ཀ་རྩོམ།

སེམས།

སྙན་ཚིག་དྲི་བསུང་དཔྱིད་ཀྱི་སྒེག་པ་མོ།  །

མཐོང་བའི་རྗེས་སོང་རིག་བྱེད་ལྷ་ཡི་རྗེ།  །

ཚངས་དབྱངས་རྫོགས་པའི་དབྱངས་ཅན་ལྷ་མོ།  །

སྙན་ངག་འདོད་པའི་གམ་དུ་མྱུར་བྱོན་ཅིག  །

ཀྭ་ཡེ་སེམས་ནང་ཡོད་པའི་བོད་པ་ཚོ།  །

ཁ་ནས་གཞན་སྐད་མི་སྨྲ་རང་སྐད་ཤོད།  །

ག་ན་ཕྱིན་ཡང་ཕ་སྐད་མ་བརྗེད་བས།  །

ང་ཡི་མི་རིགས་བསམ་ན་བོད་སྐད་བརྩོན།  །

ཅ་ཅོའི་གཏམ་ངན་མི་སྨྲ་བོད་པའི་བུ།  །                 

ཆ་ལུགས་སེམས་བཟང་གོམས་སྲོལ་བོད་པའི་རྒྱན།  །

ཇ་ཁ་དམར་བའི་གདོང་དམར་བོད་ཚོ།  །                 

ཉ་མོ་བཞིན་དུ་གང་སར་མ་ཁྱུགས་རོགས།  །             

ཏ་ལོའི་ལོ་འདབས་རིམ་བཞིན་རྒྱས་བཞིན་ཡོད།  །         

ཐ་སྙད་པ་ཡིས་ཡར་ངོ་ཟླ་ལྟར་འཕེལ།  །                       

ད་ལྟ་ཕ་སྐད་རང་ལ་དབང་བའི་དུས།  །                 

ན་གཞོན་ང་ཚོས་ཕ་སྐད་དམ་འཛིན་དགོས།

པ་ཏོ་ལ་དག་ནང་པ་ཆོས་ལ་དད།  །

ཕ་སྐད་མ་ཡིག་སྦྱོང་བའི་དུས་ལ་འབབ།  །

བ་རྒྱ་བཞིན་དུ་སྤྱི་ཚོགས་དེ་ཡི་ཐོག  །

མ་ཡིག་མང་ཙམ་བཀོལ་དགོས་བོད་པ་ཚང་།  །

ཙ་མ་ར་ཡི་ནུས་རྩལ་རྩྭ་ཐང་དབང་།  །

ཚ་ཟེར་དྲོ་སྐྱིད་ལྡན་པའི་ཁ་བ་ལྗོངས།  །

ཛ་དྲག་དེང་སང་བདག་གི་གསུམ་རྩེན་ནས།  །

ཝ་ལེར་རང་ལ་མི་དབང་ཉེན་ཁ་ཆེ།  །

ཞ་འཐེང་སྙིང་རེ་རྗེ་བའི་ཀླད་མེད་ཚོས།  །

ཟ་མ་བསམ་ནས་ཞ་ནད་མི་བཅོས་པ།    །   

འ་ཅག་ཁ་རྒྱབ་དོན་ལ་འཆི་བྱས་ན།  །   

ཡ་མ་ཟུང་གི་ལྟ་ལོག་གསལ་བོར་རྟོགས། 

ར་མ་ལུག་སྐད་མ་བཤད་ཨ་མའི་བུ།  །     

ལ་བརྒྱ་ཁ་བཤད་མ་བྱེད་ལག་ལེན་གྱིས།  །     

ཤ་ཚ་སྙིང་ཉེ་སྤོབས་མེད་རང་རིགས་བོད།  །   

ས་སྟེང་འདི་ན་འཚོ་ཡང་དགའ་བ་མེད།  །

ཧ་གོ་བོད་པ་ཡིན་ན་ཕ་སྐད་སྦྱོང་།  །

ཨ་རོགས་ང་ཚོས་མ་འོངས་ཕ་གཞི་འཛིན།  །   

ང་ཚོ་ན་གཞོན་རྣམས་ཀྱི་འོས་འགན་ནི།  །           

ཕ་སྐད་མ་ཡིག་ཉམས་པ་སླར་གསོ་དགོས།  །

              སྨྱུག་མིང་། རིག་པའི་གྲུཟིངས།

          ༢༠༢༡.༣.༡༠