——“房老虎”额我，也有老鬼失撇额辰光。
[图片]
一年勿到就输脱近百万，我可木有到奥门去，也木有去赌球，我是买了一套房子，一年勿到降了近百万，等于输脱了东京额一套房子。白相房子三十年余，借土地财政红利额光，总算咸鱼翻身脱贫奔了小康。想勿到年近古稀额我，还要吃一记家生，真是老鬼失撇，阴沟里翻船。
想当初，港港李超人跑路，我就预感到，房子勿好再白相了，吃红利额好日节要到头了。可是，人天生额弱点就是一个字“贪”！李超人跑了，房子勿跌，反而来一把上杨，国家只好下猛药来降降温。迪帖猛药结棍了，除脱滑脚额SOHO石头潘们，恒、万等地产额航空母舰都趴下了，上吐下泻，还伤及了上，下游搭界额私人老板。可是，阿拉表面上还是在限购，限贷，凭票供应，我手里拿了额房票哪能肯放弃？吃药就在所难免了。
现在想想真是有点懊悔！勿过，比起老早心态要好较关，人家衡、富、长额花园洋房一跌就是几千万。老早我搓麻将，一场麻将输脱一个月额薪水，要懊悔了勿得了，夜里厢做梦，都会做到:白板为啥勿吊？去吊红中，结果一炮三响搞承包。想想也蛮牢卵额，拿房子与麻将比，脑子坏脱了。吊白板与和吊红中，一付牌额辰光，改过来就可以了，否则，就叫侬一夜回到解放前。猪头三勿，侬要拿跌下去额房子再捞起来;把从洋房里润了额朋友再请转来，估计吃野山参、打强心针也木有卵用额。所以讲，“房老虎”也有趴下额辰光，愿赌服输，心态要好。
网友评论