སེམས་འགྱུའི་གཏམ།

གལ་ཏེ། ཁྱེད་ནི་མཐོན་མཐིང་གི་མཁའ་དབྱིངས་ན་འོད་དུ་འཚེར་བའི་ཀུ་མིད་མིག་དེ་ཡིན་ན། ང་ནི་ཁྱེད་ཀྱི་འོད་ཟེར་ལ་བསྒོམ་པའི་པད་དཀར་དེ་ཡིན། གལ་སྲིད་ངའི་སེམས་ཀྱི་མཁའ་དབྱིངས་སུ་མུན་པ་ཡི་བཀབ་ཏེ་ཕྱི་ཡི་མཛེས་ལྗོངས་མི་མངོན་པའི་སྐབས་སུ།  ཁྱེད་ནི་འོད་གསལ་གྱིས་དཀར་མེ་སྦྱིན་མཁན་དེ་ཡིན་འང་སྲིད།

གལ་ཏེ། ཁྱེད་ནི་འདབ་བརྒྱ་སྟོང་གྲོལ་གྱི་ཤེས་བྱའི་གྲོང་ན་སྨྱུག་རྩལ་གྱི་སྟེགས་བུ་བསྐྲུན་པའི་སྐྱེས་མཆོག་དེ་ཡིན་ན། ང་ནི་བླུན་རྨོངས་ཀྱིས་བསྟུམས་པའི་ཕུང་བོ་ཆུང་ཆུང་ཞིག་སྟེ། ཁྱེད་ཀྱི་བྱ་བཞག་ལ་སྨོན་པ་སྐྱེ་མཁན་གྱི་བྱེའུ་ཆུང་ཞིག་ཏུའང་སྤྲུལ་ཆོག 

དེ་བས། ཁྱེད་དང་ངའི་བར་ཐག་ནི་རྒྱང་རིང་གི་ལམ་ཕྲན་དང་བགྲོད་པར་དཀའ་བའི་གཡང་གཟར་གྱིས་བཅད་པ་ཞིག་མིན་པར། དེ་ནི་སྔོན་ཐོན་གྱི་བསམ་བློ་དང་ཤེས་བྱ་ཡི་སྟོབས་ནུས་ཀྱིས། འུ་གཉིས་ནི་སུས་ཀྱང་དཔག་མི་ནུས་པའི་མ་འོངས་བའི་ཁྲོད་ན། རྒྱང་དུ་གྱེས་ཡོདའང་སྲིད།

གལ་ཏེ།ཁྱེད་ནི་ཁོད་ཡངས་རྡུལ་དག་པའི་རྩྭ་ཐང་ན་རྟ་བདུན་དབང་བོའི་ཟེར་བརྒྱ་དང་འགྲོགས་ནས་ངག་རིག་གི་དབྱངས་རྟ་སྤང་ལྗོངས་ལ་གཏོར་མཁན་གྱི་མི་བུ་དེ་ཡིན་ན། ང་ནི་ཁྱེད་ཀྱི་གསུངས་དབྱངས་ལ་མགོ་ལྕོག་ལྡེམ་པའི་མེ་ཏོག་སེར་ཆེན་དེ་ཡིན་ཡང་སྲིད། དེའི་རྐྱེན།ཁྱེད་ནི་ཟག་བཅས་ལས་བྱུང་བའི་ཕུང་བོ་ཀུན་གྱི་ཁྲོད་ན། ནམ་ཡང་ཁྱད་དུ་འཕགས་ཤིང་། ཀུན་ལས་འགྲན་ཟླ་བྲལ། གལ་སྲིད། ངའང་ཁྱེད་ཀྱི་ལུས་ཐོག་གི་ཆ་ཤས་ཙམ་བྱས་ཆོག་ན…………