གསར་བུ་འཚང་ཁ་མ་རྒྱག

ཚེི་རིང་སྐྱིད། ༼ཨ་རི༽

ཁྱེད་གྲོང་གི་ཁ་རུ་ཁ་གཡང་ལེབ་མོ་ཞིག་གི་བར།

མཐོ་མཐོ་འདྲ་བའི་སྣང་བ་དང་བཅས།

སྒོ་ཐེམ་བར་ལ་འཚང་ཁ་མ་རྒྱག

སྒོ་ཐེམ་དེ་ཁྱེད་ཀྱི་ཆང་སྒྲོམ་མ་རེད་ལ།

བཟི་ཟིན་པའི་རྣམ་ཤེས་སྨྱོན་པ་དེ་འཁོར་ས་ཡང་མ་ཡིན།

གསར་བུ། བྱིས་པ་ལྟར་འཚང་ཁ་མ་རྒྱག

བཟི་ཐེངས་རེར་སྒོ་ཐེམ་དེར་འཚང་ཁ་རྒྱག་སྟངས་ལ་ང་ཅུང་ཡ་མཚར་ཡོད།

འདི་ཁྱེད་ཡོང་ས་མ་རེད། བྱིས་པ་ཞིག་ཡོང་ས་དེ་བས་མ་རེད།

ཉིན་དཀར་མཚན་ལ་བརྩི་ཞིང་མཚན་ནི་ཉིན་མོར་རྩི་བ་དེ།

ཁྱེད་ཀྱི་སྣང་བ་སྟོང་བས་བཟོས་པའི་ལོངས་སྤྱོད་ཀྱི་མངའ་ཐང་ཡིན་ངེས་ཀྱང་།

སྒོ་ཐེམ་དེར་མཚོན་ན་དེ་ནི་དེའི་འཁྲིས་སུ་ཡོད་པའི་ས་རྡུལ་ཞིག་གི་སྣང་བ་ལས་མེད།

ལུང་ཁུག་གི་གར་སྟེགས་དེ་ལུང་ཁུག་དེར་དབང་ལ། ལུང་ཁུག་གི་སྙན་པ་དེ་ཡང་ལུང་ཁུག་ཁོ་ནར་དབང་བས།

སྒོ་ཐེམ་དེར་མཚོན་ན་ཁྱེད་ལམ་འགྲོ་བ་དཀྱུས་མ་ཞིག་ལས་མིན་པས། གང་འདོད་དུ་སྒོ་ཐེམ་དེར་འཚང་ཁ་མ་རྒྱག

ཚོད་ཚོད་ལ་ངར་ཡང་མ་ལངས་རོགས།

ད་དུང་རུ་ཁུག་ནས་ཁྱེད་ཀྱི་གྲགས་པ་སྐྱོར་མཁན་ཚོར་འོས་མེད་མ་བཟོ།

ཁོ་ཚོས་ཁྱེད་ཀྱི་ནང་འཁྲོལ་སྔོག་མེད་པར་ཡིད་ཆེས་བྱེད་པས།

ཁྱེད་ཀྱིས་མཐའ་མའི་རང་ངོས་དེ་ཟིན་དགོས་ཡ།

རི་ཁུག་དེ་ནས་ཁྱེར་ཡོང་བའི་དངུལ་ལོར་ཆ་བོ།

མི་ཚོགས་ཀྱིས་རང་ཚོད་ཚོད་ཀྱིས་ཁྱེད་ལ་ཕུལ་བ་ག་ལ་ཡིན།

དངུལ་ལོར་ཆུང་ཆུང་དེ་ཚོ་ཁོ་ཚོའི་ཤ་ཁྲག་ཡིན་ཡ།

ཁོ་ཚོས་ཁྱེད་ལ་གྲགས་པ་དེ་རང་འགར་སྤྲད་པ་ག་ལ་ཡིན།

གྲགས་པ་ཆུང་ཆུང་དེ་ཡིས་ཁོ་ཚོའི་རེ་བ་མཚོན་ཡོད།

དེ་ནས་ཤེལ་གྱི་ཁང་མིག་བར་ནས།

རྒྱ་མོ་མང་པོའི་བར་ནས།

གྲོང་ཁྱེར་རྫིག་པོ་རེ་ནས།

རང་ཚོད་ཚོད་ལ་སྐྱིད་པོ་མ་གཏོང་ཨ།

ཆུང་ཆུང་ཁ་གཡང་གིས་ཁྱེད་མཐོ་ས་མཐོ་ས་རུ།

དོན་དངོས་རྡོག་རྡོག་པོ་ཁྱེད་དམའ་ས་དམའ་ས་རུ།

དེ་བས་འདུག་སྟེགས་མ་ནོར། སྒོ་རྟགས་མ་ནོར།

དེ་རིང་ཁྱེད་ལྟར་ཆུང་ཆུང་ཁ་གཡང་བར་བཟི་བའི་བུ་མོ་མཛེས་མ་ཁ་ཤས་ཀྱིས་སྐྱོར་ཏེ་སྒོ་ཐེམ་དེར་འཚང་།

ངས་སྒོའི་ཕ་རོལ་ནས་ཁྱེད་ཀྱི་བཟོ་ལྟ་དེ་མཐོང་རྗེས།

སླར་ཡང་སྲང་མདོ་རུ་རུམ་ཁ་སྟོང་བའི་ནང་ན་ཕྲེང་བ་ཡོད་ཚུལ་སྒྲོག་མཁན་ཁ་ཤས་ལ་བལྟ་དགོས་བྱུང་།

ངས་ཁུ་སིམ་སིམ་ངང་ཁྱེད་ལ།

གསར་བུ་འཚང་ཁ་མ་རྒྱག་ཅེས་ཤོད་དགོས་བྱུང་།