རང་ལམ་རང་གིས་ཕྱེ།

འཇང་དགུན་ཆོས་ཀྱི་ཉིན་དགུ་སོང་ཚར། སང་ཉིན་ནི་འཇང་དགུན་ཆོས་ཀྱི་ཆེས་མཐའ་འཇུག་གི་ཉིན་མོ་རེད། ཐེངས་འདིར་ཉིན་དགུའི་རིང་ལ་རང་ཚོད་ཀྱིས་དཀའ་ལས་ཅུང་ཙམ་བསྐྱོན་པ་ཡིན། དམ་བཅའ་འདུག་པ་དང་རྟགས་གསལ་གཏོང་བའི་སྐབས་གང་ཡིན་ཡང་གོ་སྟབས་དམ་འཛིན་གྱིས་འབད་པ་ལྷོད་མེད་བྱས། བློ་སྐྱེད་དང་རིགས་ལམ་གསར་བ། ཉམས་མྱོང་དང་ཁ་ཕྱོགས་གསར་བ་རེ་འགའ་ཡང་རྙེད་སོང་བས་བློ་ཡིད་ཚིམ་ཡོད། མ་ཟད་ངེས་པར་བསྒྱུར་དགོས་པའི་རང་སྐྱོན་ཚ་བོ་ཁ་ཤས་ཀྱང་ངོ་འཕྲོད་པ་བྱུང་བས། དེ་ཡང་ཡར་རྒྱས་ཤིག་ཡིན་ལ། རང་ལ་བཅོས་བསྒྱུར་གཏོང་བའི་གོ་སྐབས་གལ་ཆེན་ཞིག་རེག་སོང་སྙམ་གྱིན་ཡོད། མདོར་ན་རང་ངོས་ནས་ཀྱང་འཇང་དགུན་ཆོས་ལ་ཞུགས་པའི་སྙིང་དགོས་ཕྲན་ཙམ་ལེན་ཐུབ་པ་བྱུང་བས་དུས་ཚོད་གཏོང་ཟད་དུ་མ་བཏང་ཟེར་བ་དེ་ཡིན་ནོ།།