དུས་ཚོད་རིན་པོ་ཆེ་ཆུད་ཟོས་སུ་མི་

དོ་གདོང་དུས་ཚོད་བརྒྱད་པ་ནས་རང་དགོན་གྱི་དགུན་ཆོས་དམ་བཅའ་ཆེན་མོ་བདེ་ལེགས་ངང་མཇུག་ལེགས་པར་གྲུབ་སོང་། ད་ནས་ལོ་གཅིག་རིང་གི་ཆོས་ཐོགས་གལ་ཆེ་བ་ཡོངས་སུ་རྫོགས་པ་ཚར་བ་ཡིན། སང་ཉིན་བཟུང་དགུན་གནང་གི་བཟོ་འདྲ་བོ་ཡིན་པས་ལོ་སར་ཕན་ཆད་དུ་སོས་དལ་བག་ཕེབས་ཀྱི་ངང་ནས་ལྷོད་ཀྱིས་བསྡད་ཆོག་ལ། རང་མོས་གང་དགའི་སློབ་གཉེར་སྣ་ཚོགས་ལ་འཇུག་པའི་གོ་སྐབས་ཡོད་པ་རེད། དེ་ནི་ངོས་རང་ལ་མཚོན་ན་ཆེས་སྤྲོ་སྐྱིད་ལྡན་པའི་ལོ་ཟླ་དང་ཆེས་རོ་མངར་ལྡན་པའི་ལོངས་སྤྱོད་ཕུན་སུམ་ཚོགས་པ་ཞིག་ཏུ་གྱུར་ཡོད།  དེ་བས་ཆེས་རང་དབང་ལྡན་པའི་དུས་ཚོད་དེ་རང་གི་དགའ་ཕྱོགས་ལྟར་གྱི་དཔེ་ཀློག་གི་འཇིག་རྟེན་དང་འཚོ་བའི་ཀློང་རིམ་དུ་ཐིམ་པར་བྱས་ཏེ། རང་མོས་གང་སྐྱིད་ཀྱི་ལས་སུ་ཧུར་གྱིས་འཇུག་རྩིས་ཡོད། རང་གི་སྒྲུབ་འདོད་པའི་དོན་བྱ་དག་ཀྱང་རེ་རེ་བཞིན་གྲུབ་པར་བྱས་ཏེ། རང་སེམས་སུ་ཡུན་རིང་ཉར་བའི་ཕུགས་བསམ་དངོས་མ་དེ་འཚོལ་འདོད་ཡོད་ལ་རང་ཉིད་ངོ་མ་དེ་བཙལ་འདོད་ཡོད། དེ་ལྟ་ན་ཆེས་རང་དབང་དང་དོན་སྙིང་ལྡན་པའི་དུས་ཚོད་རིན་པོ་ཆེ་དེ། རེ་འབྲས་མྱུ་གུ་རྣམ་པར་བཞད་པའི་རྐྱེན་དུ་འགྲོ་བ་ལས་རང་དགར་དོན་མེད་དུ་མི་འདའ་ཞིང་ཆུད་ཟོས་སུ་མི་འགྲོ་བར་སྨོན།