འགོ་བརྩམས་ཚར་བས་མུ་ནས་འབད་དགོས།

དོ་དགོང་གི་དབྱིན་ཡིག་སློབ་ཁྲིད་ནི། ཐེངས་འདིའི་ཆེས་མཐའ་མཇུག་གི་སློབ་ཁྲིད་ཆགས་ཡོད་ཅིང་། སློབ་ཁྲིད་ཚོགས་མ་ཐག་ཏུ་སློབ་མ་སོ་སོས་ཉིན་གཅིག་གི་བྱ་བ་རགས་ཙམ་རེ་དབྱིན་ཡིག་གི་ལམ་ནས་ཡར་ཞུ་བྱེད་དགོས་པའི་གོ་སྐབས་དེ་ཉིད་དམ་འཛིན་གྱིས་ངོས་རང་ནས་ཀྱང་དེ་རིང་དམིགས་བསལ་དབྱིན་སྐད་ཀྱི་ལམ་ནས་དགེ་རྒན་ལགས་ལ་སེམས་བསམ་པའི་སྟེང་ནས་བཀའ་དྲིན་ཞུ་ཚིག་འགའ་ཕུལ་བ་ཡིན། ད་དུང་དབྱིན་སྐད་ཀྱི་ཆུ་ཚད་ཤིན་ཏུ་ཞན་སྟབས་བཀའ་དྲིན་ཡག་པོ་ཅི་ཡང་ཞུ་ཤེས་མ་སོང་མོད། སེམས་སྟེང་གི་སྐད་ཆ་ཁ་ཤས་ལབ་ཐུབ་སོང་བས་དགའ་སྤྲོ་སྐྱེས་ཡོད། དངོས་གནས་དབྱིག་ཡིག་གི་སྤྱི་ཁོག་གམ་བརྡ་སྤྲོད་སྤྱི་ལ་གོ་བ་ཕྲན་ཙམ་རག་ཡོད་པ་དང་། དབྱིན་སྒྲུང་ཐུང་ངུ་རེ་ཀློག་ཐུབ་པ། ཚིག་སྦྱོར་ཆལ་ཆོལ་རེ་སྤེལ་ཤེས་པ་དེ་དག་ཡོད་ཚད་ཆེས་གཟབ་ནན་གྱི་རང་བཞིན་ལྡན་ཞིང་ཕམ་སེམས་ཆེ་བའི་དགེ་རྒན་ཁོའི་བཀའ་དྲིན་ཉག་གཅིག་ཡིན་པས། ཁོང་ལ་བཀའ་དྲིན་མི་ཞུ་སུ་ལ་ཞུའོ།། དེ་ལས་ཀྱང་གལ་ཆེ་བ་དེ། ཁོང་གིས་ཁྲིད་ཟིན་པ་དག་བློ་ལ་ངེས་པ་གཞི་བཞག་གི་ཐོག་ནས་དབྱིན་ཡིག་གི་འགྲུལ་བཞུད་ལ་རྒྱུན་ཆད་མེད་པར་ཞུགས་ཏེ། ཆེས་མཛེས་ཤིང་ལྟ་ན་སྡུག་པའི་རྒྱང་རིང་གི་ཡུལ་གྲུ་དེར་དལ་གྱིས་བསྐྱོད་རྒྱུ་དེ་ནི། དགེ་རྒན་ཁོང་ལ་ཆེས་བཟང་བའི་དྲིན་ལན་འཇལ་སྟངས་དེ་ཡང་ཡིན་པས། དེ་ཉིད་ལག་ལེན་གྱི་མཐིལ་དུ་འཛིན་འདོད་ཡོད། མ་ཟད་སང་ལོའི་འཛིན་གྲྭ་གསུམ་པའི་སློབ་ཁྲིད་བསྡུ་སྐབས་སུ་སྔར་དང་མི་འདྲ་བའི་དབྱིག་ཡིག་གི་གྲུབ་འབྲས་གསར་བ་ཞིག་ཁྱེར་ཏེ། དགེ་རྒན་ལགས་ལ་མཇལ་ཐུབ་པའི་རེ་བ་རྒྱག་བཞིན་ཡོད། དེ་ནི་རང་གཞན་གཉིས་ཀྱི་ངལ་བ་བརྒྱ་ཕྲག་དོན་མེད་དུ་མི་གཏོང་བའི་ཆེད་དང་རང་གཞན་གཉིས་ལ་འགན་འཁུར་བའི་ཆེད་དུའོ།།