དྲིན་ཆེན་མ།

སྡེ་དགེ་ཡེ་ན།

མ་དྲིན་ཆེན།

འབྲི•དྲང་སྨྱུག

མཐིང་སྨུག་སྦྲ་ནག་གྲུ་བཞིའི་བར་གསེང་ནས།།

མགྲིན་གླུ་བཞོ་དབྱངས་སྙན་མོ་ལེན་ཞོར་དུ།།

འབྲི་མོ་གཡང་ལྷའི་འོག་ནས་འོ་མ་འཇོ།།

འཛུམ་མདངས་རྣལ་མས་ཕྱུགས་པའི་ཨ་མ་ཞིག །

ཟླ་དགུ་ཞག་བཅུ་ཁྱེད་ཀྱི་ཁོག་དུ་གནས།།

ན་ཚོད་མ་ཟིན་ཁྱེད་ཀྱི་རུང་དུ་འཁྱུད།།

ཟུངས་བཅུད་འོ་མས་གསོས་ཤིང་ཁ་ཟས་བྱིན།།

མི་ལུས་རིན་ཆེན་ཐོབ་འདི་ཨ་མའི་དྲིན།།

ཁ་ལུད་མཆི་མ་མི་གཙང་ཁ་ཡིས་ཕྱིས།།

ཁ་འཇམ་ཚིག་སྙན་འབོད་བཞིན་ངུ་ཁ་ལོང་།།

རང་གི་ཚེ་སྲོག་ལས་ཀྱང་བུ་ལ་གཅེས།།

ད་ལྟའི་འཚོ་བསྡོད་ལེགས་པ་ཨ་མའི་དྲིན།།

ལུས་ཐོག་ལྭ་བ་དང་པོ་ཨ་མ་བཀོན།།

ཤེས་རིག་སྒོ་མོ་ཐོག་མ་ཨ་མས་ཕྱེས།།

དཔལ་འབྱོར་ཡོན་བདག་དང་པོ་ཨ་མས་བྱས།།

དྲིན་ཆེན་ཨ་མའི་དྲིན་ལ་ཟད་མཐའ་མེད།།

བསྐལ་བཟང་སངས་རྒྱས་སྟོང་གི་བྱིན་རླབས་དང་།།

སླུ་མེད་ལས་འབྲས་གཙང་མའི་བདེན་སྟོབས་ཀྱིས།།

དྲིན་ཆེན་ཕ་མའི་དྲིན་ལེན་འཕྲོད་པ་དང་།།

སྲོག་ལྡན་འགྲོ་བའི་བསམ་དོན་འགྲུབ་པ་ཤོག།

འཛམ་གླིང་མ་ཡུམ་དུས་ཆེན་འདི་དང་སྟུན།།

གནམ་འོག་སེམས་ཅན་ཡོངས་ཀྱི་ཡུམ་ཆེན་ལ།།

བཀྲ་ཤིས་སྨོན་ཚིག་ཁ་གཡང་འདི་ཡིས་མཐུས།།

ཨ་མའི་ཚེ་ཐག་རིང་བའི་ཤིས་པ་བརྩོལ།།