ཐེངས་འདིའི་དྲ་ལམ་དབྱིན་ཡིག་སློབ་ཁྲིད་ཀྱི་མཇུག་རྫོགས་ལ་ཉེ་བས་དགེ་རྒན་ལགས་ཀྱིས་ད་བར་དུ་དབྱིན་ཡིག་སློབ་ཁྲིད་ལ་ཞུགས་པའི་མྱོང་ཚོར་དང་འབྲེལ་ཏེ། ཁོ་ཚོའི་ཨོ་ལ་སློབ་གསོ་ལ་ལྟ་ཚུལ་ཉུང་བསྡུས་ཤིག་འདོན་དགོས་པ་དང་། སློབ་ཁྲིད་རྗེས་མ་བསྡུ་སྐབས་སློབ་མ་སོ་སོའི་མྱོང་ཚོར་ནི། སློབ་ཁྲིད་ཀྱི་བརྡ་ཁྱབ་སྟེང་དུ་འཁོད་རྩིས་ཡིན་པས། ཁྱེད་ཚོའི་ཡིད་ཆེས་དང་བསམ་འཆར་ནི་ཧ་ཅང་མཁོ་ཟེར། དེ་བས་ཞོལ་གྱི་གུག་རྟགས་ནང་དུ་བཅུགས་ཡོད་པའི་མཚམས་སྦྱོར་རགས་བསྡུས་དེ་ནི། ཕྲན་ཁོང་ཚོའི་དྲ་ལན་སློབ་ཁྲིད་ལ་ཞུགས་པའི་བརྒྱུད་རིམ་ཉུང་ཙམ་ཡིན། སྤྱིར་ཡིན་ན་འདི་ལས་ལྷག་ཅིག་འབྲི་དགོས་མོད། གནས་སྐབས་དེ་ཙམ་ལས་འབྲི་ལོང་མ་བྱུང་བས་སང་གནང་ཁོམ་ལོང་བྱུང་ན་ག་ལེར་བྲིས་ཆོག མ་ཟད་དབྱིན་ཡིག་གི་ལམ་ནས་ཀྱང་མཚམས་སྦྱོར་ཏོག་ཙམ་འབྲི་དགོས་ཡོད། དེ་ནི་ང་ལ་མཚོན་ན་ཅུང་དཀའ་སྣང་ཆེའོ།། རེད་ཨང་། ཁོ་ཚོའི་ཁྲིད་ཐབས་ལེགས་ཤིང་སྤུས་ཚད་མཐོ་བའི་དབྱིན་ཡིག་སློབ་ཁྲིད་ཀྱི་བཀའ་དྲིན་ཉག་གཅིག་ལ་བརྟེན་ནས་ཁོ་བོས་ཀྱང་དབྱིག་ཡིག་སྦྱངས་པའི་གྲུབ་འབྲས་བླ་མེད་བླངས་ཡོད་པས། ཁོ་ཚོར་བཀའ་དྲིན་མཚོན་བྱེད་ཀྱི་རྒྱབ་སྐྱོར་ཙམ་ནི། ངེས་པར་བྱ་ཐུབ་དགོས་སོ།།
༼ ལྷན་རྒྱས་ཁམས་བཟང་། ང་ནི་ཨོ་ལ་སློབ་གསོའི་དྲྭ་ལམ་དབྱིག་ཡིག་སློབ་ཁྲིད་ཀྱི་འཛིན་གྲྭ་དང་པོ་དང་གཉིས་པ་གཉིས་ཀར་ཞུགས་ཚར་བའི་དགོན་སྡེའི་གྲྭ་བཙུན་དཀྱུས་མ་ཞིག་ཡིན། ཁོ་བོ་ཐོག་མར་དབྱིན་ཡིག་སློབ་ཁྲིད་ལ་ཞུགས་སྐབས་དབྱིན་ཡིག་གི་གསལ་བྱེད་དག་ཀྱང་ཀློག་མི་ཤེས་པའི་གྲས་སུ་གཏོགས། ད་ལྟ་ཡིན་ན་ཨོ་ལ་སློབ་གསོའི་བཀའ་དྲིན་ཉག་གཅིག་ལ་བརྟེན་ནས་དབྱིན་ཡིག་གི་བརྡ་སྤྲོད་སྤྱི་ལ་གོ་བ་རགས་ཙམ་ཆགས་ཐུབ་ཡོད་པ་མ་ཟད། གོ་སླ་བའི་དབྱིག་ཡིག་གི་སྒྲུབ་ཐུང་དག་ཀྱང་ཚེགས་ཆུང་བའི་ངང་ནས་ཀློག་ཐུབ་ཀྱིན་ཡོད། འདི་ནི་ཨོ་ལ་སློབ་གསོའི་ཕྲན་ལ་གནང་བའི་རྩ་ཆེ་བའི་གྲུབ་འབྲས་དེ་ཡིན། རང་ངོས་བཤད་ན་ནས་ཨོ་ལ་སློབ་གསོ་ནི། བོད་ཁུལ་ཡོངས་ཀྱི་ཆེས་ཚད་གཞི་མཐོ་ལ་ཁྲིད་ཐབས་ལེགས་པའི་དྲ་ལམ་དབྱིག་ཡིག་སློབ་གླིང་རྩེ་གྲས་སུ་གདམས་ཡོད། ལྷག་པར་རང་དང་འདྲ་བར་རྒྱུན་དུ་དབྱིག་ཡིག་སྦྱང་བའི་ཁོར་ཡུག་མེད་པ་དག་ལ་དམིགས་བསལ་གྱིས་སྟབས་བདེ་བསྐྲུན་འདུག་པས། གོ་སྐབས་བཟང་བོ་ཉིད་དམ་འཛིན་བྱེད་པའི་རེ་བ་ཤིན་ཏུ་ཆེའོ།། ༽
网友评论