དཀའ་ལས་སྔོན་ལ་རྒྱག

དགའ་སྔ་ན་སྡུག་སྔ། སྡུག་སྔ་ན་སྐྱིད་སྔ་ཞེས་པའི་ལེགས་བཤད་འདིས་ནི། ཆུང་དུས་ནས་སློབ་གཉེར་ལ་མི་འབད་པར་རྣམ་གཡེང་དང་ལེ་ལོའི་སྐྱིད་སྣང་ཙམ་པོའི་ངང་ནས་དུས་འདའ་བར་བྱས་ན། ཆེས་དཀའ་སྡུག་ཆེ་བའི་ཉི་མ་ནག་པོ་དེ་རྗེས་ནས་ཚེས་ཡོང་ཞིང་། མཐོང་ཆུང་དང་ཟུར་ཟས་གང་བའི་ཉམ་ང་བའི་འཚོ་བ་སྐྱ་བོ་དེ་ཡང་ཚེ་སྨད་ལ་རོལ་དགོས་པར་བསྟན་འདུག་ལ། སྔོན་དུ་སློབ་གཉེར་གྱི་དཀའ་བ་དང་དུ་བླངས་ཤིང་བརྩོན་འགྲུས་ཀྱི་ངལ་བ་ཁྱད་དུ་བསད་དེ། ཆེས་རིང་ཐང་ལྡན་ཞིང་ནུས་ཆོད་ཆེ་བའི་གཞོན་དུས་ཀྱི་དུས་ཚོད་བཟང་བོ་དེ། དཀའ་སྡུག་གི་ཀློང་ལ་གཏོར་ཐུབ་ཅིང་། དཔེ་ཀློག་གི་ཉིན་སྲིབ་ལས་ཟད་ནུས་ན། སྐྱིད་ཉི་མ་འདྲ་བོ་དེ་རྗེས་ནས་ཤར་ངེས་པ་ཡང་གསལ་བར་བཤད་འདུག་པས། རང་རང་སོ་སོས་མི་ཚེའི་སྐྱོ་གར་རིང་མོ་དེ་ཚེ་སྨད་ལ་འཁྲབ་པར་མི་འདོད་ན། སྔ་ས་ནས་གོ་སྐབས་དམ་འཛིན་གྱིས་སློབ་གཉེར་ལ་འབད་པའི་དཀའ་བ་དང་དུ་ལེན་ཤེས་དགོས་པ་འདི་ཇི་འདྲའི་གནད་དུ་ཆེ་བ་ལ། དངོས་གནས་བཤད་ན་ཆུང་དུས་སུ་སྡུག་ཐེག་ན་མི་ཚེའི་རིན་ཐང་དེ་རང་བཞིན་གྱིས་མངོན་དུ་གྱུར་ཏེ། སྐྱེ་བ་རླབས་ཆེ་ཞིང་ཤི་བ་གཟི་བརྗིད་ཆེ་བའི་གྲུབ་འབྲས་ལེགས་པོ་དེ་ཡང་ཡུན་གྱིས་ལོངས་སུ་སྤྱད་ཆོག་པ་ཞིག་ཅི་ལ་མིན། དེ་བས་ཕྱི་ཚུལ་ནས་ཉིན་རྒྱུན་སྤྲོ་གསེང་ལ་རོལ་ཏེ། རྒྱས་སྤྲས་ཀྱི་འཚོ་བའི་ཀློང་ན་སྐྱིད་སྣང་གིས་དུས་འདའ་བཞིན་པའི་པའི་སྐྱེ་བུ་དག་གིས་ནི། རིང་བོ་མི་ཐོག་པར་མི་ཚེའི་རིན་ཐང་དང་དོན་སྙིང་ཡོད་ཚད་ཆུ་ལ་བསྐུར་ཏེ། ཉམ་ང་བའི་སྐྱོ་གར་རིང་མོ་ཞིག་འཁྲབ་ངེས་པའི་ཚུལ་དེ་ཧ་གོ་བར་བྱས་ཏེ། ད་ལྟ་ངན་མངོན་གྱི་འཚོ་བའི་ཀློང་ན་སློབ་གཉེར་ལ་འབད་བཞིན་པའི་རང་ཉིད་ཀྱི་རིན་ཐང་དངོས་དེ་ངོ་འཕྲོད་རྒྱུ་དེ་ཡང་ཤིན་ཏུ་གལ་ཆེའོ།།