དབྱིག་ཡིག་སྦྱངས་པའི་བཞུད་ལམ་རིང་

ཧ་ལམ་ལོ་ངོ་གཅིག་གི་ཡུན་ལ་དབྱིན་ཡིག་སྦྱངས་པའི་གོ་རིམ་འདྲ་མིན་ཞིག་བརྒྱུད་དེ་ད་ཚོད་ཅིག་ལ་གཞི་ནས་དབྱིག་ཡིག་ཅེས་པའི་སྐད་ཡིག་ཆ་མེད་རྒྱུས་མེད་དེའི་སྤྱི་ཁོག་རགས་ཙམ་ལོན་མགོ་ཚུགས་ཀྱིན་པ་འདྲ། གྲུབ་འབྲས་འདི་ཉིད་ཀྱང་དཀའ་སྡུག་གི་གོ་རིམ་སྣ་ཚོགས་ཤིག་བརྒྱུད་པའི་ལག་རྗེས་ཡིན་ལ་ཨམ་བཙིགས་དྲག་ཏུ་བསྡམས་ཏེ་བརྩོན་པའི་ངལ་བ་དང་དུ་བླངས་པའི་རྒྱལ་ཁ་ཡང་ཡིན་ནོ།། ལན་རེར་སྐད་རིགས་དེ་ཉིད་སྦྱངས་པའི་་ཁོར་ཡུག་མི་བཟང་བའི་རྐྱེན་གྱིས་དེ་རིང་བློར་བཟུང་ཚར་བའི་མིང་ཚིག་དག་སང་ཉིན་དྲན་ངོར་ལྷག་ལུས་མེད་པར་གཞི་མེད་དུ་སོང་ཡོད་པའི་སྣང་ཚུལ་དེ་འབྱུང་ཐེངས་རེར་ད་ནི་དབྱིག་ཡིག་ཤེས་པའི་ལས་སྐལ་མི་འདུག་སྙམ་སྟེ། རེ་བ་དེ་ཡོངས་སུ་འདོར་འདོད་སྐྱེ་ཡང་། མ་འོངས་པའི་རྨི་ལམ་དེའི་ཆེད་དུ་རང་གིས་རང་ལ་སེམས་གསོ་བྱེད་པ་དང་། སེམས་ཤུགས་སྤྲོད་པ། ཡིད་ཆེས་བཅངས་ཏེ། དེ་ནི་སྐད་རིགས་ཤིག་སྦྱང་པར་ངེས་པར་བརྒལ་དགོས་པའི་ལ་མོ་དེ་ཡིན་པས་རེ་ཐག་ཆང་མི་རུང་ངོ་ཞེས་ཀྱང་སྐད་གསེང་མཐོན་པོས་རང་གིས་རང་ལ་ཁེར་ལབ་བརྒྱབ། དེ་ནི་སློབ་གཉེར་བ་ཞིག་མཚོན་ན་རྒྱུན་ལྡན་གྱི་སྣང་ཚུལ་རང་ཡིན་པར་བློས་བསླངས་བྱེད་ཞོར་ཅི་ཐུབ་ཀྱིས་ཕུགས་རྒྱང་རིང་བའི་བྱ་བཞག་ལ་འདང་རྒྱག་ཁུལ་བྱས། འགྲོ་སའི་གནས་ལ་མ་སླེབས་པར་ལམ་བར་ནས་ཕྱིར་འཁོར་བ་དེ་ལས་དབང་ལ་ཁ་ལོ་བསྒྱུར་འདོད་པའི་མི་བུ་ཚོའི་རང་ཚུགས་མ་ཡིན་པར་ཅོལ་ཆུང་གི་རང་གཤིས་སོ་ཞེས་ཀྱང་སྤོབས་སེམས་མཐོན་པོས་རང་ལ་སྨྲས། དེ་ལྟར་བརྩོན་འགྲུས་ཀྱི་རྟ་ཕོར་རེ་བ་དང་ཡིད་ཆེས། ཕུགས་དང་རྨི་ལམ་དྲག་པོའི་ལྕགས་ཀྱིས་བྲབ་སྟེ། མདུན་ནས་མདུན་ཕྱོགས་སུ་རྒྱུག་པ་ཡིན། ད་དུང་དཀའ་སྡུག་གི་རླུང་འཚུབ་བརྟོལ་ཏེ། རྣམ་གཡེང་གི་བསླུ་བྲིད་གཡོལ་ཀྱིན་མུ་ནས་མདུན་དུ་བསྐྱོད་དགོས་སོ།།