2018-09-09

      དགེ་རྒན་ལགས། ཁྱེད་ཀྱི་ལྷག་བསམ་ནི་གངས་རི་ལས་ཀྱང་དཀར་ཞིང་འཚེར་ལ། ཁྱེད་ཀྱི་གཟི་བརྗིད་ནི་རི་རབ་ལས་ཀྱང་བརྟན་ཅིང་བརླིང༌། ཁྱེད་ཀྱི་བྱིན་རླབས་ནི་བླ་མ་ལས་ཀྱང་ཁྱད་དུ་འཕགས། ཁྱེད་ཀྱི་རང་གཤིས་ལ་ངན་སྤྱོད་དང་མུན་ནག་མེད། ཁྱེད་ཀྱི་མདུན་ལམ་ན་རབ་རིབ་དང་ཀྱག་ཀྱོག་མེད། དེ་བས་ཁྱེད་ནི་གོ་ལ་ཟླུམ་པོ་འདིའི་ཡང་སྟེང་ན་ཆེས་གཟི་དཔལ་དང་མཚར་སྡུག་གིས་ཕྱུག་པའི་སྐར་མ་འོད་ཆེན་ཞིག་དང་ཀུན་ནས་མཚུངས་ཤིང་། ཁྱེད་ནི་ངེད་ཅག་གི་མིག་མདུན་ན་རྟག་ཏུ་འོད་ལམ་མེར་འབར་བའི་མུན་སེལ་གྱི་སྒྲོན་མེ་ཡིན། 
    དགེ་རྒན་ལགས། ཁྱེད་ཀྱི་རླབས་ཆེ་བའི་མཛད་རྗེས་དུས་ནམ་ཡང་མི་ཉམས་པར་ང་ཚོའི་སེམས་ཁོང་ལ་འཁྱིལ་ཞིང་། ཁྱེད་ཀྱི་ངོ་མཚར་བའིི་སྐུ་ཚེ་དུས་གཏན་དུ་མི་ནུབ་པར་བསྐལ་བརྒྱའི་བར་དུ་བརྟན་པར་སྨོན།