ད་བར་ཨ་རིའི་སྲིད་འཛིན་འོས་འདེམས་ཆེན་མོ་འཚོག་བཞིན་པས་བོད་པ་མང་ཆེ་བས་དགྲོ་གནོན་ཁྲོམ་ངེས་པར་རྒྱལ་དགོས་ཞེས་སྐད་མང་བོ་རྒྱག་བཞིན་གདའ། དོན་དངོས་སུ་དགྲ་གནོན་ཁྲོམ་ལ་ཁྱད་ཆོས་དང་རིན་ཐང་། འཇོན་ནུས། གོ་རྟོགས་མ་འདྲ་བ་གང་ཡོད་སོགས་ལ་རྒྱུས་མངའ་ཡོད་པ་དང་རྒྱབ་ལྗོངས་ཀྱི་གནས་བབ་ཧ་གོ་བའི་སྒང་ནས་ནས་དཔྱད་བརྗོད་གནང་མཁན་ནི་དེ་ཙམ་མཐོང་མ་སོང་། མང་ཆེ་བས་གཅིག་གིས་གཅིག་ལ་ལད་ཟློས་རང་བཞིན་གྱིས་དབེན་མ་རིག་པར་མདའ་འཕེན་པ་དང་རི་བོང་ཅལ་འདྲོགས་ཀི་ལས་ལ་འབད་བཞིན་པ་འདྲ། ཤེས་མི་ཤེས་གཉིས་ཀས་ཨ་རི་ཚང་གི་གནད་དོན་གླེང་ཁུལ་བྱས་ཡོང་བ་འདི། ཚང་མ་ཁོམ་སོང་བས་རེད་དམ། ཅི་ཡིན་འདི་ཡིན་མེད་པར་བཤད་ལ་དགའ་བས་ཡིན། དངོས་གནས་མཚར་རོ་རེད། ཁྲོམ་ནི་མི་བུ་རྒོད་གཤིས་ཆེ་བ། སྙིང་སྟོབས་འཛོམས་པ། སྐྱོན་ལ་འཛུབ་མོ་འཛུགས་ཐུབ་པ། ཉེན་མཆོངས་ལ་དགའ་བ། དགྲ་ལ་དགྲ་ལན་སྤྲོད་ཐུབ་མཁན་ཞིག་ཡིན་པ་ནི། ད་ལྟའི་བར་གྱི་ཁོའི་ལྟ་སྤྱོད་ལས་ཅུང་ཙམ་རྗེས་སུ་དཔོག་ཐུབ་པའི་བཟོ་འདྲ་བོ་འདུག་ནའང་། ཁྱད་ཆོས་དེ་དག་འཛོམས་པ་ཙམ་གྱིས་རྒྱལ་ཁམས་བདེ་འཀོད་དེ། དམངས་ལ་བདེ་སྐྱིད་བསྐྲུན་ཐུབ་པའི་སྲིད་སྐྱོང་བ་སྤུས་ཚད་ལྡན་པ་ཞིག་ཡིན་པའི་ངེས་པ་ནི། ཅི་ཞིག་ཡོད། ང་ཚོ་ཚང་མ་ཁོའི་ཁ་རི་ཁ་ཐུག་གི་གདོང་མཆོངས་བྱེད་པར་དགའ་བའི་ཕྱིའི་རྣམ་པ་ཙམ་ལ་ཡིད་སྨོན་འཆོར་བཞིན་ཡོད་ནའང་། དེ་ཙམ་གྱིས་ཁོའི་དོན་དངོས་ཀྱི་ཆབ་སྲིད་ཀྱི་གོ་རྟོགས་དང་བྱ་བའི་ཉམས་མྱོང་། བསམ་བློའི་ཚད་གཞི་སོགས་ནི་ཅི་ཡང་མཚོན་མི་ཐུབ་པས་མཐའ་གཅིག་ཏུ་ཁོ་རྒྱལ་དགོས་ཟེར་བ་ཡང་མང་མང་ལ་ལད་ཟློས་ཀྱིས་ཀུ་ཅོ་འདོན་པ་ཙམ་མོ།། ཡང་ཅིག་བཤད་ན་བྱང་ཨ་རི་ཚང་གི་སྲིད་འཛིན་གྱི་གོ་ཐོབ་སུ་ལ་རག་མིན་ནི་རང་དོན་བོར་ཞིང་རང་མགོ་ཐོན་ཀྱིན་མེད་པའི་ང་ཚོར་འབྲེལ་བ་ཅི་ཞིག་ཡོད། ང་ཚོར་གླེང་བརྗོད་ཀྱི་འོས་ཆ་དང་ཐོབ་ཐང་ཡང་ཅི་ཞིག་ཡོད། དེ་བས་རང་ལ་འབྲེལ་མེད་ཀྱི་གནད་དོན་དག་ནི་བཏང་སྙོམས་སུ་བསྐྱུར་ན་མི་བཟང་ངམ།
网友评论