གཞན་ངོ་མི་བསྲུང་བའི་སྤོབས་པ།

ཚན་པ་ལྔ་བ།

བརྙས་འཛིན་ལ་མཐུན་ཕྱོགས་དང་མི་མཐུན་ཕྱོགས་ཀྱི་བརྙས་འཛིན་གཉིས་ཡོད་པ་ལྟར་དུ། རང་ཉིད་གཞན་ལས་ཤེས་ཡོན་སོགས་གང་གི་ཆ་ནས་མཆོག་ཏུ་ལྟ་བའི་མཆོག་འཛིན་ལ་ཡང་མཐུན་ཕྱོགས་དང་མི་མཐུན་ཕྱོགས་ཀྱི་མཆོག་འཛིན་གཉིས་ཡོད་པ་རེད། མཐུན་ཕྱོགས་ཀྱི་མཆོག་འཛིན་ཞེས་པ་དེ། དོན་དངོས་སུ་དཀའ་བ་བརྒྱ་ཕྲག་ཁྱད་དུ་བསད་ཅིང་ངལ་བ་དང་དུ་བླངས་པའི་རྒྱུན་རིང་བོའི་ཧུར་བརྩོན་ལ་བརྟེན་ནས་གཞན་དང་མི་འདྲ་བའི་སློབ་གཉེར་གྱི་གྲུབ་འབྲས་དམིགས་བསལ་བ་ཐོབ་སྟེ། དེའི་ཆ་ནས་རང་ཉིད་གཞན་ལས་མཆོག་ཏུ་ལྟ་བ་དེའི་རིགས་ལ་བརྗོད། དེ་ནི་དོན་དམ་པའི་རྒྱལ་ཁ་དང་གཟི་བརྗིད་ཡིན་པས་རང་ཉིད་གཞན་ལས་མཆོག་ཏུ་ལྟ་བ་ཡང་དོན་གྱི་ང་རྒྱལ་ལོ།། དེས་ན་མི་མཐུན་ཕྱོགས་ཀྱི་མཆོག་འཛིན་ཞེས་པ་དེ། གཅིག་ནས་སློབ་གཉེར་ལ་ཤ་ཐང་ཐང་གི་འབད་པའི་དཀའ་སྡུག་གི་ལ་མོ་བརྒལ་མི་འདོད་ཅིང་། གཉིས་ནས་རང་ཉིད་ཤེས་འཇོན་ནུས་གསུམ་གང་གི་ཆ་ནས་ཀྱང་གཞན་གྱི་རྗེས་སུ་ལས་ཚར་བའི་སྣང་བརྙན་སྐྱོ་བོ་དེ་དང་ལེན་བྱ་མ་འདོད་པར་མི་ཤེས་ཤེས་མདོག་དང་མེད་ཅིང་ཡོད་མདོག་བསྟན་ཏེ། ཅི་ནུས་གང་ཐུབ་ཀྱིས་རང་ཉིད་མཆོག་ཏུ་བཞེངས་པར་འདོད་པ་དེ་ལ་ཟེར། དོན་དངོས་སུ་ཅི་ཡང་མི་འཇོན་ལ་གང་ཡང་མི་ཤེས་པའི་རང་ཉིད་ཀྱི་ང་ཡ་བའི་ངོ་གདོང་སྐྱ་བོ་དེ་གཞན་གྱིས་ཤེས་འགྲོ་བར་སྐྲག་སྟེ། གཞན་ངོར་ཅི་ཐུབ་ཀྱིས་མཆོག་ཏུ་རྫུ་ཐབས་དེ་ལ་རིགས་དུ་མ་ཡོདདེ། གཅིག་ནི། རྒྱན་ཆ་གོང་ཅན། གོམ་པ་རྟགས་ཅན་སོགས་ཕྱིའི་དངོས་པོའི་རིན་ཐང་ཁོ་ན་བརྟེན་ཏེ་གཞན་ངོར་རྒྱུ་སྟོབས་ཡོད་མདོག་དང་ནུས་པ་ཆེ་མདོག་བསྟན་ནས་མཆོག་ཏུ་རྫུ་བར་དགའ་བ་དེ་ཡིན། ཐོབ་གོ་ས་དང་མཚན་སྙན་གྲགས་ལ་ཤི་འཐམ་རོ་འཐམ་བྱེད་པ་དེ་ཚོ་ཡང་དེའི་ཁོངས་སུ་གཏོགས། དེ་དག་ཐམས་ཅད་གཅིག་ནས་བརྩོན་པ་རྒྱག་མི་འདོད་མཁན་དང་གཉིས་ནས་གཞན་གྱི་མཐོང་ཆུང་ཡང་ཉོ་བར་མ་འདོད་པར་ཕྱི་དངོས་པོའི་རིན་ཐང་ཙམ་ལ་བརྟེན་ནས་རང་གི་ཞན་ཆ་ཡོད་ཚད་སྦེབ་པར་དགའ་བ་དེའི་རིགས་ཡིན། ཆེས་ཡིད་སྐྱོ་བ་ཞིག་ནི་ཕྱི་ནས་རྫིག་རྫིག་ཅི་འདྲ་བྱས་ཀྱང་དོན་ལ་དེ་དག་ཐམས་ཅད་རང་ལ་ཡིད་ཆེས་མེད་པའི་མི་དང་རང་ལ་རེ་ཐག་ཆད་པའི་མི་ཡིན་པས། དེ་དག་གི་མི་ཚེའི་བདེ་སྐྱིད་ནི་ནམ་ཡིན་ཡང་གཞན་གྱི་ངོ་མདངས་དཀར་ནག་འཚོས་པ་ལས་བྱུང་དགོས་པ་དེའོ།།