朋友講起佢隻貓識得屙喺屋企廁所嘅地板，唔駛用貓砂兜同貓砂，一屙就沖落水渠，得咗。聽完我望一望屎霸同奧利奧，諗起馬雲爸爸嗰句「夢想還是要有的，萬一實現了呢？」
「真係馬雲講㗎？」「你問我，我問馬化騰呀？」
細個一直以為「貓砂咪即係沙囉，沙灘嗰啲沙呀嘛！」「但係點解狗就屙落邊度都得，貓就要屙落沙度咁非主流呢？」咪玩啦，年少無知嘅我點會諗咁多嘢啫，以為自己知道乜叫「貓砂」已經好似好叻㗎啦嘛。年紀輕輕嘅我又點會諗得到，若干年後嘅自己，終於知道貓砂其實唔係沙不特止，重要日日同佢哋有親密接觸㖭。礦物砂（膨潤土）、植物砂（松木砂、豆腐砂、粟米砂、木薯砂）、水晶砂、紙砂etc. 乜都試勻，又要冇粉塵又要唔黐底又要夠凝固重要遮埋臭！真係師奶揀廁紙都冇咁多學問……最感人嘅係，無論你用乜撚嘢砂，只要你有一日full day出咗街，唔駛貼揮春，返到屋企就可以即刻見識到乜叫「金玉滿堂」，如果出街過夜，重可以送埋有味道嘅5D特效「繞樑三日」㖭！
不過諗深一層，既然人哋唔係叫你做鏟屎仔或者鏟屎佬，而係聽落身擔要職嘅鏟屎官，噉唔鏟屎又點做官呢！（exo me邏輯喺邊？）……總之一句到尾，唔好揼波鐘啦，咋咋臨去鏟埋督嘢啦。
网友评论