ཡུལ་ཤུལ་ཁྲི་སྲོང་ཚོང་ལས་ཚད་ཡོད་ས

ཤེས་རིག་དང་དཔལ་འབྱོར་ལོངས་སུ་སྤྱོད་པའི་རྒྱ་ཆེ་བའི་མང་ ཚོགས་རྣམས་ལ་སྙན་ཞུ། ད་ཐེངས་ཡུལ་ཤུལ་ཁུལ་ཁྲི་སྲོང་ཚོང་ལས་ཁང་ཞེས་པའི་ཚོང་ཁང་དེའི་ཐ་སྙད་འདོགས་ཚུལ་དང་ཚོང་ཁང་གི་གྲགས་ཆེའི་མིང་རྟགས་སམ་ཡང་ན་ཁ་རྟགས་ཞེས་དམངས་ཁྲོད་དུ་བཤད་སྲོལ་ཡོད་པས་ འདི་གཉིས་ཀྱི་འགྲེལ་བཤད་འདོར་བསྡུས་ཙམ་ཞིག་སྤྲོ་བར་བྱ་སྟེ།

དེ་ཡང་ཐོག་མར་ཚོང་ཁང་གི་མིང་འདི་ནི། དེང་སང་འཛམ་གླིང་དུ་བསྟན་འགྲོའི་དོན་དུ་མཛད་ཕྲིན་གྱི་ཉི་འོད་ཕྱོགས་བཅུར་འཕྲོ་བཞིན་པའི་བླ་ཆེན་ཞིག་སྟེ། ཡོངས་གྲགས་སུ་རྫོང་སར་འཇམ་དབྱངས་མཁྱེན་བརྩེ་ཞེས་ཞུ་བ་སྐྱེས་ཆེན་ཁོང་གིས་ཐུགས་བརྟག་ལེགས་པར་མཛད་དེ་བོད་ཀྱི་རྒྱལ་རབས་ཆེན་པོ་ཆོས་སྲིད་ལུགས་གཉིས་ལ་མཛད་རྗེས་ཀྱི་གཟི་འོད་སྤྲོ་བ་ལ་ཉི་ཟླ་དང་མཚུངས་པའི་ཆོས་རྒྱལ་ཆེན་པོ་སྲོང་བཙན་སྒམ་པོ་དང་ཁྲི་སྲོང་ལྡེ་བཙན་གཉིས་ཀྱི་མཚན་དང་འབྲེལ་བའི་སྒོ་ནས༼ཁྲི་སྲོང་ཚོང་ལས་ཁང༽ཞེས་ལུགས་གཉིས་གང་གི་ཐད་ལ་རྟེན་འབྲེལ་ཕུན་ཚོགས་ལྡན་པའི་མིང་བཟང་འདི་གནང་བ་ལགས་སོ།།

གཉིས་པ་ཁྲི་སྲོང་ཚོང་ལས་ཁང་གི་གྲགས་ཆེའི་མིང་            རྟགས༼ནོར་བུ་རིན་པོ་ཆེ༽འཇོག་པ་ལ་དགོས་པ་རྒྱུ་མཚན་གང་ཞེ་ན།ཡབ་མེས་གོང་མའི་འདས་པའི་ལོ་རྒྱུས་ཀྱི་རྒྱབ་ལྗོངས་དང་ནང་བསྟན་ཆོས་ལུགས་སོགས་ཕྱོགས་གང་ཐད་ལ་གཞིགས་ཀྱང་ང་ཚོ་ཁ་བ་བོད་པ་ཚོས་འདི་ལ་ཧ་ཅང་གཙིགས་སུ་འཛིན་པ་སྟེ།  དེ་ཡང་ཡུལ་སྐྱབས་གནས་དམ་པ་ལ་ཐུན་མོང་གི་དངོས་གྲུབ་ཞུ་བ་ལ་མཆོད་རྫས་ནོར་བུ་རིན་པོ་ཆེ་ཕུལ་ཞིང་གདུལ་བྱ་སེམས་ཅན་དག་ལ་བཀྲེན་ཕོངས་ཀྱི་རྒྱུན་བཅད་དེ་འབྱོར་པ་ཕུན་སུམ་ཚོགས་པ་ཐོབ་པའི་གསོལ་བ་བཏབ་པ་དང་།  དེ་བཞིན་དུ་ཞི་དྲག་གི་ནོར་ལྷ་དག་གིས་ཀྱང་ནོར་བུ་ཕྱག་ཏུ་འཆང་བ་འདི་ཉམ་ཐག་སེམས་ཅན་རྣམས་དབུལ་བའི་སྡུག་བསྔལ་ལས་སྐྱོབ་པའི་མཚོན་བྱེད་ཅིག་ཡིན་པས་འདི་དག་ནི་ཆོས་ལུགས་དང་མཐུན་ཚུལ་ཞིག་གོ།  གཞན་ཡང་འཇིག་རྟེན་སྐྱོང་བའི་སེམས་དཔའ་ཆེན་པོ་རྒྱལ་པོ་དྲི་མེད་ཀུན་ལྡན་གྱིས་རྒྱལ་པོའི་བང་མཛོད་དུ་བཞུགས་པའི་ནོར་བུ་ དགོས་འདོད་ཀུན་འབྱུང་ལ་གསོལ་བ་ཇི་ལྟར་བཏབ་པ་དེ་བཞིན་སྩོལ་བ་ཐུབ་པའི་སྐྱེས་རབས་དང་དེབ་ཐེར་སོགས་ལས་དངོས་སུ་གསལ་བས་འདི་དག་ནི་རྟོག་བཏགས་དང་མིག་འཕྲུལ་ཙམ་མ་ཡིན་པ་སེམས་ཅན་སྤྱི་མཐུན་གྱི་ལས་ཀྱིས་དེ་ལྟར་གྲུབ་པ་ལ་སུས་ཀྱང་འགོག་ཐུབ་པ་དཀའོ།། མ་ཚད་དེང་དུས་སུ་གཡང་སྒམ་དང་བང་མཛོད་ནང་ལ་ནོར་བུ་ཞིག་བཞག་རྒྱུ་རྙེད་ན་ཆེས་ཡ་མཚན་ངོ་མཚར་འཛིན་པ་ནི་སྔོན་གྱི་ལོ་རྒྱུས་ཡིད་ཆེས་དང་ཆོས་ལུགས་ལ་བག་ཆགས་ཟབ་མོ་ཡོད་པའི་སྟབས་ཀྱིས་སོ་སོའི་སེམས་ནང་ནས་འདོར་མི་ཐུབ་པའི་བརྩི་ཐང་ཆེན་པོ་འཛིན་པའི་གནས་ཚུལ་འདི་དག་ལ་དཔགས་ན་རང་གཞན་ཀུན་ལ་ཕན་འབྲས་གཡུར་དུ་ཟ་བ་ཡོད་པར་མཚོན་པས་འདི་ནིི་འཇིག་རྟེན་དང་མཐུན་ཚུལ་མདོར་བསྡུས་ཙམ་མོ།།  དེས་ན་ཆོས་འཇིག་རྟེན་གང་གི་ཐད་ནས་རྟགས་མཚན་བཟང་པོ་དུ་མ་ཞིག་ལ་དམིགས་ཏེ་ངེད་ཁྲི་སྲོང་ཚོང་ལས་ཁང་གིས་རྟེན་འབྲེལ་གྱི་ཆེ་བ་ཙམ་དུ་རྒྱལ་སྲིད་སྣ་བདུན་གྱི་ནང་གསེས༼ནོར་བུ་རིན་པོ་ཆེ༽འདི་ཉིད་གྲགས་ཆེའི་མིང་རྟགས་སུ་ཕུན་སུམ་ཚོགས་པའི་ཉིན་མོ་འདིར་གཏན་འཁེལ་བྱས་ཏེ་འཇོག་པ་ལགས་པས་ཚང་མས་དེ་ལུགས་ཐུགས་འཇགས་འཚལ།

ཞོར་དུ་མཚོན་རྟགས་རི་མོའི་རྣམ་པ་ལ་གསལ་བཤད་ཅུང་ཙམ་ཞུས་ན།སྟེང་ལ་མེ་རི་དང་འོག་ཏུ་མཚོ་མོ་འཁྱིལ་ཞིང་།བར་གྱི་ནོར་བུ་ལག་གིས་འདེགས་པའི་རྣམ་པ་འདི་གང་ཞིག་མཚོན་སྙམ་ན། ཐོག་མར་ནོར་བུ་རིན་པོ་ཆེ་ནི་རྒྱ་མཚོའི་གླིང་ནས་བྱུང་བའི་ཚུལ་ཏེ། ཆོས་རྗེ་ས་པཎ་གྱིས་ལེགས་བཤད་རིན་པོ་ཆེའི་གཏེར་ལས། ནོར་བུ་གཞན་དུ་བྲིན་པ་ཙམ། །རྒྱ་མཚོའི་གླིང་དུ་ག་ལ་བྲིན།། ཞེས་གསུངས་པ་ནང་བཞིན་ནོར་བུ་མཚོ་ལས་བྱུང་བ་དངོས་ཐོག་ བདེན་པའི་ར་སྤྲོད་ཀྱང་ཡོད་པས་དེའི་ཕྱིར་མཚོའི་རི་མོ་འོག་ཏུ་བཀོད། མེ་རུ་སྟེང་དུ་བྲིས་པ་འདིས་ཆེས་རྨད་དུ་བྱུང་བའི་བདེ་སྐྱིད་ཀྱི་འབྱུང་ཁུངས་བསོད་ནམས་མེ་ལྟར་འབར་བའི་རྣམ་པར་གསལ་བའོ།  །བར་དུ་ནོར་བུ་ལག་གིས་འདེགས་པའི་ཚུལ་འདིས། རྒྱུ་ནོར་ལོངས་སྤྱོད་དགོས་འདོད་ཀུན་ནོར་བུའི་ཆར་བཞིན་ལག་ པའི་ནང་དུ་འབབ་པར་མཚོན་པས་དོན་འདི་དག་ཆོས་རྗེ་ས་སྐྱ་ པཎ་ཆེན་གྱིས།འབྱོར་པ་ཐོབ་པ་གྱུར་ན་ཡང་།། བསོད་ནམས་མེད་ན་ག་ལ་རྟག། ཅེས་གང་ཟག་སོ་སོའི་རྒྱུད་ལ་བསོད་ནམས་ཡོད་པའི་སྟོབས་ལས་ལོངས་སྤྱོད་རྒྱུན་ཆགས་སུ་གནས་པར་གསུངས་པས་སོ།། འཇུག་མཐར་ངེད་ཁྲི་སྲོང་ཚོང་ལས་ཁང་ལ་ཚོང་འབྲེལ་བྱེད་པར་དགའ་བསུ་དང་ངོས་ལེན་ནམ་ཡང་ཡོད་བཀའ་དྲིན་ཆེབཀྲ་ཤིས་བདེ་ལེགས། །ཚོང་ལས་མི་སྣ་དག་གི་འབྲེལ་གཏུགས་ཁ་པར་ཨང་གྲངས།     

    (156 0898 1376) (153 5298 1376)

  (186 9786 8555)（150 8909 1376）