འཇིག་རྟེན་ནི་ནམ་ཡང་བཙལ་དང་འཚོལ་བཞིན་པ་དག་གི་ཁྱིམ་གཞི་དྲོད་མོ་ཡིན།རང་བྱུང་ཁམས་ནི་དྲི་བ་དང་ཐེ་ཚོམ་དང་ཞིབ་འཇུག་སོགས་ཀྱི་ཆེས་མཐའ་འཇུག་གི་བདེན་དོན་དེ་ཡིན་པ་འདྲ།ང་ཚོ་གསོན་བཞིན་པ་འདྲ་འདྲ་ཡིན་ཀྱང་འཚོལ་བྱ་དེ་ཁ་ཁ་ཡིན།
ང་ཚོ་ནར་སོན་སའི་ཁོར་ཡུག་ནི་ལྷ་སྒྲུང་དང་གཏམ་རྒྱུད་ལས་གྲུབ་པའི་བག་ཆགས་ཀྱི་ཨ་ལུང་དེ་ལས་བརྒལ་མ་མྱོང་།ཆུང་ནས་ད་བར་དུ་ལྷ་འདྲེའི་བག་ཆགས་དང་ལས་དབང་གི་བཀོད་སྒྲིག་ལ་དད་མོས་བྱས་ནས་འཚར་ལོངས་བྱུང་བ་ཡིན་མོད།ཕ་མས་བཤད་པ་ལྟར་ན་"ལས་ཤིག་ཡོད་ན་ལམ་ཞིག་ཡོད་ངེས་རེད"ཟེར་མྱོང་།དེ་བས་ང་ཚོས་དུས་རྒྱུན་དུ་ཡིད་གཉིས་ཐེ་ཚོམ་མེད་པར་ལས་ལ་རེ་སྒུག་བྱས་ཡོད།དེ་ནི་སྔོན་བསགས་ཀྱི་ལས་དབང་ཞིག་གིས་ལྕགས་ཐག་དང་སྦྲེལ་བའི་སྒོ་འགྲམ་གྱི་ཁྱི་རྒན་དང་གཉིས་སུ་མེད། ང་ཚོས་མིག་ཤེས་གསལ་གསལ་བྱས་ནས་རྒྱང་བལྟ་ཞིག་བྱས་ན་སྔོན་བྱོན་གྱི་སྐྱེས་ཆེན་ཡང་ན་ཚན་རིག་པ་དང་བསམ་བློ་བ་ཚང་མ་ནི་ལས་དབང་ལ་རྡོག་འཁྲབ་བྱས་ནས་རང་གི་བརྩོན་འགྲུས་དང་གོ་སྐབས་ཤིག་ལ་བསྟེན་ནས་རྒྱལ་ཁ་ལེན་པ་རེད་འདུག ད་དུང་མི་རྒན་ཁ་ནས་བཤད་པའི་ལས་རྒྱུ་འབྲས་ཟེར་རྒྱུ་འདི་ནི་ལས་ངན་དང་ཉམ་ཆུང་དང་ཕམ་ཁ་གྲངས་མེད་ཉོ་མཁན་གྱི་སྡར་མ་དག་གི་སེམས་གསོ་བྱེད་གྱི་སྨན་ཡག་པོ་ཞིག་ལས་མ་འདས། མུན་འཐོམས་ལས་ལོག་རྟོག་གི་ལས་དེ་བརྩི་ནས་དངོས་ཡོད་ཀྱི་རྒྱུ་འབྲས་དེ་སྣང་མེད་གཏོང་བཞིན་ཡོད།དངོས་ནས་བཤད་ན།ང་ཚོས་དུས་རྒྱུན་དུ་མིག་དཔེ་བལྟ་ས་ནི་གསར་གཏོད་པ་དང་ཁེ་ལས་བ་ཡང་ན་གྲུབ་འབྲས་བཟང་པོ་ཐོབ་ཡོད་མཁན་དེ་དག་རེད། ཁོང་རྣམས་ཀྱིས་བཤད་བཞིན་པ་ནི་བརྩོན་འགྲུས། གསར་གཏོད། བསམ་བློ། ཐབས་ཤེས། སྤོབས་པ། ཀུན་སྤྱོད། གོ་སྐབས་རྣམས་ལས་བཙན་གྱིས་བཀོད་པའི་ལས་དབང་དེ་ག་ལ་ཡིན།ལས་དང་རྒྱུ་འབྲས་གོ་འགྲེལ་ལྡོག་ནས་ཆེ་ལ་ལ་བྱེད་ཀྱི་ཡོད་རེད……
དེང་གི་དུས་ནི་དོགས་པ་ཡོད་ན་དོགས་གཅོད་ཤེས་རབ་ལྡན་མཁན་དང་སྲོལ་ངན་ཡོད་ན་གསར་གཏོད་སྙིང་སྟོབས་ལྡན་མཁན་གྱི་གཉོག་འཛིང་གི་དུས་རབས།ཡང་ན་སྲོལ་རྒྱུན་ཁོ་ན་འཛིན་མཁན་དང་བག་ཆགས་ལས་ཅི་ཡང་གཏོང་མི་ཕོད་པར་རྡོའི་སྐུ་འདྲའི་མི་རྣམས་གྱི་ལྷིང་འཇགས་ཀྱི་དུས་རབས་ཀྱང་ཡིན།གཅིག་ནི་རྒྱལ་ཁ་བླངས་ཟིན་པའི་འགྲན་ཞུགས་པ། གསར་གཏོད་བ། དུས་རབས་ཀྱི་ཕོ་ཉ། ཁྲག་དྲོན་རུས་མཁྲེགས་ཀྱི་ན་གཞོན་དག་གི་དུས་རབས་གསར་བ་རེད།གཅིག་ནི་ཤི་ལ་ཉེ་བའི་མལ་གསོ་ཁང་གི་མི་རྒན། བཤམས་སྟོན་ཁང་གི་དངོས་རྫས་རྙིང་པ། སད་ཀྱིས་བཅོམ་པའི་མེ་ཏོག ཁ་ཕྱོགས་ནོར་བའི་ཁྱི་ལྡོམ་གྱི་དུས་རབས།ང་ཚོ་ནི་ལྷིང་འཇགས་ལ་ཞེན་ཞིང་མལ་གསོ་ལ་དུང་བའི་མི་རིགས་ཤིག་རེད། ང་ཚོས་ནམ་ཡང་ཁ་གཡང་བོས་ནས་གསོལ་བ་འདེབས་བཞིན་ཡོད།འོན་ཀྱང་དུས་རབས་ཀྱི་རླུང་རྟ་ལས་ལུས་ནས་ཡོད་ཚད་ཤོག་བུའི་རླུང་རྟ་ལ་རེ་བ་བཅོལ་ནས་རྗེས་ལུས་ཀྱི་རྣམ་པ་དང་ཉམ་ཐག་གི་ཚུལ་དེ།ལས་དབང་གིས་བཀོད་སྒྲིག་བྱས་པ་ཡིན་ནམ།ཅི་ཡང་བཤད་བཞིན་པ་ཅི་ཡང་མི་ཤེས་པ།ཐམས་ཅད་སྨ྄ོན་བཞིན་པ་ཐམས་ཅད་མི་འགྲུབ་པ……
ང་ཚོའི་མི་རིགས་ཀྱི་སློབ་གསོ་ལ་མིག་ཟུར་ཞིག་འཕངས་ན་ཇི་འདྲའི་དགོད་བྲོ་བ་ཞིག་མ་ཡིན་ནམ།སྲོལ་རྒྱུན་ལས་བྱུང་བའི་སློབ་གསོ་ཡིན་ན་འདྲ་ཆོས་དང་འབྲེལ་བའི་བསམ་བློ་འགའ་ལ་མཚོན་ན་འདྲ། ད་རུང་དམངས་གཙོ་དང་རང་དབང་ཡང་ན་སྤྱི་ཚོགས་ཀྱི་ལས་ལ་འཁོར་ཐུབ་ཡོད་པ་མ་རེད།ནད་ཡམས་འཕོག་པའི་བུ་མེད་ཅིག་དང་ཨ་ན་མ་ན་རེད་འདུག དངོས་ཡོད་འཚོ་བའི་ཁྲོད་ནས་དཔེ་ཞིག་དྲངས་ན་བཀའ་འགྱུར་ཟེར་བ་ནི་ཚ་དུས་མགོ་ལ་འཇོག་རྒྱུ་ན་དུས་འདོན་རྒྱུ་ལས་དེ་ལ་ཞིབ་འཇུག་བྱེད་མཁན་ཉིན་གྱི་སྐར་མ་ཙམ་རེད་འདུག ཐ་ན་ཡང་ང་ཚོའི་འདུ་ཤེས་སུ་ཆོས་དང་འབྲེལ་བའི་དངོས་ཡོད་ཐམས་ཅད་ལ་ཐེ་ཚོམ་དང་དྲི་བ་གང་ལ་ཡོོད་ཆོག སེམས་སུ་འཆར་ཙམ་བྱས་ན་ཡང་སྡིག་པ་དང་མི་དགེ་བའི་རྒྱུ་རུ་འགྱུར་ངེས་ཡོད། གལ་ཏེ་ཐེ་ཚོམ་མེད་ན་དྲི་བ་གང་ལ་ཡོད།དྲི་བ་མེད་ན་དྲིས་ལེན་འབྱུང་མི་སྲིད།དེ་འདྲ་ཅིག་ཡིན་དུས་བདེན་དོན་ཟེར་བ་དེ་ཡང་སྐྱག་རྫུན་ཤ་སྟག་རེད།ད་དུང་དགེ་རྒན་ལག་གི་དབྱུག་པ་དང་ཕ་མའི་ལག་གི་སྦོམ་དབྱུག་དེ་སློབ་གསོའི་མགོ་ལ་ཞྭ་ནག་པོ་གཡོགས་པ་མ་ཡིན་ནམ།ང་ཚོའི་སློབ་གསོ་འདི་ནི་གཏམ་དཔེ"གོ་བ་མེད་པའི་གླང་རྒན་ལ་རྒྱལ་པོ་བཀའ་ལས་དབྱུག་པ་བཙན"ཟེར་བ་འདི་ནས་གྲུབ་པ་རེད་དམ། འདིས་ཆུང་དུས་བྱིས་པ་དག་གི་དགའ་ཕྱོགས་དང་སྐྱིད་པའི་རྟོག་བཟོ་སོགས་ལ་དམར་གསོད་བྱེད་པར་འདྲ།སློབ་གསོ་ཟེར་བ་བཙན་པོ་མ་ཡིན་པར་ཐབས་ཤེས་དང་ལྷག་བསམ་དང་གཅེས་སྐྱོང་སོགས་ལ་བསྟུན་དགོས་པ་རེད།ད་དུང་བྱིས་པ་ཞིག་མལ་ཁྲི་ལས་ས་ལ་ལྷུང་ན་ཕ་མས་ཁ་ལས་"གཅེས་ཕྲུག་མ་ངུ་ངས་མལ་ཁྲི་ལ་རྒྱག་རྒྱུ་ཡིན་དགྲ་ཤ་ལེན་ཡོད་ཨ་ཟེར་ངེས་རེད།དོན་དངོས་སུ་བཤད་ན་བྱིས་པ་རང་གི་གནད་དོན་ལས་སུ་ལ་ཡང་ཁག་དཀྲི་ས་ཡོད་མ་རེད།དེ་ནི་བྱིས་པ་ལ་ངན་ཁག་དཀྲི་དགོས་པའི་སློབ་གསོ་མིན་ནམ། སྤྱིར་འཕེལ་རྒྱས་ནི་རབ་དང་རིམ་པ་བཞིན་ཉིན་རེ་ལས་ཉིན་རེ་ཡར་ངོ་ཟླ་ལྟར་འཕེལ་བ་ལ་ཟེར།འོན་ཀྱང་ང་ཚོ་ནམ་ཡང་རྗེས་ལུས་དགོས་དོན་གང་།
ཕ་མའི་དྲིན་ལེན་སྐོར་ལ་བལྟས་ན།ང་ཚོ་ལ་དགོད་བྲོ་བའི་གཏམ་ཞིག་ཡོད།གནའ་སྔ་མོ་དབུལ་བོ་ཞིག་ལ་རྩམ་པ་སྦྲམ་བུ་གང་ཡོད་པས་ཁོས་སེམས་ལ་ཆུང་མ་བླངས་ནས་བུ་ཞིག་སྐྱེས་ཤིང་འཚོ་བ་སྐྱིད་པོ་གཏོང་བའི་བསམ་བློ་ཡོད།དེ་ལ་འདང་ཞིག་རྒྱག་ན་སྐྱེས་པ་ཞིག་དང་ཕ་མ་ལ་ངེས་པ་དུ་དགོས་པའི་བསམ་བློ་དང་འཆར་གཞི་རེད་འདུག ང་ཚོ་མང་ཆེ་བ་"ལས་དབང་གིས་བཀོད་སྒྲིག་དང་ཕོ་མོའི་འདོད་ཆགས་དང་བརྩེ་བ"ལས་བྱུང་བ་ཡིན།ཕ་མ་ལ་བསམ་བློ་མེད།འཆར་གཞི་མེད་ཐ་ན་དམིགས་ཡུལ་ཡང་མེད་པ་རེད།དེ་འདྲ་ཅིག་དང་ལས་དབང་གིས་བཀོད་བསྒྲིག་བྱས་པ་ཡིན་ན་དྲིན་ལེན་ཟེར་བ་ཅི་རེད།བོད་ཀྱི་ཕ་མ་དག་གིས་གཅེས་ཕྲུག་སྐྱོང་ཚུལ་ལ་བལྟས་ན་ཡོད་ཚད་བུ་ལོན་འཇལ་བ་དང་འདྲའོ།ངས་ཁྱེད་སྐྱེས་ཁྱེད་ཀྱིས་ང་གསོས་ལྟ་བུ་རེད་འདུག་་་་་་་ སྲོལ་རྒྱུན་ལ་རྒྱུད་འཛིན་དང་གསར་གཏོད།བག་ཆགས་དེ་གོམས་གཤིས་བཟང་བོ་ཞིག་ཏུ་བསྒྱུར་དགོས། བྱ་བ་གང་དང་གང་ལ་ཕྱོགས་མང་ནས་བསམ་བློ་གཏོང་དགོས། མི་རིགས་ལ་སེམས་ན་བཟང་ཆ་དང་ལེན་ནམ་དར་སྤེལ་དང་ངན་ཆ་མངོན་གསལ་དུ་བཅུག་ནས་བསྒྱུར་བཅོས་ཀྱི་བསམ་བློ་དང་རྣམ་དཔྱོད་དགོས།སྐད་ཆ་ངན་ངན་བཤད་ན་ཡང་དེས་ཕན་པའི་ནུས་པ་ཡོད་སྲིད་པ་རེད།ཐམས་ཅད་བདེན་དོན་ཡིན་པ་བསྒོམ་ནས་ཁུ་སུམ་མེར་ཅི་ཡང་མ་བརྩད་ན་དཔྱོད་ཤེས་དང་གནས་ལུགས་ཐམས་ཅད་ཤུལ་བཞག་ཏུ་འགྱུར་བའི་སྔ་ལྟས་རེད།རྩོད་གླེང་ཡོད་པའི་སྐད་ཆ་ལས་བདེན་དོན་གྱི་གནས་ལུགས་འབྱུང་ངེས་ཁོ་ཐག་ཡིན།ང་ཚོ་ལ་དགོས་པ་ནི་"མེ་ཏོག་མཉམ་བཞད།མཁས་བརྒྱ་འགྲན་གླེང"གི་རྣམ་པ་དེ་རེད།
网友评论