དེབ་འདི་ལས་དེང་སྐབས་བྱིས་པ་ཚོའི་ལག་ནས་ཁ་པར་ལོན་དཀའ་བའི་གནད་དོན་དེ་ཇི་ལྟར་སེལ་བའི་ཐབས་ལམ་འགའ་བཤད་འདུག་པས། དེ་ནི་ཤིན་ཏུ་ཁ་ཚ་དགོས་གཏུགས་ཀྱི་དོན་བྱ་རང་ཆགས་འདུག་ན་དེའི་སྐོར་རགས་ཙམ་སྤྲོ་འདོད་སྐྱེས།
བྱིས་པ་ཚོ་ཁ་པར་དང་རིང་དུ་གྱེས་ཐབས་དང་པོ་དེ། ཁྱིམ་བདག་ཚོ་རང་རང་ཁ་པར་ལ་གཡེང་མཚམས་བཞག་སྟེ། བྱིས་པའི་མི་གཔེར་འོས་པའི་དོན་ལྡན་གྱི་བྱ་བ་གཞན་དག་ལ་ཅི་ཐུབ་ཀྱིས་འཇུག་དགོས་པ་དེ་རེད། མ་གཏོགས་ཁྱིམ་བདག་རང་རང་སོ་སོ་ཁ་པར་དང་ལུས་དང་གྲི་མ་བཞིན་དུ་འགྲོགས་ཏེ། བྱིས་པ་དག་ཁ་པར་གྱི་འགུག་ཤུགས་ལས་ཐར་དགོས་ཟེར་ན་སྤྱང་ཀའི་རྣ་བར་ཆོས་བཤད་ཀྱི་དཔེ་ལས་མེད་པར་བཤད་དོ།།
གཉིས་པ་དེ་ཁྱིམ་བདག་ཚོའི་ངོས་ནས་བྱིས་པ་ཚོ་ཁ་པར་དང་རོལ་རྩེད་ལ་དགའ་ཞེན་ཆེ་བ་དེར་བསམ་ཤེས་གནངས་ཐུབ་དགོས་ལ། སྐབས་དེར་རང་ཉིད་ཀྱང་ཁ་པར་གྱི་བསླུ་བྲིད་ཀྱི་དབང་དུ་ཤོར་འགྲོ་བའི་དོན་དངོས་རང་བཞིན་དེ་ཡང་བྱིས་པ་ཚོའི་མདུན་ནས་སྦ་གསང་མེད་པར་བཤད་ཐུབ་དགོས་པ་དེ་རེད། དེ་ལྟར་ཁོ་ཚོའི་འཇིག་རྟེན་ལ་ཇི་ཙམ་བསམ་ཤེས་བྱ་ཐུབ་ན། དེ་ཙམ་གྱིས་ནི་བྱིས་པ་ཚོས་ཀྱང་ཁྱེད་ཀྱི་བསམ་འཆར་ལ་དོ་སྣང་བྱས་ཡོང་།
གསུམ་པ་དེ། བྱིས་པ་ཚོར་ཅི་ནུས་ཀྱིས་རང་བྱུང་ཁོར་ཡུག་གི་པང་དུ་ལོག་པར་བརྩོན་པ་དེ་རེད། གསལ་བར་བཤད་ན་བྱིས་པ་ཚོ་རི་མཐོ་ས་དང་སྤང་ཡངས་ས། ནགས་ཀླུང་སྟུག་ས། རླབས་ཕྲེང་ཆེ་སའི་མཚོ་འགྲན་སོགས་སུ་ཁྲིད་དེ། རང་བྱུང་ཁམས་ཆེན་མོའི་མཛེས་དཔལ་ལ་ལོངས་སྤྱོད་པའི་གོ་སྐབས་མང་བོ་སྤྲོད་རྒྱུ་དེ་ཡིན། དེ་ལྟར་བྱིས་པ་ཚོར་དོན་དངོས་ཀྱི་བདེ་སྐྱིད་ནི་རང་བྱུང་ཁམས་ཆེན་མོའི་པང་དུ་ལོག་སྟེ། རྩེ་དགའི་དཔལ་ལ་རོལ་བ་དེ་ཡིན་པར་ངོ་སྤྲད་པ་ན་བྱིས་པ་ཚོས་ཀྱང་འཆར་ཤེལ་ངོས་ཀྱི་འཇིག་རྟེན་དེ་ནི་སྒྱུ་མའི་ཆོ་འཕྲུལ་ལྟ་བུའི་འཇིག་རྟེན་རྫུན་མ་ཞིག་ཡིན་པར་ངོ་འཕྲོད་ཡོང་ངོ་།། དེ་བཞིན་བོད་པའི་ཁྱིན་བདག་ཚོས་ཀྱང་བྱིས་པ་ཚོར་མཐའ་ཡས་པའི་སྤང་ཐང་ནས་རྟ་མཆོག་གི་བང་རྩལ་འགྲན་དུ་འཇུག་པ་སོགས་འབྲོག་པའི་རྩྭ་ཐང་གི་ཐུན་མོང་མ་ཡིན་པའི་རྩེ་རིགས་སྣ་ཚོགས་ཀྱི་ཀློང་དུ་འཁྲིད་ཐུབ་ན་། བྱིས་པ་ཚོ་ཡང་འཆར་ཤེལ་ངོས་ཀྱི་སྒྱུ་མའི་རོལ་རྩེལ་དང་རྒྱང་དུ་གྱེས་པར་ཕན་ཐོགས་བླ་མེད་འབྱུང་བར་ངེས་སོ།།
བཞི་བ་ནི། བྱིས་པ་ཚོར་ཁ་པར་ལ་གཡེང་དྲག་ན་དོན་དངོས་ཀྱི་གནད་དོན་གང་ཡོད་ཇི་བཞིན་བརྗོད་དེ་གོ་བརྡ་སྤྲོད་པ་ལས། བཙན་གྱིས་སློབ་སྟོན་མི་བྱེད་པ་དེ་རེད། དོན་དངོས་ཀྱི་གནད་དོན་གང་ཡོད་ལྷོད་ལ་བབས་ནས་བརྗོད་རྒྱུ་ཤིན་ཏུ་གལ། མ་གཏོགས་བྱིས་པ་ཚོའི་ལག་ནས་ཁ་པར་བཙན་འཕྲོག་བྱེད་པ་དང་འཇིགས་སྐུལ་བ། སྡིགས་མོ་་བྱེད་པ་སོགས་ཀྱིས་ཅི་ཡང་མི་ཕན་པ་མ་ཟད། བྱ་སྤྱོད་དེས་དག་གིས་ནི་ཐ་ན་བྱིས་པ་ཚོར་སྔར་ལས་ཀྱང་ཁ་པར་ལ་དགའ་ཞེན་ཇེ་དྲགས་སུ་གཏོང་བའི་ཉེན་ཁ་ཡང་ཆེན་པོ་ཡོད་དོ།། དེ་བས་ཁ་པར་ལ་ཉེས་སྐྱོན་གང་ཡོད་དྲང་བོར་བརྗོད་དེ་བྱིས་པ་རང་སྟེང་ནས་གནད་དོན་གང་ཡོད་ལ་བསམ་གཞིགས་ནན་ཏན་གཏོང་བའི་གོ་སྐབས་སྤྲོད་ཤེས་རྒྱུ་དེ་ཆེས་གལ་གནད་ཆེ་བར་བརྗོད།
ལྔ་བ་ནི། བྱིས་པ་དང་ལྷན་དུ་ཁ་པར་རྩེ་བའི་དུས་ཚོད་དང་སློབ་གཉེར་སོགས་ཀྱི་འཆར་གཞི་གཏན་འབེབས་བྱེད་པ་དེ་རེད། ངེས་པར་དོ་སྣང་བྱ་དགོས་པ་དེ་འཆར་གཞི་ཙི་ལྟར་བཟོ་བར་བྱིས་པར་བསམ་འཆར་འདོན་དུ་འཇུག་པ་དང་གྲོས་མོལ་བྱས་ཏེ། མཉམ་དུ་ཐག་གཅོད་གནང་དགོས། འཆར་གཞི་གང་ཞིག་བཟོ་བར་བྱིས་པ་ཁོ་རང་ཡང་མཉམ་ཞུགས་བྱས་པའི་ཚད་གཞི་ཇི་ཙམ་མཐོ་ན་དེ་ཙམ་གྱིས་བྱིས་པས་འཆར་གཞི་དེ་རྒྱུན་སྐྱོང་བྱེད་པར་ཕན་ཐོགས་མི་འདྲ་བ་ཞིག་འབྱུང་ངེས་སོ།། ཡང་ལན་རེར་བྱིས་པ་དག་འཆར་གཞི་ལྟར་དུ་མི་འགྲོ་བ་ཡང་སྲིད་པས་སྐབས་དེར་ཡང་བསྐྱར་མཉམ་དུ་འཆར་གཞི་གཞན་ཞིག་གཏན་འབེབས་བྱ་ཤེས་དགོས་སོ།། གང་ལྟར་མཚམས་མཚམས་རེ་བ་ལྟར་འགྲོ་མི་ཐུབ་པ་དེ་རྒྱུན་ལྡན་གྱི་གནས་སྟངས་སམ་སློབ་སྦྱོང་གི་བརྒྱུད་རིམ་ཞིག་ཡིན་པས་ཕ་མ་ཚོས་ཀྱང་གྲ་སྒྲིག་སྡུག་ས་ནས་བྱས་ཏེ། བྱིས་པ་དང་ལྷན་དུ་རྒྱུན་སྐྱོང་མཐའ་ཆོད་པ་གནང་རྒྱུ་ནི་གནད་དུ་ཆེའོ།། ཡང་བྱིས་པ་འཆར་གཞི་དང་འགལ་ཚེ། ཁྱེད་རང་ཁ་དོན་ཚིག་ལ་མི་གནས་པ་དང་ཡིད་རྟོན་མི་རུང་བའི་མི་ཞིག་ཡིན་པ་སོགས་ཀྱི་མི་གཞི་ལ་གནོད་པའི་སྐད་ཆ་དག་ནི་ཕ་མ་ཚོས་ངོས་ནས་ནམ་ཡང་བཤད་མི་རུང་བའི་སྐོར་རོ།། དེ་ལས་ཐེངས་འདིར་ཕམ་ཁ་ཉོས་ཀྱང་ཐེངས་རྗེས་མར་ཁྱོད་ཀྱིས་རྒྱལ་ཁ་ལོན་པར་ཨ་ཕ་བདག་ལ་ཡིད་ཆེས་བརྟན་པོ་ཡོད་ཟེར་བ་སོགས་ཀྱི་སེམས་ཤུགས་དང་སྐུལ་ཅག་ཐེབས་པའི་སྐད་ཆ་བཤད་ཤེས་རྒྱུ་དེ་ཡང་བྱིས་པའི་འཇོན་ནུས་གསོ་སྐྱོང་བྱེད་པར་ཧ་ཅང་མཁོ་གལ་ཆེ་བའི་ཐབས་མཆོག་ཞིག་གོ ། མདོར་ན་གོང་གསལ་གྱི་བྱེད་ཐབས་དེ་དག་བརྟེན་ནས་བྱིས་པ་ཚོས་རང་ཉིད་ལ་དབང་བའི་ཡང་དག་པའི་ལམ་བུ་དེ་རྙེད་ཐུབ་པའི་རེ་བ་ཅི་བས་ཀྱང་ཆེའོ།།
网友评论