འཛམ་གླིང་དཔེ་ཀློག་ཉིན་མོ་ལ་་་་་་

     དེ་རིང་འཛམ་གླིང་དཔེ་ཀློག་ཉིན་མོ་རེད། ཡང་གཅིག་བཤད་ན་རེས་གཟའ་ཉི་མ་རེད། དཔེ་ཀློག་ཉིན་མོ་འདིར་བུད་མེད་རྣམ་དག་ཅིག་གི  རང་དབང་མེད་པའི་དྲན་འཛིན་གྱི་སྒོ་མོ་ཡང་ཡང་བརྡུང་། བུད་མེད་དེ་ནི་ང་རང་དགའ་ས་དེ་རེད། ཡིན་ཡང་། ཕན་ཚུན་ལ་དེ་འདྲའི་རྒྱུས་མངའ་མེད་པས་འཁྲབ་སྟོན་བྱེད་པ་དང་ཀུན་ནས་མཚུངས། ཡིན་ནའང་ངའི་མོ་ལ་འཕྲིན་ཡིག་ཅིག་འབྲི་འགོ་བརྩམས།

     ཉེ་ཆར་སློབ་སྦྱོང་ལ་བྲེལ་འཚུལ་ཆེ་བའི་དུས་འདིར། ངས་   བསམ་གཞིག་གང་མང་ཞིག་བཏང་མཐར་སྐད་ཆ་འདི་ཅིས་ཀྱང་ཁྱོད་ཀྱི་སྤྱན་ལམ་དུ་ཕུལ་འདོད་ཀྱི་རྟ་ཕོ་གཤོག་ཐོགས་དེ་འཛིན་ཐབས་བྲལ་བས་འབྲི་དགོས་སོང་། གློ་བུར་དུ་ལབ་འོང་བའི་སྐད་ཆ་འདིས་ཁྱེད་རང་བློང་བློང་པོར་བཏང་འགྲོ་བ་བདག་གིས་སྔ་ས་ནས་ཤེས་ཡོད་མོད། འོན་ཀྱང་རྨི་ལམ་གང་ཞིག་དང་རེ་འདོད་གང་ཞིག་གི་ཕྱིར་སྐད་ཆ་འདི་ངེས་པར་ལབ་དགོས་སོང་པས་ཁྱེད་ཀྱིས་བདག་ལ་ལེ་བདའ་གང་ཡང་མེད་པར་སྨོན།

    ངའི་ཁྱེད་ཀྱི་ཕྱོགས་སུ་སེམས་པ་ཤོར་བ་དེ་ནི་ད་ལྟ་ཙམ་མ་ཡིན་པར་འདས་མ་ད་གསུམ་ལ་སེམས་སུ་ཉལ་སྙིང་གཏམ་གཤིན་པོ་དེ་ཡིན། ཁྱོད་ལ་དུངས་བའི་ཕྱིར་དུ། ཁྱོད་ཀྱི་དགའ་སྐྱོ་འདྲེས་མའི་དགོད་སྒྲའི་སླད་དུ། ས་དོག་མོར་རེ་བའི་ཞགས་པ་འཕངས་ཤིང་གནམ་སྔོན་པོར་སྤྲིན་གྱིས་རྒྱན་ཆ་བཏགས་དུས། ཁྱོད་ནི་མིག་མདུན་གྱི་ལམ་ཁ་དེ་ལས་གཞན་གང་ལའང་བསམ་བློ་མི་གཏོང་བའི་མི་ཞིག ''དེ་གླེང་བའི་དུས་ཚོད་མེད། ཁྱེད་ཀྱི་བཤད་པ་དག་ལ་ང་ཡིད་མི་ཆེས་''ཞེས་བཤད་དུས། ངའི་ཐབས་བརྒྱ་ཇུས་སྟོང་གི་ངེད་གཉིས་བར་ཐག་ཇེ་ཉེ་རུ་བཏང་བ་ཡིན།

     སྤྱིར་ཡིན་ན། ངའི་ཁྱེད་ལ་སྐད་ཆ་འདི་དག་ད་སྐབས་བཤད་པའི་འཆར་གཞི་ཞིག་འེ་ནས་མེད། ཕན་ཚུན་བར་རྒྱུས་མངའ་དེ་འདྲ་མེད་པའི་ཁྱེད་ལ་མཚོན་ན། དེ་ནི་དཔྱིད་ཁའི་གནམ་ངོ་ལྟ་བུའི་ཡིད་ཆེས་ས་ཞིག་ཡོད་མི་སྲིད། དེས་ཕྱིར་ཁྱེད་ཀྱིས་ང་དང་ལེན་བྱེད་པ་ནི་མི་སྲིད་པ་ཞིག་ཡིན་པ་ངས་ཤེས་ཡོད།  ཡིན་ནའང་བརྩེ་དུང་ནི་ང་ལྟ་བུའི་མི་བུ་ཕལ་བ་ཞིག་གི་ཚོད་འཛིན་བྱེད་ཆོག་པ་ཞིག་གཏན་ནས་མ་ཡིན། རང་གི་སེམས་ངོགས་སུ་བྲིས་པའི་སྐད་ཆ་དེ་དག་ཕྱི་རུ་མ་ཕུད་ན། དེ་ནི་རང་ཉིད་ཕན་པ་དང་རྗེས་འགྱོད་བྱེད་སའི་གནས་སུ་འགྱུར་འགྲོ་བ་ནི་མི་བུ་ཞིག་གི་བརྩེ་དུང་གི་ཆོས་ཉིད་དུ་འཁུམ། དུངས་པ་དེས་རྐྱེན་པས། བདག་གིས་ཁྱོད་ཀྱི་འཛུམ་མདངས་མཐའ་དག་མི་ཚེ་འདིའི་ལོངས་སྤྱོད་དུ་སྒོམ་བསམ་ལ། སྙན་ངག་དང་ཐ་སྙད་ཀྱིས་མཚོན་མི་བཏུབ་པའི་དཔྱིད་ཀའི་བསིལ་རླུང་འཇམ་པོ་དེ་རུའང་བློམ་མྱོང་། ཤ་དང་རུས་རྐང་དུ་སིམ་པའི་སྙིང་གཏམ་དེའི་བདག་གི་ལམ་ཕྱོགས་ལ་བདག་པོ་བརྒྱབ་པས། ཉི་འོད་དང་སྤྲིན་པའི་པང་ནས་ངས་སྙན་ངག་བྲིས་ལ། སྐར་ཚོགས་དང་མཚན་ལམ་རེ་རེ་ནས་བདག་གིས་སུས་ཀྱང་ཚོར་ཐབས་མེད་པའི་མིག་ཆུའི་ཐིགས་པ་བརྒྱས་མྱོང་།  སུས་ཀྱང་འགྲེལ་ཐབས་དཀའ་བའི་ཐ་སྙད་རེ་རེས་འུ་གཉིས་ཀྱི་ལས་དབང་་ལ་ཚོན་མདངས་བསྣན། སྐབས་དེ་དག་ཏུ་ཁྱེད་ནི་བདག་གིས་བཀླགས་མི་ཚར་བའི་བརྩེ་དུང་གི་གཏམ་རྒྱུད་རྫོགས་མེད་དེ་ཡིན་ལ། གང་གིས་ཀྱང་ཚབ་བྱ་མི་བཏུབ་པའི་གཏམ་རྒྱུད་དའི་མི་སྣ་གཙོ་བོ་དེ་ཡིན།

   སློབ་སྦྱོང་གི་བར་ཐག་ནི་འུ་གཉིས་ཀྱི་ཆེས་རིང་བའི་བར་ཐག་ཡིན། དེས་རྐྱེན་པས་འུ་གཉིས་སོ་སོ་རང་ཉིད་ཀྱི་ལམ་ཁ་དེར་ལས་དབང་གིས་སྐྱེལ་མ་བྱེད་སྲིད། བར་སྐབས་ཏེ་ནས་ངའི་ཁེར་རྐྱང་གི་ལོ་ཟླ་ཤིག་སེམས་ཀྱིས་སྐྱོར་ཞིང་།ཁྱོད་དང་སློབ་གླིང་གཅིག་ཏུ་མ་འཛོམས་པའི་སྡུག་ཡུས་ཤིག་རྒྱབ་དུ་ཁུར་ནས་དུས་ཚིགས་སྐྱ་བོ་ཞིག་གི་ངོ་གདོང་ལ་སྙན་ངག་དང་ཐ་སྙད་རེ་རེས་ཚོན་ཁ་བཏབ་རྒྱུ་དང་།དུས་ཚོད་དེར་ཁྱོད་ནི་བདག་གི་སྙན་ངག་དང་ཉིན་ཐོའི་བར་གྱི་འགྲེལ་ཐབས་མེད་པའི་ཁྲག་རྩར་རྒྱུ་བའི་ཐ་སྙད་ལྷུན་ཆགས་དེར་གྱུར་ཞིང་།བདག་གི་ས་སྲོད་དང་མཚན་ལམ་རེ་རེའི་དྲན་པ་དང་ན་གདུང་གི་རྨ་ཁའི་ཚ་གཟེར་དུ་གྱུར།

   རྨི་ལམ་དང་རྨ་ཁས་བཏུམ་པའི་ལོ་ངོ་གསུམ་གྱི་ཕྱིར་མིག་ཁྲོད། བུ་མོ་ཁྱེད་ནི་ངའི་སྙིང་གི་འཕར་ལྡིང་དང་བསྡོངས་བའི་ཁྲག་རྩ་དམར་པོ་དེ་ཡིན། ཁྱོད་ཁོ་ན་ལས་ཕྱིར་མིག་ཁྲོད་ན་འགྲན་བརྩོད་བྱེད་མཁན་མེད་པས། ང་ཁྱེད་ལ་བསམ་པ་ནམ་དག་ཡིན།

     ཁྱོད་ནི་ངའི་འཛམ་གླིང་དཔེ་ཀློག་དུས་ཆེན་འདིར་བཀླགས་བའི་གཏམ་རྒྱུད་སྐྱ་བོ་དེ་ཡིན།

                            ࿑   མྱིང་མེད།