འབའ་ཡུལ་བུ་མོ།
སྣང་བ་འཇིག་རྟེན་གཟིམས་པའི་མཚན་ལྗོངས་ན་ཡོད་དམ།།
མིག་ཆུ་འཁྱག་འདར་རྒྱག་པའི་དགུན་གཞུང་ན་ཡོད་དམ།།
བརྩེ་བ་གནམ་ས་གཉིས་ཀའི་ལྟེ་བ་ན་ཡོད་དམ།།
ཡང་སྙིང་ང་ཡི་འབྲོག་མོ་གང་ཞིག་ན་ཡོད་དམ།།
ལ་གཞས་སེམས་ཀྱིས་བསྐྱོར་བའི་གྲོང་ཚོ་ན་ཨེ་ཡོད།།
སྨྲེང་བ་ཤ་ལ་དྲུད་པའི་འཁོར་བ་ན་ཨེ་ཡོད།།
སྙིང་གཏམ་མགུར་ལ་བརྒྱུས་པའི་ཕྱི་ནང་ན་ཨེ་ཡོད།།
དུང་བ་སེམས་ཀྱི་འབྲོག་མོ་ཐག་ཉེ་ན་ཨེ་ཡོད།
འབྲོག་མོ་འཇིག་རྟེན་སྣང་བའི་དཔེ་རྒྱན་དུ་བཀོད་ཡོད།།
འབྲོག་མོ་ཡིད་ལ་བཞག་ནས་མི་ཚེ་ལ་ཉན་ཡོད།།
འབྲོག་མོ་སྲིད་པ་འཁོར་བའི་ལྷ་མོ་ཞིག་ཡིན་ནམ།
འབྲོག་མོ་དགའ་སྐྱོ་གླན་སའི་མི་མོ་ཞིག་ཡིན་ནམ།།
དྲན་པ་ཤ་རྗེན་གཞས་ལ་འབྲོག་མོ་ཡིས་འདེབས་རོགས།།
ཚོར་འདུ་ཆགས་སྡང་གླུ་ལ་འབྲོག་མོ་ཡིས་གདམས་རོགས།།
དོན་དམ་མཐུན་པའི་གླུ་ཞིག་འབྲོག་མོ་ཡིས་ལེན་རོགས།།
ང་ཡི་སྨྲེང་བ་དམར་རྗེན་སྙིང་གཏམ་གྱིས་སྐྱོར་རོགས།།
འབྲོག་མོ་སྤང་ཁའི་མེ་ཏོག་གློ་དམར་དེ་ཨེ་ཡིན།།
འབྲོག་མོ་རྨ་ཆུའི་རླབས་ཀྱི་རོལ་མོ་དེ་ཨེ་ཡིན།།
འབྲོག་མོ་འོད་ཀྱི་འཇའ་ཚོན་རི་མོ་དེ་ཨེ་ཡིན།།
འབྲོག་མོ་དཔྱིད་ཆར་འགོ་མའི་བསིལ་རླུང་དེ་ཨེ་ཡིན།།
སེམས་ཀྱི་ཕྱི་ནང་འབྲོག་མོའི་ཞེ་འདང་ཀྱིས་ཟགས་སོང་།།
ཡང་ན་དགའ་སྐྱོ་གཤིས་ཀ་འབྲོག་མོ་ཡིས་བསྩལ་སོང་།།
སྙིང་ཆུང་དམར་པོ་འོ་ཞིག་འབྲོག་མོ་ཡིས་བྱས་སོང་།།
མ་ཟད་མིག་ཆུའི་ཡིག་ཆུང་འབྲོག་མོ་ཡིས་བྲིས་ཡོད།།
网友评论