到楼， 咕咕妈妈开门俾佢， 睇佢嘅眼神好奇怪，唔知想睇出乜，系感觉阿飞好可怜呢？定系担心男女共处一室，自己个女有损失。咕咕系阿飞第一个单独交往嘅女仔，阿飞份人桀骜难驯，容易惹是生非，但就无咩坏心肠。佢本着交往纯洁嘅友谊嚟维持同咕咕嘅友情，相互开解讲下心事，分享下生活嘅快乐，增添啲人生经历。阿飞知道友情可贵， 男女多疑，佢好小心咁同咕咕交往住，无咩事唔主动去佢屋企。
网友评论