God Luas

God zhit dout ndros god luas haik lol dob ib xongt jongb leuf, wef beb buas nax buas xongt bof ib ras. Beb aob dol shik bof dob rongt shab hend. Uat let beb haik lol leuf ib hnob, beb haik yol lob nenx, nil boub leuf god lob nenx geuf ndeud gheb shab, god lal boub dout nil lob nenx deuf mol ndouk ros.

Dangb shik nil dob zhos haik lol Shuad, uat let jat god muax nzhik dot shab. God sangd god nyaob geuf ndeud gheb shab hnob hnob haik lol Shuad, lol zhed lal god dob doul haik lol Hmongb, nil let deuf mol ndouk ros lol zhed juef zhit haik beb lol Hmongb leuf. God lal boub nil zeux haik lol Hmongb, dangb shik nil deuf mol ndouk ros sheuk haik lol Shuad, hnob nat dob zhit chuat zeux haik lol Hmongb leuf. God yol lal zhit chuat zeux haik lol Hmongb, lal haik lol Hmongb zhit chuat rongt, wef god yuad muax gouf jongb xongt dob nyaob zhed geuf ndeud haik lol Shuad, dangb shik god boub beb gus Hmongb nenb juef yuad haik lol Hmongb. Zhit let hluak dob hluak ncaik zhit dout zaik keuk beb Hmongb zox jit, hax zeux uat bongb leuf.

God luas drout god haik dak gad rens mol jaox dol hluak ngoux lol zhed leuf. God haik dak:"Mangd mangd mol jaox, zhit nchait." Nil yout god ib xongt, nil gouf yif xongt jangb jangb ndaot hluak juef jaox dout dol hluak ngoux lol zhed leuf, hax mual dout yol cheb lol kheb, yol uat dout zhed chab nyaob. Nil deuf mol leuf ib xongt jongb ndouk ros ntrad zax, hnob nat nil lob nenx nil shid ros yuad dout leuf, lal yaos nil jat shab yuad dout das, fenf ndout beb Hmongb hluak dob hluak ncaik dob haod sud nil daf dout lob rongt nenx uat, dangb shik god hax nyaob geuf ndeud gheb shab geuf ndeud, god yol sangd dak god gus dob geuf ndeud gheb shab, dangb shik suk let god zhit juas nil mex deuf mol ndouk ros. Nyaob beb Hmongb rex raol, zhit muax bes zheus dob geuf ndeud gheb shab, dangb shik lal zhit chuat muax nenb zhong shif, fenf ndout nenb zhos yaos deuf mol ndouk ros ntrad dout zax, uat rongt zhed tab mual rongt cheb, jaox hluak ngoux lol zhed uat chongb jeuf shik ndros nyaob uat nenx leuf, Hmongb naf zid dob zhos jat shab yol dob ncaik boub dangb, dob ncaik yol zeux uat nenx juef zouk leuf.

God luas dluat leuf ndros god haik lol Shuad, nil ndros beb raol nenb lal zhos haik lol Shuad. God sangd dak Hmongb nenb nyaob Hmongb deb qeut zhos zeux haik lol Shuad yaos zhit rongt hend, dangb shik beb lal zhit dout yuaf khet nil haik lol Hmongb, zhit yuad haik lol Shuad. Hnob nat, Hmongb hluak dob hluak ncaik zhit yaos zhit zeux haik lol Hmongb, nil mex sangd dak yol zeux haik lol Hmongb yaos zhit zeux hnaod ghangb leuf, nil mex nyaf haik lol Shuad tlout haik lol Hmongb.

God nyaob luf khaod muax des huaf dout bof Hmongb nenb hnangd chaot Hmongb, god yuad mol cenb ret nil mex haik ib aob lot lol, dangb shik god hax shik zhit dout mol haik lol, god nchait nil mex sangf menf god zhit zeux haik lol Hmongb, let lenl nuaf ib muas jeuf god jaik leuf, god lal boub nil mex zhit chuat zeux haik lol Hmongb. Suk beb Hmongb hluak dob hluak ncaik zhit chuat zeux haik lol Hmongb dout shik ndros haik lol, yuad menk zheus zheus haik lol, yuad menk muab lol Shuad nzis nos.

Beb Hmongb zox jit zhit dout zaik keuk tab hlob hlangd, hax drous ib cat hluak dob hluak ncaik xangx dout zhit rongt leuf. Nil mex muab lol Shuad ndros ndrangt hlob zheuf juaf, khuab mid nyuas haik lol dled, naf zid eut mit nzhik yol mid nyuas jeuf muab lol dled luat nil mex naf zid. Uat let naf dob zid nyuas dob zeux dot shat, juab yis lal zhit hof shab. Nil mex bout mol yuaf ged leuf, dangd shik lal zhit zeux shout shab.

Bof hluak dob hluak ncaik uat nbaox ndus uat shit, zeuf dak god lal sangd mol, dangb shik god zhit jat yol ndros nil mex mol uat shit, yaos dak god dout ndros nil mex leuf, uat let god lal zhit geuf ndeud das, yaos dak god zhit geuf ndeud hax deuf mol ndouk ros ntrad zax, god lal zeux yol uat zhed tab mual cheb kheb, let lenl dob uat chongb leuf, lal shik jaox hluak ngoux lol zhed nhangx uat chongb leuf.

God shab sangd dak nenb geuf ndeud tab nenb zhit geuf ndeud zeud yaos yol bout yol uat dlangb zhit, let lenl luf zhangd dob yaos ib yangf. Cuat dol nenb nyaob lob shef huef dob yuad dout rongt nenx uat, lal shik muax des huaf beb nenb geuf ndeud dob zhit juas nenb ndouk ros, yaos dak beb Hmongb cuat dol nenb dob zhos yuad zhed chab tab cheb chab juef ndros yol nyal nenb uat nenx leuf, uat let beb Hmongb zox jit zeux zhit muax nghet leuf.

Dangb rangx, god haik dak hnob nat beb Hmongb hluak dob hluak ncaik uat nat uat let, dangb shik god zhit yaos haik beb Hmongb uat chongb jeuf uat let jangl leuf, lal zhit yaos haik beb Hmongb haik lol Shuad jeuf uat let jangl, dangb shik beb uat dlangb zhit dob yuad muax jait, yaos dak zhit muax beb yol zox jit, beb lal zhit zeux muax rongt nenx. God lal zhit gangd khud beb Hmongb hluak dob hluak ncaik cuat dol dob nyaf geuf ndeud, let lenl boub beb Hmongb zox jit, dangb shik beb yaos Hmongb jeuf zhit yuad muab beb zox jit uat bongb leuf, lal zhit yuad nzob beb Hmongb zox jit. Yaos dak beb Hmongb hluak dob hluak ncaik shik ndros uat rongt, beb zeux hlob hlangd dout rongt hend.