༄༅།། བྱང་ཆུབ་སེམས་དཔའ་ཆེན་པོ་མཁ

༄༅།། བྱང་ཆུབ་སེམས་དཔའ་ཆེན་པོ་མཁན་ཆེན་༧ཐུབ་བསྟན་ཆོས་ཀྱི་གྲགས་པའི་མཛད་རྣམ་རྗེས་དྲན་དད་པའི་མེ་ཏོག

༄༅།།  བྱང་ཆུབ་སེམས་དཔའ་ཆེན་པོ་མཁན་ཆེན་༧ཐུབ་བསྟན་ཆོས་ཀྱི་གྲགས་པའི་མཛད་རྣམ་རྗེས་དྲན་དད་པའི་མེ་ཏོག

༼༡

ཐུབ༵་བསྟན༵་མཛེས་པའི་སྐྱབས་གཅིག་མཚུངས་མེད་རྗེ།།

ཆོས༵་ཀྱི༵་མཛོད་འཛིན་མཁས་གྲུབ་བྱེ་བའི་མགོན།།

གྲགས༵་པ༵་དོན་ལྡན་ལུང་རྟོགས་བསྟན་པའི་བདག།

རིས་མེད་བསྟན་འགྲོ་ཀུན་གྱི་མགོན་པོ་དྲན༵།།

༼༢

བསྐལ་བ་དུ་མར་སྔོན་ནས་སངས་རྒྱས་ཀྱང་།།

བསྟན་དང་འགྲོ་བའི་དོན་ལ་ཐུགས་བསྐྱེད་དེ།།

གདུལ་བྱའི་སྣང་ངོར་རོལ་གར་སྣ་ཚོགས་ཀྱིས།།

རིམ་བྱོན་བསྟན་འགྲོའི་དོན་མཛད་བླ༵་མ༵་དྲན༵།།

༼༣

བྱིས་པ་རྩེད་འཇོ་རོལ་སྐབས་བཀའ་པོད་ཀྱི།།

མཚན་རྣམས་མ་འདྲེས་སོ་སོར་ཞལ་ནས་གསུང་།།

དབུ་ཕར་མཚན་ཙམ་ཐོས་སྐབས་སྤྱན་ཆབ་བྱུང་།།

རིགས་སད་ཚད་མའི་སྐྱེས་མཆོག་བླ༵་མ༵ར་དྲན༵།།

༼༤

ཐོག་མར་ཐོས་བསམ་སྒོམ་ལ་ལྷུར་བླངས་ནས།།

བར་དུ་འཆད་རྩོད་རྩོམ་ལ་མངའ་བརྙེས་ཤིང་།།

ཐ་མར་བཤད་སྒྲུབ་ལས་ལ་འགྲན་བྲལ་བ།།

མཁས་པའི་ཆེ་བ་དགུ་ལྡན་བླ་༵མ༵་དྲན༵།།

 ༼༥

ཕྱི་ལྟར་གནས་བསྟན་བཅུ་དྲུག་ངང་ཚུལ་བཞིན།།

ནང་ལྟར་སེམས་དཔའ་བརྒྱད་ཀྱི་དགོངས་ཀློང་ལྟར།།

གསང་བ་རིག་འཛིན་བརྒྱད་ཀྱི་བསྐྱེད་རྫོགས་མཉམ།།

སོར་བྱང་སྔགས་གསུམ་གཅིག་འདྲེས་བླ༵་མ༵་དྲན༵།།

༼༦

ངུར་སྨུག་ཆོས་གོས་གསུམ་གྱིས་སྐུ་བརྒྱན་པ།།

གཞུང་ལུགས་སྡེ་སྣོད་གསུམ་གྱིས་གསུང་བརྒྱན་པ།།

རིན་ཆེན་བསླབ་པ་གསུམ་གྱིས་ཐུགས་བརྒྱན་པ།།

བླ་མའི་སྐུ་གསུམ་ཡོན་ཏན་ཡང༵་ཡང༵་དྲན༵།

༼༧

སྒྲུབ་བརྒྱུད་གྲུབ་མཐའ་ཀུན་ལ་རིས་སུ་མེད།།

གཞུང་ལུཊ་རབ་འབྱམས་མ་ལུས་གདམས་པར་འཆར།།

བསྟན་འཛིན་མཐོ་དམན་ཡོངས་ལ་དག་སྣང་མཛད།།

ཕ་གཅིག་བླ་མའི་མཛད་འཕྲིན་སྙིང༵་ནས༵་དྲན༵།།

༼༨

དམུ་རྒོད་ཆོས་ལ་བཀོད་པའི་ཐབས་མཁས་ལ།།

དད་ལྡན་སློབ་མ་བསྐྱང་མངའ་བརྙེས་པ།།

ཉེ་རིང་མེད་པར་ཀུན་ལ་བུ་ལྟར་བརྩེ།།

ཟབ་རྒྱས་ཆོས་འཁོར་གསུངས་བ་ལྷག༵་པར༵་དྲན༵།།

༼༩

དུས་ངན་སྙིགས་མར་དམ་ཆོས་སྒྲུབ་པ་ལ།།

ཕྱི་ནང་གསང་བའི་འགལ་རྐྱེན་སྣ་ཚོགས་ཀྱིས།།

ཕྲག་དོག་རྡུང་རྡེག་ཇི་ལྟར་བྱེད་ན་ཡང་།།

དགེ་སྦྱོང་ཆོས་ལས་མི་འདའ་བླ༵་མ༵་དྲན༵།།

༼༡༠

ཉིན་ལྟར་ཆག་མེད་ཕྱག་སྟོང་འཚལ་བ་ཡིས།།

ཤིང་ལེབ་དུ་མ་ཟད་ནས་ཐོག་ཞབས་ཕུག།

ཐུན་བཞི་དང་ནི་ཆོས་ཁྲིད་སྐུ་ཚེ་གང་།།

ཉིན་ལྟར་ཆག་མེད་མཛད་པའི་བླ༵་མ༵་དྲན༵།།

 ༼༡༡

ཚོགས་འཁོར་ཆུ་མཆོད་མར་མེ་མཎྜལ་སོགས།།

མི་ཟད་ནམ་མཁའ་མཛོད་ལ་དབང་བ་བཞིན།།

ཡར་མཆོད་དཀོན་མཆོག་ཞིང་དུ་མཆོད་སྤྲིན་གྱིས།།

ཚོགས་གཉིས་རྒྱ་ཆེན་མཛད་པའི་བླ༵་མ༵་དྲན༵།།

༼༡༢

མགོན་མེད་ཉམས་ཆུང་ཀུན་ལ་མ་བཞིན་དུ།།

ཟས་གོས་གནས་མལ་གང་དགོས་ཅི་བདེར་སྦྱིན།།

དབུལ་ཡང་སློང་བ་མི་སྤང་རྒྱལ་སྲས་བཞིན།།

ཀུན་ལ་ཡོད་ཚད་གནང་བའི་བླ༵་མ༵་དྲན༵།།

   ༼༡༣

ལས་དང་སྨོན་ལམ་འཛོམས་པའི་སློབ་བུ་ལ།།

སོར་བྱང་སྔགས་ཀྱི་སྡོམ་པ་ཀུན་གནང་ནས།།

གང་ལ་གང་འདུལ་དེ་སྟོན་མན་ངག་གིས།།

གདུལ་བྱ་སྨིན་གྲོལ་ལམ་འགོད་བླ༵་མ༵་དྲན༵།།

  ༼༡༤

ལྷག་པའི་ལྷ་མཆོག་རྗེ་བཙུན་སྒྲོལ་མ་ཡིས།།

རྒྱུན་པར་ཞལ་གཟིགས་ལུང་བསྟན་དངོས་གྲུབ་ཐོབ།།

རྒྱུད་སྡེ་བཞི་དྲུག་ཡི་དམ་ལྷ་ཚོགས་ཀུན།།

མི་འབྲལ་རྟག་པར་འགྲོགས་མཛད་བླ༵་མ༵་དྲན༵།།

༼༡༥

ས་དགེ་བཀའ་རྙིང་རིས་སུ་མ་ཆད་པའི།།

ཕྱོགས་རྣམས་ཀུན་གྱི་སློབ་མ་མང་བསྐྱངས་ནས།།

གངས་རིའི་ལྗོངས་སུ་བཤད་སྒྲུབ་བསྟན་པ་སྤེལ།།

རྒྱལ་བ་གཉིས་པ་ལྟ་བུའི་བླ༵་མ༵་དྲན༵།།

  ༼༡༦

མཁྱེན་རབ་འཇམ་དཔལ་དབྱངས་ལྟར་ཆོས་ཀུན་མཁྱེན།།

བརྩེ་བ་སྤྱན་རས་གཟིགས་ལྟར་འགྲོ་ཀུན་བརྩེ།།

ནུས་མཐུ་གསང་བའི་བདག་ལྟར་བདུད་བགེགས་འཇོམས།།

རིགས་གསུམ་ཀུན་འདུས་ས་གསུམ་བླ༵་མ༵་དྲན༵།།

༼༡༧

ཚེ་འདིར་དགེ་སེམས་གཅིག་ཙམ་སྐྱེས་པ་དང་།།

ཆོས་པའི་གཟུགས་ཙམ་འཛིན་པ་ཚུན་ཆོད་སོགས།།

སྐྱབས་རྗེ་བླ་མ་ཁྱེད་ཀྱི་དྲིན་ཡིན་པ།།

ནམ་ཡང་བརྗེད་མེད་སྙིང་ནས་ཡང༵་ཡང༵་དྲན༵།།

༼༡༨

ཚེ་འདིར་རང་གི་དད་པས་མ་འཆུག་ན།།

སངས་རྒྱས་དངོས་འདྲའི་མཚན་ལྡན་བླ་མ་མཇལ།།

རྟག་ཏུ་བློ་རྩེ་གཏད་ས་ཁྱེད་ལས་མེད།།

སྐྱིད་སྡུག་ཅི་བྱུང་བླ་མ་སྙི༵ང་ནས༵་དྲན༵།།

  ༼༡༩

སྐྱེ་བ་འདི་ནས་ཚེ་རབ་ཐམས་ཅད་དུ།།

འབྲལ་མེད་ཁྱེད་ཀྱིས་རྗེས་བཟུང་བྱིན་རླབས་སྩོལ།།

བསྟན་དང་འགྲོ་བའི་དོན་ཆེན་འགྲུབ་པར་ཤོག།

བཀའ་དྲིན་མཚུངས་བྲལ་རིགས་བདག་སྙིང༵་ནས༵་དྲན༵།།

  ༼༢༠

རྒྱལ་དང་རྒྱལ་སྲས་ཀུན་གྱི་རྒྱལ་ཚབ་རྗེ།།

བསྟན་དང་འགྲོ་བ་ཀུན་གྱི་མགོན་པོ་ཁྱེད།།

མཁས་དང་གྲུབ་བརྙེས་ཀུན་གྱི་གཙུག་རྒྱན་མཆོག།

འདི་དང་ཕྱི་མ་ཀུན་གྱི་སྐྱབས༵་གནས༵་དྲན༵།།

 ༼༢༡

མདོར་ན་རྒྱལ་བ་ཀུན་འདུས་བླ༵་མ༵་ཡིན༵།།

རྒྱལ་བའི་གསུང་རབ་མཛོད་འཛིན་བླ༵་མ༵་ཡིན༵།།

རྒྱལ་སྲས་མ་ལས་འབྱུང་ཁུངས་བླ༵་མ༵་ཡི༵ན།།

མཆོག་གསུམ་ཀུན་འདུས་བླ༵་མ༵་ཁྱེད༵་དྲན༵་ནོ༵།།  །།

དགེ་འོ།  དགེ་འོ།  དགེ་འོ།  སྐྱབས་རྗེ་དམ་པ་ཉིད་ཀྱི་ཡིད་དམ་རྒྱལ་ཡུམ་སྒྲོལ་མ་ཉེར་གཅིག་གི་གྲངས་ལྟར་ཚིགས་སུ་བཅད་པ་ཉེར་གཅིག་འདི་རྗེ་གང་གི་སློབ་འབངས་ཡོངས་ཀྱི་ཐ་ཤལ་བ་དར་མདོའི་རྡོ་རྗེ་བྲག་དགོན་གྱི་གྲྭ་པདྨ་མཆོག་གྲུབ་ནས་བྲིས་པའོ།།