རང་བྱུང་གི་བྲན་གཡོག་ཏུ་འཁོར་བའི་

ཅི་ཞིག་ལ་མི་རིགས་ཀྱི་བདེ་སྐྱིད་ཐམས་ཅད་དེ་འདྲའི་རྒྱུན་མི་བརྟན་པ་ཞིག་ཡིན་དགོས་པ་རེད། ཅེས་པའི་དྲི་བ་འདི་སེམས་ཁམས་རིག་པའི་ངོས་ནས་ཧ་ཅང་གི་དྲི་བ་གལ་ཆེ་བ་དང་ལན་རྙེད་དཀའ་བ་ཞིག་ཡིན་པར་བཤད། འོན་ཀྱང་མིའི་རིགས་ཀྱིས་གནས་སྐབས་དང་སྐད་ཅིག་མའི་བདེ་སྐྱིད་ཙམ་པོ་དེ་ཐོབ་ཕྱིར་དུ་ཤི་འཐམ་རོ་འཐམ་བྱ་དགོས་པ་ཡང་ཅི་ཞིག་གིས་རྐྱེན་ནམ། ཡོད་ཚད་གནས་སྐབས་ཀྱི་བདེ་སྐྱིད་ཙམ་པོ་བ་དེའི་དབང་དུ་ཤོར་འགྲོ་བ་དེ་ཡང་ང་ཚོའི་རྣམ་དཔྱོད་ཀྱིས་མ་འདང་བ་ཡིན་ནམ། ལས་སླ་བར་བཤད་ན། ང་ཚོ་མང་ཆེ་བས་ཆང་འཐུང་ན་མཆིན་པར་གནོད་པ་དང་དུ་བ་འཐེན་ན་གློ་ནད་འབྱུང་བ་སོགས་ཀྱི་མཇུག་འབྲས་མི་ལེགས་པ་དེ་དག་ཤེས་བཞིན་དུ་ད་དུང་དེ་དག་གི་སྐད་ཅིག་ཙམ་ལ་ཕྱིན་པའི་སྐྱིད་སྣང་དེ་འཚོལ་ཕྱིར་བདེ་ཐང་སྣང་མེད་དུ་དོར་འགྲོ་བ་དེ། ང་ཚོའི་ཤེས་པ་གནད་དུ་མ་གནས་པས་ཡིན་ནམ་ཅི་ཞིག་ལགས། དེ་དག་ལས་བྱུང་བའི་སྐྱིད་སྣང་ནི་སྐད་ཅིག་ཙམ་ལས་འཇའ་ལྟར་ཡལ་འགྲོ་ཡང་། ང་ཚོ་སྔར་བཞིན་དེ་དག་གི་བསླུ་བྲིད་ཀྱི་དབང་དུ་ཤོར་འགྲོ་བ་འདི་བསམ་ན། ང་ཚོ་ནི་ཇི་འདྲའི་འགུག་སླ་བ་ལ། ཉམ་ཆུང་བ་ལ། གཡོ་འགུལ་ཐེབས་སླ་བ་ལ་སྙམ་པ་ཞིག་མི་ཡོང་ངམ། དེ་བཞིན་ང་ཚོས་བདེ་ཐང་ལ་གནོད་པའི་དེང་སྐབས་ཀྱི་ཟས་རིགས་མང་བོའི་ཉེས་སྐྱོན་མཐའ་དག་ཤེས་བཞིན་དུ་གད་སྙིགས་དང་འདྲ་བའི་ཁ་ཟས་དེ་དག་ཅི་འདོད་ཀྱིས་ལོངས་སྤྱད་འགྲོ་བ་འདི་ཡང་ལྕེ་ཤེས་ཀྱི་ཞིམ་སྣང་སྐད་ཅིག་མ་དེ་འཚོལ་ཕྱིར་མ་ཡིན་ནམ། ང་ཚོ་ད་དུང་དེ་ལས་གཞན་གྱི་མཐའ་ཡས་པའི་གནས་སྐབས་ཀྱི་བདེ་སྐྱིད་གང་མང་ཞིག་གི་བྲན་གཡོག་ཏུ་ཚུད་ཡོད་ལ། མ་འོངས་པ་ན་ཡང་འཆིང་རྒྱ་དེ་ལས་ཐར་བར་དཀའོ།། འཆིང་རྒྱ་དེ་དག་ལས་མ་ཐར་བ་དེ་སྲིད་དུ་སྡུག་བསྔལ་སྣ་ཚོགས་ཀྱིས་གཙེས་ཡོང་བ་ཡང་ཆོས་ཉིད་ཡིན་པས། འདི་ལ་འཁོར་བའི་འཁོར་ལོ་བར་མེད་དུ་འཁོར་བ་ཟེར་རམ། བསམ་ཞིང་བསམ་ན་དངོས་གནས་ང་ཚོའི་བྱ་སྤྱོད་ཕལ་ཆེ་བ་ནི། ཇི་འདྲའི་དགོད་བློ་བ་ཞིག་གོ།