གོམས་གཤིས་ཀྱི་བྲན་གཡོག

གྲོགས་པོ་ཞིག་དང་ལྷན་དུ་ཨ་རིའི་འཇུ་རྩལ་འགྲན་ཚོགས་ཆེན་མོ་ཞིག་ལ་བལྟས་ཏེ་ད་བར་དུ་ལྷག་སོང་། ཧ་ལམ་དུས་ཚོད་གཉིས་གསུམ་གྱི་ཡུན་ཙམ་འདུག ང་རང་ཆེས་དགའ་སའི་ལུས་རྩལ་སྐོར་གྱི་ལྟད་མོ་ཡང་འཇུ་རྩལ་ཡིན་པས། ཨ་རི་ཚང་གི་འཇུ་རྩལ་འགྲན་ཚོགས་ཆེ་ཤོས་གཅིག་ཀྱང་ཤོར་ག་ལ་མྱོང་སྟེ། ཐ་ན་གཟའ་འཁོར་རེ་རེའི་འགྲན་ཚོགས་ཆུང་གྲས་དག་ཀྱང་ཤོར་མ་མྱོང་བའི་ཚོད་ཡིན། ཧ་ཅང་ལྟ་རིན་ཡོད་པ་ཞིག་མིན་ནའང་། སྔོན་གྱི་གོམས་གཤིས་ཤིག་གི་རྐྱེན་བྱས་ཏེ། དེ་ནི་རྒྱུན་དུ་རྣམ་གཡེང་བྱ་སའི་ཡུལ་དམིགས་བསལ་བ་ཞིག་ཏུ་ཆགས་ཡོད། ལན་རེར་སེམས་ཀྱི་ངལ་དུབ་གསོ་བྱེད་དང་སུན་སྣང་མཐའ་རུ་སྐྲོད་མཁན་ཡང་དེ་ཉིད་ཆགས་ཡོད། ངའི་ཁོར་ཡུག་གི་གྲོགས་པོ་མང་ཆེ་བ་སྤོ་ལོའི་འགྲན་བསྡུར་ལ་དགའ་ཞེན་ཆེ་ཡང་། ང་ནི་ལྡོག་སྟེ་སྤོ་ལོའི་ཕྱོགས་ལ་གཏན་ནས་དགའ་མོས་མེད། སྤོ་ལོའི་འགྲན་བསྡུར་གཅིག་ལ་ཡང་མགོ་རྔ་ཚང་བ་ཞིག་བལྟ་མྱོང་མེད། དེ་ཡང་དགའ་ཁ་འཁྱེར་ཕྱོགས་མ་འདྲ་བའི་བར་ཁྱད་ཙམ་མོ།། དེས་ཀྱང་ཡོད་ཚད་གོམས་གཤིས་ཀྱི་བྲན་གཡོག་ལ་འདུར་གྱིན་པ་གསལ་བར་མངོན་འདུག་གོ།།