ད་ལོའི་རྡུང་ལེན་འགྲན་བསྡུར་གྱིས་

ད་ལོའི་རྡུང་ལེན་འགྲན་བསྡུར་ལ་སྔར་ལས་ལྷག་པའི་ཡར་རྒྱས་དང་འགྱུར་ལྡོག་ཆེན་པོ་འདུག གར་སྟེགས་ཆེ་ཆུང་སྣ་ཚོགས་རིམ་གྱིས་བརྒྱུད་དེ་མཐའ་མཇུག་གི་རྟིང་རྩོད་ནི། མཚོ་སྔོན་ཞིང་ཆེན་ལུས་རྩལ་ཁང་ཆེན་མོའི་ནང་དུ་སྤེལ་བའི་རྣམ་པ་དེ་དང་། དགེ་རྒན་ཕན་ཚུན་བར་གྱི་སློབ་མ་དག་བསྡུར་རེས་བྱེད་པ། རྒྱལ་ཕན་གྱི་དབྱེ་བ་དབྱེད་སྐབས་དགེ་རྒན་ཚོ་རྐྱང་བས་འོས་ཤོག་འཕེན་པ་མ་ཡིན་པར་ལྟད་མོ་བའི་ཁྲོད་ཀྱི་དཔྱད་འདེམས་ཚོགས་པ་དག་གིས་ཀྱང་བཟང་ངན་གྱི་སྐར་མ་བརྒྱབ་ཆོག་པ་ལ་སོགས་པའི་རྣམ་པ་གསར་བའི་སྒྲིག་གཞི་མང་བོ་ལག་ལེན་དུ་བསྟར་གྱིན་འདུག་ན། དེ་དག་ཀྱང་དགའ་འོས་པའི་སྣང་བརྙན་གསར་བ་རེད། དེ་ལས་ཀྱང་ཆེས་བཟང་བའི་ཁ་ཕྱོགས་མ་འདྲ་བ་ཞིག་ནི་རྟིང་རྩོད་ལ་ཚུད་པའི་གླུ་བ་ཐམས་ཅད་ཀྱིས་རོལ་ཚོགས་མཉམ་འབྲེལ་གྱིས་རང་གི་གླུ་ངག་གི་སྒྱུ་རྩལ་ཕྱི་རུ་མངོན་དགོས་པ་དེ་རེད། དེས་ནི་བོད་ཀྱི་རོང་འབྲོག་མང་ཚོགས་ཀྱི་ལྟད་མོ་བ་ཚོར་སྔར་བྱུང་མྱོང་མེད་པའི་སེམས་ཚོར་དང་རེ་བ་གསར་བ་མོད་པོ་ཅིག་ཅར་དུ་སྟེར་ངེས་ལ། བོད་ཀྱི་གླུ་ངག་སྒྱུ་རྩལ་འཛམ་གླིང་ཅན་དུ་ཁ་ཕྱོགས་པའི་གོམ་སྟབས་དང་པོ་དེ་ཡང་མཚོན་ནུས་སོ།། གཞན་གར་སྟེགས་བཀོད་སྒྲིག་བྱ་ཚུལ་དང་གློག་འོད་རྒྱག་ཕྱོགས་སོགས་ཀྱི་ཆ་ན་མི་འདང་ས་མང་ཞིང་འགྲན་ཞུགས་པ་དག་ཐད་ཀར་ཐད་ཀར་གཅིག་རྗེས་གཅིག་མཐུད་ཀྱིས་བཀོད་སྒྲིག་བྱ་མི་ནུས་པར་བར་མཚམས་རེ་ནས་ཚང་མས་ཁུ་སིམ་མེར་སྒུག་དགོས་པ་ལ་སོགས་པའི་གནད་དོན་མང་བོ་ཞིག་ད་དུང་སྔར་བཞིན་ལྷག་འདུག་ནའང་། ད་སྐབས་ནི་འཚང་ལོངས་ཀྱི་གོ་རིམ་ཁྲོད་ན་ཡོད་པས་དེ་དག་ཐམས་ཅད་ལ་ཡང་གུ་ཡངས་དང་བསམ་ཤེས་བྱ་ལོས་དགོས་སོ།། མ་འོངས་པར་ཡུན་གྱིས་འཐུས་སྒོ་ཇེ་ཚང་དང་སྒྲིག་གཞི་ཇེ་དམ་། གཞི་རྒྱ་ཇེ་ཆེ། ཚད་གཞི་ཇེ་མཐོར་འགྲོ་བའི་ཡིད་ཆེས་བླ་མེད་ཡོད། ལྟད་མོ་བ་དཀྱིས་མ་ཞིག་ཡིན་པའི་ངོས་ཐད་ནས་ཐེངས་འདིའི་འགྲན་བསྡུར་ནི་བོད་ཁུལ་ལ་མཚོན་ན་ཅུང་ཙམ་ཡར་རྒྱས་ཀྱི་རྣམ་པ་དང་ཐོལ་བརྒལ་རང་བཞིན་ཅན་དུ་མཐོང་སོང་བས། ཡིད་ཚིམ་ཡོད།