kicebu tacikū de genembi

[1992年版锡伯语小学语文课本第二册第15课]

kicebu tacikū de genembi

erde, kicebu bithei bofun be unufi tacikū de genembi. tere hailan bujan be dulere de, ajige hailan tere i baru gala elkime,"kicebu muse efiki, ubade ajige gasha bi, uculerengge yargiyan i sain." sehe.

kicebu uju be lasihime gisureme, "ojorakū, bi tacikū de genembi." sehe.

tere orhoi tala be dulere de, ajige orho terei baru uju gehešeme, "kicebu muse efiki, ubade kuwariyangga ilha bi, fithenehengge jingkini saikan." sehe.

kicebu gala lasihime gisureme, "ojorakū, bi tacikū de genembi." sehe. kicebu ucun uculeme, urgun sebjengge tacikū de genehe.

suhen

(1)unumbi: yaya jaka be fisa de alifi yabure be unumbi sembi.

(2)elkimbi: gala tukiyeme niyalma be jio seme hūlara be gisurehebi.

urebusu

1.nirugan be tuwame kicen be hūlafi, fejergi fonjin be jabuki.

(1)ajige hailan kicebu i baru ai seme gisurehebi? kicebu ai seme gisurehebi?

(2)ajige orho kicebu i baru ai seme gisurehebi? kicebu ai seme gisurehebi?

2.fejile bihe hergen be baitalame gisun banjibuki. (elkimbi, baru, saikan, sebjengge, lasihimbi.)