༄༅། །ཁེར་ལབ།
མི་ཚོགས་ཀྱི་ཁ་རླངས་སྐྱུར་བོ།།
ཁ་ངོ་ཡི་ཁུགས་སོར་འཐིབས་དུས།།
ཡ་ཁོག་གི་གློ་སྙིང་མཆིན་གསུམ།།
མ་བཅད་ཀྱང་བཅད་དང་འདྲ་སོང་།།
རང་སེམས་ལ་སྡུག་ཅིག་འཁྱིལ་དུས།།
ཆུང་མ་ཡི་སྙིང་གཏམ་མ་གཏོགས།།
ཨ་གསར་གྱི་ཁ་སྟབས་ཆེ་བའི།།
ཉེ་རིང་ཚོ་གང་དུ་བཞུགས་སམ།།
རྨི་ལམ་དེ་ས་ལ་ལྷུང་དུས།།
མི་ཁ་ཞིག་མགོ་ལ་བབས་སོང་།།
བཙན་བྱུང་གི་མི་ཁ་རྒོད་པོ།།
སུ་ཞིག་གིས་འགོག་རོགས་ཐུབ་བམ།།
ཕུགས་བསམ་ཞིག་རུམ་ལ་བཅུག་སྟེ།།
རྡོག་ལམ་འདི་རང་གིས་གཅོད་དུས།།
བདག་སེམས་འདི་དུམ་བུར་གཅོད་མཁན།།
སྡིག་ཅན་ཁྱོད་ཁོ་ན་ཡིན་ནོ།།
མུན་ནག་དང་འོད་སྣང་འདྲེས་པའི།།
འཇིག་རྟེན་གྱི་མི་ཡུལ་གྲོང་འདི།།
བླ་བཙག་དང་ལྐོག་གཡོ་འཐེན་སའི།།
མི་རྒྱུད་ཅིག་འཚོ་གནས་ཡིན་ནམ།།
网友评论