རང་ཅག་བསོད་ནམས་ཆེའོ།།

ལོ་ངོ་དྲུག་བདུན་གྱི་རིང་ལ་བྱང་ཉི་མ་བླ་བྲང་ལ་འགྲོ་བའི་གོ་སྐབས་མ་བྱུང་བས་ཕྱིར་དྲན་ཀློང་གི་སྔོན་གྱི་སྣང་བརྙན་དེ་དང་ད་ལྟའི་རྣམ་པ་ནི་གཏན་ནས་འདྲ་བོ་མི་འདུག ལྷག་པར་དགོན་པ་ནི། སྔར་གྱི་དྲན་ངོའི་སྣང་བརྙན་དེ་ལས་ཀྱང་ཤིན་ཏུ་ལྷུན་ཆགས་ལ་བརྗིད་ཉམས་ཆེ་བ། བྱིན་རླབས་ཀྱི་ཚན་ཁ་འབར་ཞིང་། གནའ་ཉམས་ཀྱིས་མངོན་པར་ཕྱུག་འདུག་པས།  སེམས་དད་པའི་ཡིད་གར་ངང་གིས་ལྷུང་ཡོང་། ཕྱིའི་ལྷ་ཁང་གསེར་ཁང་སོགས་ཀྱི་བཞེངས་བསྐྲུན་ངོ་མཚར་བ་དེ་དག་སྨོས་ཅི་དགོས་ལ། ཐ་ན་གྲལ་མཉམ་ལ་གནའ་བོའི་བཟོད་བཀོད་ཀྱིས་ལེགས་པར་བརྒྱན་པའི་གྲྭ་ཤག་དག་གི་ཐུན་མིན་གྱི་བརྗིད་ཉམས་དེས་ཀྱང་དགོན་པ་འདི་ནི་སྐྱེས་ཆེན་དམ་པ་སུ་ཞིག་གི་ཐུགས་སྨོན་ལས་གྲུབ་པ་ཡིན་ནམ་སྙན་པའི་སྣང་བ་སྟེར། ད་ལྟའི་དུས་འདིར་གནའ་བོའི་བཟོད་བཀོད་ཀྱི་ཁྱད་ཆོས་རྣམས་མ་ཉམས་རྒྱུན་འཛིན་གྱིས་གཙིག་གི་རྒྱན་དུ་བཀུར་བའི་དགོན་ཆེན་འདི་འདྲར་མཇལ་རྒྱུ་ཡོད་པ་ཡང་རང་ཅག་བསོད་ནམས་ཆེའོ།།