རང་ཁྱིམ་ནི་ཁང་བ་དང་སྦྲ་གུར་གྱི་སྡེ་ཚན་དེ་ཚོ་ཡིན་ལ་དེ་ཚོ་ཡང་མིན།རང་ཁྱིམ་ནི་ཅ་ལག་དང་ཡོད་བྱད་ཀྱི་ཚོགས་པ་དེ་ཚོ་ཡིན་ལ་དེ་ཚོ་ཡང་མིན།རང་ཁྱིམ་ནི་མི་ཡི་ས་བཅད་ཆུང་ངུར་བཅད་པའི་མཐར་ཐུག་ཅིག་དང་།རང་མོས་སྒོས་འཛུགས་སྒྲུབ་བྱས་པའི་དམངས་ཁྲོད་ཀྱི་རྩ་འཛུགས་ཤིག་ཡིན་ཅིང་ཁྱིམ་ཚང་གྲངས་མེད་ཀྱི་ནང་ནས་གདམ་ང་མ་བྱས་པར་ཁྱོད་ལ་ལས་དབང་གིས་ཐོབ་པའི་བགོ་སྐལ་ཞིག་ཡིན།དེ་ནི་དགའ་སྐྱོ་མཆུ་སྒྲོས་ཀྱིས་བཏུས་ཏེ་སྡོང་མགོ་རུ་གོར་གོར་དུ་བརྩིགས་པ་ཞིག་ཡིན་ལ། སྐྱོ་ངལ་སྤར་སེན་གྱིས་བྲད་དེ་རི་འདབས་སུ་ཀོང་ཀོང་དུ་བྲུས་པ་ཞིག་ཡིན་ཅིང་།མི་རབས་ནས་མི་རབས་བར་མཇུག་མི་སྒྲིལ་བའི་བཟོ་བཀོད་ཆུང་ཆུང་ཞིག་ཡིན།
རང་ཁྱིམ་ནི་རྒྱ་མཚོའི་ཀློང་ན་སྐྱོད་པའི་གཡོར་གྲུ་དཀར་པོ་ཞིག་ཡིན་ལ།ནམ་མཁའི་དབྱིངས་སུ་འཚེར་བའི་སྐར་ཕྲན་འོད་ཅན་ཞིག་ཡིན།ཡང་ན་དེ་ནི་རང་དབང་དང་འདྲ་མཉམ་གྱིས་བསྒྲེངས་བའི་དར་ཆ་ཞིག་གམ།དར་ཆ་དེའི་འོག་གི་དམ་བཅའ་དང་བསྒྲགས་གཏམ་ཞིག་ཡིན།རང་ཁྱིམ་ནི་ཕྱི་ནས་བལྟས་ཚེ་སྔོ་རྒྱང་རྒྱང་དུ་འཕྱུར་བའི་དུ་བ་ཡི་འབོད་པ་ཞིག་ཡིན་ཅིང་།ནང་དུ་བསླེབས་ཚེ་རློན་ཐོལ་ཐོལ་དུ་ལང་བའི་དྲོད་རླངས་ཀྱི་དགའ་བསུ་ཞིག་ཡིན།འོན་ཀྱང་དེ་ཡང་མཐར་གཏུགས་ན་རང་ཁྱིམ་ནི་སེམས་པ་ལྷོད་ལ་ཕབ་སྟེ་གཉིད་སའི་མལ་ཁྲི་ཆུང་ཆུང་ཞིག་ཡིན།
༣
མི་ཡུལ་ན་ཆེས་བྱམས་བརྩེ་ལྡན་པའི་དབུ་སྐྲ་དཀར་པོ་ཅན་ཞིག་གིས་འདི་ག་ནས་ཁྱོད་ཀྱི་གོམ་སྒྲ་ལ་ཞིབ་ཉན་བྱེད་བཞིན་ཡོད་ཅིང་།ས་སྟེང་ན་ཆེས་སྙིང་དུ་སྡུག་པའི་མིག་འབྲས་དྭངས་མོ་ཞིག་འདི་ག་ནས་ཁྱོད་ལ་སྔོན་བསུ་བྱེད་པར་རྒྱུག་འོང་ལ།འཇིག་རྟེན་ན་ཆེས་ཡི་གར་འོང་བའི་འཛུམ་དཀར་གསར་བ་ཞིག་འདི་ག་ནས་ཁྱོད་ལ་སྒོ་གླེགས་ཕྱེ་བར་ཕེབས་འོང་།
༤
ཁྱོད་ཀྱིས་ངལ་དུབ་དང་སུན་སྣང་རྒྱབ་གང་ཁུར་ཏེ་རང་ཁྱིམ་གྱི་སྒོ་དྲུང་དུ་ལྕིད་ལྟིག་གེར་དབོར་ཆོག་ལ།གླེང་བརྗོད་དང་འཁང་ར་རུམ་གང་ཁྱེར་འོངས་ཏེ་རང་ཁྱིམ་གྱི་གྲུ་ག་རུ་རྡུལ་ཉིལ་ལེར་བྱོ་ཆོག་ཆོག་ཡིན་ཏེ།ཁྱོད་ནི་རང་ཁྱིམ་གྱི་ཆེས་དྲོ་སའི་སྒྱེད་རྩ་རུ་སྐྱིལ་ཀྲུང་དུ་སྡོད་པའམ།ཆེས་བདེ་སའི་འབོལ་ཁྲི་རུ་བྱམས་འདུག་ཅིག་བྱས་ཏེ།གསོལ་ཇ་ཚ་མོ་ཕོར་བ་གང་མ་འཐུང་བའི་ཞར་ལ་དེ་རིང་གི་བྱུང་བ་ཐམས་ཅད་ལྷག་མེད་དུ་ཐེངས་ཤིག་བརྗོད་ཚེ།མིག་ཟུར་གྱིས་གོས་པའི་མནོལ་གྲིབ་ཡོད་ཚད་རང་ཤུགས་ཀྱིས་སངས་ཏེ་འགྲོ་ཞིང་།ཚིག་ཟུར་གྱིས་བཟོས་པའི་རྨ་ཁ་ཡོད་ཚད་རང་ཤུགས་ཀྱིས་སོས་ཏེ་འགྲོ།
༥
རང་ཁྱིམ་སྟེ།འདི་ཉིད་ཁོ་ནར་སྐ་རགས་དང་ངོ་གནོང་ལྷན་ཅིག་བཀྲོལ་ཏེ་ལུས་སེམས་བདེ་འཇགས་སེ་ཆེ་འདུག་བྱེད་ཆོག་ལ།རྫུ་བག་དང་ལྷམ་ཀོག་མཉམ་དུ་ཕུད་དེ་རྐང་རུལ་བཀྲུས་ནས་གློ་ཉལ་ཡང་བྱེད་ཆོག ཡོད་ན་ཚོན་པོ་གཞན་ལ་མི་སྟེར་བར་འདི་ནས་ཟ་ཆོག་ཅིང་།མེད་ན་སྐྱོ་མ་མི་ཡིས་མི་མཐོང་བར་འདི་ནས་ལྡག་ཆོག
༦
རང་ཁྱིམ་སྟེ།འདི་ཉིད་ཁོ་ནར་ཁྱོད་ཀྱི་སྐད་ཆ་ལ་ཟིན་བྲིས་འདེབས་མཁན་མེད་པས།ཐ་སྙད་ལ་སྒྲོས་ཉམས་གདོན་མི་དགོས་པར་གང་དྲན་ཐོལ་བྱུང་དུ་སྨྲ་ཆོག་ལ།ལུས་ན་སར་རེག་པ་དང་སེམས་ན་ས་ཤོད་པའི་དཔེ་ལྟར་ཡུལ་གཉན་པོ་དང་མི་ཆེན་པོ་འདུ་བའི་རང་གཞན་སུ་ལའང་འཁང་ཚིག་དང་ལེ་འདེད་བྱང་རྒྱལ་དུ་བྱེད་ཆོག་ཅིང་།ཐ་ན་ཕྱི་ཡི་ཡུལ་དེ་ནང་ལ་བསྔོས་ཀྱང་མི་ཆོག་པ་མེད་ལ།དགོས་དབང་གིས་མིག་ཆུ་ཤམ་ཤམ་དུ་གཏོང་ཆོག་པ་དང་།ཀྱལ་ཀ་དང་གཡེར་བག་སོགས་ཀྱང་གང་འདོད་འདོད་དུ་བྱས་ཆོག
༧
རང་ཁྱིམ་སྟེ།འདི་ཉིད་ཁོ་ནར་འགྲོ་གྲོན་དང་ཡོང་འབབ་ལ་འཛིན་ཡིག་དགོད་མི་དགོས་པས།ཁྱོད་ཀྱིས་འདོད་ན་ཉོ་བའམ་མ་འདོད་ན་མ་ཉོས་ཀྱང་ཆོག་ལ།གསོག་འདོད་ན་གསོག་ཅིང་བརླག་འདོད་ན་བརླགས་ཀྱང་ཆོག
ཡང་ན་རང་ཁྱིམ་ནི་ཁྱོད་ལ་དབང་བའི་ཤོག་དཀར་ཁ་གང་སྟེ།དེ་ལ་ཁྱོད་ཀྱིས་ཅི་ཞིག་འབྲི་བའམ་ཇི་ལྟར་འགོད་པའམ།གང་ལྟར་གསུབ་ཀྱང་ཆོག་སྟེ།ཁ་བྱང་ལ་གཏན་ཁེལ་མེད་ཅིང་ཐོབ་སྐར་རྒྱག་མཁན་ཡང་མེད།
༨
ཀྱེ་མ།འདི་ཉིད་མེད་ན་ཁྱོད་ནི་ནམ་ཡང་འདྲ་འབག་གྱོན་པའི་གར་མཁན་ཞིག་ཡིན་ཅིང་།འདི་ཉིད་མེད་ན་ཁྱོད་ནི་གཏན་དུ་ལྕགས་སྒྲོག་ཏུ་ཚུད་པའི་བཙོན་མ་ཞིག་ཡིན།དེས་ན།འདི་ནི་ཁྱོད་ཀྱིས་མི་ཡུལ་འདི་རུ་འགྲན་རྩོད་བྱས་པ་ལས་རྙེད་པའི་རང་དབང་ཡིན་ཅིང་། འཁོར་བ་འདི་ལ་ཨུ་ཚུགས་བྱས་པ་ལས་ཐོབ་པའི་བདེ་སྐྱིད་ལགས།
༩
ཀྱེ་མ།འདི་ན་ཁྱོད་ཀྱི་དགའ་སྐྱོ་ཡོད།ཆགས་སྡང་ཡོད།དགོད་སྒྲ་ཡོད།མིག་ཆུ་ཡོད།འདི་ན་ཁྱོད་ཀྱི་རྨི་ལམ་ཡོད།བསམ་གཞིག་ཡོད།རྔུལ་ཆུ་ཡོད།རྗེས་ཤུལ་ཡོད།ད་དུང་མཚན་མོའི་གཉིད་ཀྱི་སྔུར་སྒྲ་དང་།ཉིན་མོའི་གཟུགས་ཀྱི་གྲིབ་མའང་ཡོད།
༡༠
བཙལ་བཙལ་བའི་མཐར་ཁྱོད་ཀྱིས་འདི་ལས་གཞན་ཅི་ཞིག་ཀྱང་མ་རྙེད།དཔྱད་དཔྱད་པའི་མཐར་ཁྱོད་ཀྱིས་འདི་ལས་ཅི་ཡང་མ་རྟོགས།སོང་སོང་བའི་མཐར་ཁྱོད་ཉིད་འདི་ལས་གང་དུའང་མ་ཕྱིན།དེས་ན།འདི་ནི་ཁྱོད་ཀྱིས་མི་ཡུལ་འདི་རུ་འགྲན་རྩོད་བྱས་པ་ལས་རྙེད་པའི་རང་དབང་ཡིན་ཅིང་།འཁོར་བ་འདི་ལ་ཨུ་ཚུགས་བྱས་པ་ལས་ཐོབ་པའི་བདེ་སྐྱིད་ལགས།
༡༡
ཁྱོད་ཀྱིས་ད་དུང་འདི་ནས་ཚེ་སྲོག་ཆུང་ཆུང་ཚོ་གཤོག་འོག་ཏུ་དྲོད་ཁོལ་གྱིས་སྙོར་དགོས་པས།རང་ཁྱིམ་ནི་ཁྱོད་ཀྱི་འདབ་ཆགས་དག་གི་ཚང་མལ་ཡིན།ཁྱོད་ཀྱིས་ད་དུང་འདི་ནས་དུངས་སེམས་འཇམ་པོ་ཞིག་ལ་མཛའ་མཐུན་གྱིས་བྱབ་བྱབ་བྱེད་དགོས་པས།རང་ཁྱིམ་ནི་ཁྱོད་ཀྱི་གཅན་གཟན་དག་གི་ཁུང་བུ་ཡིན།ཁྱོད་ཀྱིས་ད་དུང་འདི་ནས་རི་འཁྱར་དུ་ཕྱིན་པའི་སེམས་པ་ལྡོམ་པོ་ཞིག་ལ་རྒྱང་རིང་གི་གཡབ་མོ་བྱེད་དགོས་པས།རང་ཁྱིམ་ནི་ཁྱོད་ཀྱི་རི་དྭགས་ཚོ་ཡི་གནས་མལ་ཡིན།ཁྱོད་ཀྱིས་ད་དུང་འདི་ནས་ནར་མ་སོན་པའི་ལས་དབང་ཉམ་ཐག་ཅིག་ལ་ཡང་ཡང་འབོད་སྐུལ་གཏོང་དགོས་པས།རང་ཁྱིམ་ནི་ཁྱོད་ཀྱི་བྱ་བའི་ལས་གནས་ཀྱང་ཡིན། 1
༡༢
འོ་ན། ཁྱོད་ལ་འཇིག་རྟེན་ཁམས་ཀྱི་རྙེད་པ་ཆུང་ཆུང་འདི་གཏན་དུ་འཐོབ་པའི་རྟེན་འབྲེལ་ཞུ་ལ།ཆེས་མཐའ་མཇུག་གི་རང་དབང་ཕྲན་བུ་འདི་ལ་ཡུན་རིང་མི་འབྲལ་བའི་སྨོན་ལམ་ཞིག་ཀྱང་འདེབས་སོ། །
འོ
网友评论