2018-10-13

2018-10-13

ཞོགས་པར་དོན་ག་གེ་མོ་ཞིག་གི་རྐྱེན་གྱིས་ཤིན་ཏུ་སེམས་མི་སྐྱིད་པ་ཞིག་བྱུང་སོང་བ་དང་། བལྟ་འཕྲོར་ལུས་པའི་དེབ་དེའང་ཡེ་ནས་ལག་ཏུ་འཛིན་འདོད་མ་བྱུང་བས། རྒྱའི་གྲོགས་མོ་དེ་དང་མཉམ་དུ་བར་སྐོར་དུ་འཆམ་འཆམ་ལ་འགྲོ་ཞོར་ཇོ་ཁང་བསྐོར་ལམ་དུ་ཡོད་པའི་རྨེ་རུ་རྙིང་མ་དགོན་གྱི་ཨ་ཁུ་ལགས་ལ་བལྟ་རུ་ཕྱིན་པ་ཡིན།

ཁོང་ནི་གྲྭ་པ་རྒན་པ་ཞིག་སྟེ། ཕ་ཡུལ་ཆབ་མདོ་ནས་ཡིན་ཞིང་ལོ་ངོ་གསུམ་བཞི་ཙམ་གྱི་སྔོན་ནས་རྨེ་རུ་རྙིང་མ་དགོན་དུ་ཕེབས་ཏེ་དེར་མཆོད་པ་བཤམས་རྒྱུ་དང་ལྷ་ཁང་དུ་གཙང་སྒྲ་བྱེད་པ་སོགས་ལ་འགན་འཁུར་ཏེ་ད་བར་བསྡད་པ་ཡིན་ཟེར།

ཁོང་ཡང་ང་དང་འདྲ་བར་སྐད་ཆ་མང་པོ་ལབ་རྒྱུར་དེ་འདྲ་དགའ་པོ་མེད་པ་དང་རྒྱུན་པར་གདོང་ལ་འཛུམ་གྱིས་ཁེངས་ཞོར་ནན་ཏན་སྒོས་གཞན་གྱི་སྐད་ཆར་ཉན་པར་སྤྲོ་བ་རེད།

དེ་རིང་ཁོང་དང་འཕྲད་པ་ཐེངས་བཞི་པ་ཡིན་ཏེ། དེ་སྔོན་གྲོགས་མོ་འདི་དང་མཉམ་དུ་ཐེངས་ཁ་ཤས་སུ་འདིར་ཡོང་སྟེ་ཇ་མངར་མོ་འཐུང་ཞོར་ཨ་ཁུ་དང་ཁ་བརྡ་གློད་པ་ཡིན་ཡང་། ཐེངས་རེར་འདིར་སྐར་མ་འགའ་རེ་དང་ཡང་ན་ཆུ་ཚོད་གཅིག་ཙམ་མ་གཏོགས་ཡུན་རིང་བསྡད་མྱོང་མེད་པས་ཕན་ཚུན་ལ་རྒྱུས་ལོན་ཆེན་པོ་མེད།

ངའི་གྲོགས་མོ་འདིའང་ཧ་ཅང་ཁྱད་ཆོས་ལྡན་པའི་མི་ཞིག་རེད་བསམས་ཏེ། ཁོ་མོ་ནི་ད་ལོ་སྒྱུ་རྩལ་སློབ་གླིང་ནས་ཞིབ་འཇུག་མཐར་ཕྱིན་པ་ཡིན་ཞིང་། བསམ་བློ་དང་ནུས་པ་སོགས་ཕྱོགས་གང་ཐད་ནས་ཧ་ཅང་འབུར་དུ་ཐོན་པ་ཞིག་ཡིན་ཀྱང་། རང་ཉིད་གནད་དོན་གང་ལ་འཕྲད་ཚེ་དགེ་རྒན་ཆེན་མོ་ག་གེ་མོ་དང་མི་སྣ་གྲགས་ཆེན་ག་གེ་མོ་འཚོལ་བ་ནི་གཏན་ནས་དཔེ་མི་སྲིད་པ་ཞིག་ཡིན། དེ་ལས་ལྡོག་སྟེ་ཁོ་མོ་ཐེངས་རེར་བར་སྐོར་ལམ་གྱི་གད་སྙིགས་འཐུ་མཁན་གྱི་ཨ་མ་ལགས་དང་རྨེ་རུ་རྙིང་མ་དགོན་དུ་མཆོད་པ་བཤམས་མཁན་གྱི་ཨ་ཁུ་ལགས་འཚོལ་བར་ཕྱིན་ཏེ་མི་ཚེའི་གནད་དོན་མང་པོ་ཞིག་ཁོང་ཚོ་དང་མཉམ་དུ་བགྲོ་གླེང་བྱེད་པ་རེད།

དེ་རིང་ཡང་ནམ་རྒྱུན་ལྟར་ཇ་མངར་མོ་འཐུང་ཞོར་གྲོགས་མོའི་གནད་དོན་དག་ཨ་ཁུ་ལགས་དང་མཉམ་དུ་བགྲོ་གླེང་བྱས་པ་ཡིན། ཞོར་དུ་ངས་ཀྱང་ཁོང་གཉིས་ལ་ཉེ་ལམ་རང་ཉིད་ཀྱི་ལུས་པོ་ཅུང་མི་བདེ་ཚུལ་དང་ཉིན་ཁ་ཤས་རྗེས་ནས་ཕ་ཡུལ་དུ་ལོག་འཆར་ཡོད་པའི་སྐོར་ལབ་པ་ཡིན། ཨ་ཁུ་ལགས་ཀྱིས་ང་ལ་ཕ་ཡུལ་དུ་ལོག་པའི་མེ་འཁོར་པ་སེ་ཉོ་བར་དངུལ་ག་ཚོད་དགོས་པ་དང་ངའི་མི་བདེ་བ་དེ་ལ་སྨན་གང་དང་གང་འཐུང་རྒྱུ་ཡོད་མེད་ཀྱི་སྐད་ཆ་དྲིས། དེ་ལྟར་ཡུན་རིང་ཁ་བརྡ་བྱས་མཐར། ཨ་ཁུ་ལགས་ཀྱིས་ངའི་ལག་ཏུ་སྒོར་བརྒྱ་ཤོག་འགའ་བརྫངས་ཏེ་ཕ་ཡུལ་དུ་ལོག་པའི་པ་སེ་ཉོ་སྤྱད་བྱོས་ཟེར། ང་ནི་རེ་ཞིག་ཅི་བྱ་གཏོལ་མེད་དུ་གྱུར་པ་དང་ཅི་ཞིག་ལབ་འདོད་ཀྱི་འདུན་པ་ཆེའང་ཁ་ནས་སྐད་ཆ་གང་ཡང་མ་ཐོན་པར་ལུས། དེ་རིང་སྔ་དྲོ་ངས་མི་ཞིག་དང་ཁ་རྩོད་བྱས་ཏེ་ཁོ་དང་འབྲེལ་བ་བཅད་པ་ཡིན་ལ། ཁ་པར་ལས་མི་དེ་དང་འབྲེལ་ཡོད་ཀྱི་ཡོད་ཚད་བསུབས་དུས་ངའི་སྣང་བར་འཇིག་རྟེན་ཧྲིལ་པོ་འདི་རང་གི་དགྲ་རུ་ལངས་ཡོད་སྣང་སྐྱེས་སོང་། ཨ་ཁུ་ལགས་ཀྱིས་ང་ལ་དེ་རིང་དྲང་བདེན་མིན་པའི་འབྲས་བུ་ཞིག་བྱུང་སོང་བ་མཁྱེན་ཡོད་པ་མ་ཡིན་ནམ།

ངའི་རྒན་ལགས་ཀྱིས་རྟག་པར་ང་ལ་སྐད་ཆ་འདི་འདྲ་ཞིག་ལབ་མྱོང་སྟེ། མོ་དང་འཕྲད་ཐེངས་རེར་ “ཡེ་ཤེས། ཁྱེད་ཀྱིས་ཡ་ང་ཞིང་ཡིད་དུ་མི་འོང་བའི་དོན་ག་ཚོད་ཅིག་མཐོང་བའམ་བརྒྱུད་སྲིད་ཀྱང་། ངེས་པར་སྔར་བཞིན་འཇིག་རྟེན་འདིའི་ངོ་བོ་ངོ་མ་དེ་ནི་ཧ་ཅང་མཛེས་སྡུག་ལྡན་པ་ཞིག་ཡིན་པ་དེ་རྟོགས་དགོས་” ཞེས་ལབ་པ་རེད། དངོས་གནས་དེ་འདྲ་རང་རེད་ཨང་། རྙོག་དྲ་ཆེ་བའི་དོན་དག་མང་པོ་ཞིག་ཕར་གཡུགས་ཏེ་བབས་ཆགས་ཀྱི་གནས་ཤིག་ཏུ་སེམས་པ་ལྷོད་ལ་འབབ་འགོ་རྩོམ་དུས། ད་གཟོད་དོན་དག་མང་པོ་ཞིག་གི་ཧ་གོ་བ་དང་མཐའ་འཁོར་གྱི་ཆེས་སྤྱིར་བཏང་གི་འཚོ་བའི་ཁྲོད་མཛེས་སྡུག་དང་དྲོད་སྣང་ཞིག་ཚོར་འོང་ཀི་རེད།

ཕྱིར་ཡོང་བའི་ལམ་བར་དུ་གྲོགས་མོ་དང་ཁ་རྩོད་ཅིག་བྱུང་སོང་བ་སྟེ། མོས་བར་སྐོར་དུ་གང་འདོད་ལྟར་མཇལ་བ་དག་པར་ལེན་བཞིན་པའི་ཕྱི་གླིང་བ་དག་ལ་སྡིགས་མོ་བྱས་པ་དང་དེར་ངས་མོ་ལ་རྒྱ་མི་ཚོ་ཕྱི་གླིང་བ་དག་ལས་ཀྱང་ཞན་པ་དང་། ཁོང་ཚོས་མི་རིགས་དང་རིག་གནས་གཞན་ལ་གཏན་ནས་བརྩི་བཀུར་བྱེད་ཤེས་ཀི་མི་འདུག་ཅེས་ལབ་པ་ན་མོ་ཁོང་ཁྲོ་ཞེ་ནས་ལངས་བྱུང་། སློབ་གྲྭའི་སྒོ་ཁ་ནས་ཡར་འཛུལ་དུས་མོས་ང་དེར་ཅུང་སྒུག་ཏུ་བཅུག་སྟེ་སྨན་ཁང་ཞིག་ཏུ་འཛུལ་བ་དང་ཡུན་ཙམ་ནས་སྨན་ཁུག་མ་གང་ཉོས་ཡོང་སྟེ་ང་ལ་སྤྲད་བྱུང་།

2018.10.13