曾幾何時希望廣州可以多幾間live house，唔駛吓吓都喜窩踢館。但係到咗今時今日live house遍地，甚至試過住喺行兩步路就到TU凸嘅的地方成年咁耐，反而就一次都冇去過。大概係隨住年紀漸長，live show對我嘅吸引力已經越來越細，已經唔係好記得十𡃁歲嗰陣，甚至會自己一條友特登飛去第二個城市睇show，排半日隊入場（大佬，我講緊睇band show唔係追EXO喎）都在所不計嗰種熱情。我隻青春雀仔，你係唔係已經畀第二個收服咗……？
距離對上一次睇show都有一年半載，更加唔知幾耐冇試過連踩兩場，今次連續兩晚參戰LMF同World's End Girlfriend，攰就預咗，不過冇諗過嘅係，竟然係WEG會攰過LMF……
皆因WEG嘅live音量係可以用「地動山搖」嚟形容。開場第一首已經炸到我耳仔轟轟聲耳鳴，音浪好似排山倒海噉兜口兜面冚埋嚟，簡直震都我五臟六腑都移晒位。跟住我望望周圍，果然有唔少人被嚇窒，即刻從前排退後離開個臺附近，甚至可以話有咁遠走咁遠…… 至於我本人，只可以話好在第三首就係『100 years of choke』，如果唔係我應該都撐唔到去最後出嘅飛佛『you』。後尾一齊去睇嘅朋友嘅朋友同我講，「我諗住佢哋個style係好浪漫㗎嘛，估唔到live會咁嘈！」雖然我唔覺得WEG應該用浪漫嚟形容，但係呢個刺激程度，其實……我都接受唔到。
總之WEG live體驗就係一個字「炸」。列入我「心血少啲就唔好搵命搏去聽嘅live」list第一位。（2012其實搞過China tour，當時飛都買埋，不過臨時話政治因素延後，最後都係搞唔成。）頭先check一check，好似下個月都有國內場，如果場地設備跟得上，應該可以令唔少人幻滅。
海報 style同實際情況簡直係「圖文不符」
至於嗰班年紀接近半百但係依然憤怒嘅lazy佬，我作為一個身經百戰嘅腦殘粉，其實都係得一句
「好波」。
网友评论