頑石哪天變成金，我可以噉

今朝起身，發現貓碗隔離有嚿金。

唔知係唔係瞓到懵咗，執完之後，我居然第一時間揪起奧利奧check佢個pat pat。結果梗係冇料到啦，因為嚿金真正嘅主人，係你聽到個名就應該知道我頭先點錯相嘅——屎霸。�

「咩料呀？」

叫得屎霸，相信你哋已經估到啲嘢。

屎霸，又名屎大壯。無分國粵英日都係呢個名號。貓如其名，佢喺玩屎呢方面嘅造詣可謂無出其右。無論嚿金屬於自己定同伴，佢都可以喺目標出現5秒之內將佢果斷拿下，迅速捽勻於下半身乃至四肢，然後開始佢嘅Won't stop running,running.

有啲貓會喺你心口或者毛巾之類軟腍腍嘅地方，通過重複踏步嘅動作嚟放鬆同表達感情（最初係為咗食到貓媽媽更多嘅奶奶），所以俗稱「踩奶」。而屎霸作為一隻屎功了得嘅貓，佢就唔興「踩奶」，通常係玩開「踩屎」嘅。因為呢個「識玩一定係噉玩」嘅愛好，導致每次屎霸出恭我都如臨大敵，時刻準備同佢上演一場「搶屎大戰」——屙完要即鏟！所謂即鏟，係指守候住佢最後一嚿屎出現，然後手起鏟落，0.5秒都唔好猶豫！otherwise，日日都係年廿八。

萬幸嘅係，屎霸雖然玩屎玩到出神入化，但係論到食屎呢啲充滿禪意嘅行為……好彩你都有返幾分貓性！