བསིལ་རླུང་ལྷོད་ཀྱི་ལྡེམ་པས་ཟླ་མཚན་འགྲམ་དུ།།
འོད་ཀྱི་བག་ཁང་ཞིག་གི་གྲུབ་གཟུགས་འཁྱག་པ།།
མི་ལོ་ཨ་ཐང་ཞིག་གི་སྨྲེང་བའི་འགྲམ་པགས།
པིར་རྩེའི་ཐང་དུ་འཁྱུག་པས་ཚོར་བའི་འཁུན་སྒྲ།།
འཛུམ་དེ་ཡིད་ནས་འཁྲུངས་བའི་སྡུག་གི་རྩ་བ།།
དགའ་སྐྱོའི་འཁུན་སྒྲ་བརྩེགས་པའི་ལོ་ཟླའི་ན་བུན།།
སྐྱབས་མེད་གཡེངས་སུ་བཏེག་པའི་མིག་ཆུའི་རླབས་ཕྲེང།།
རྟོགས་སྣང་སྐྱ་བོ་ཞིག་གི་སྡུག་གཞས་གྱ་གྱུ།།
སྐྱེ་བ་སྟོང་ཕྲག་བཞེས་པས་སྨྲེ་ངག་གསོན་པོ།།
ཆོས་ཉིད་བཙན་པོ་ཞིག་གི་རྒྱབ་གཟུགས་ཕྲེང་ནས།།
ཚེ་སྔོན་བུ་ལོན་ཆད་པའི་སྲོག་གི་དྭངས་མ།།
མ་དག་ལས་ཀྱི་སྡིག་འབྲས་སྡུག་ལ་སྨིན་སོང་།།
ཀྱེ་མ་ཤོག་དཀར་ངོས་ཀྱི་གྲུབ་གཟུགས་ནག་པོ།།
ཁྱོད་ཀྱིས་སུ་ཡིས་ཆེད་དུ་སྨྲེ་ངག་འདོན་སྲིད།།
ཉིད་ཀྱི་རྨི་ལམ་ཐང་གི་སྐྱོ་གར་འདི་ལ།།
ཁྱོད་ཀྱིས་ཁོ་མོའི་ཟོལ་དུ་མིག་ཆུ་སྦྱིན་རོགས།།
网友评论