དྲང་གཏམ་མགུར་མ།

                              དམར་ཁ་ཚ།

སེམས་ཀྱི་དཀར་གསལ་ཟླ་བའི་དཀྱིལ་འཁོར་འདི།།

ཡིད་ཀྱི་དྲན་ཤིང་ཁྲོད་ཀྱི་ཞལ་རས་ཤིག།

ཆུ་སྐྱེས་མེ་ཏོག་ཕྲེང་བའི་ལག་རྡང་ནི།།

གསེར་མདོག་ངང་ཆུང་མཚེ་མའི་སྨོན་ཡུལ་ཡིན།།

བརྩེ་བའི་དར་སྐུད་ཕྲ་མོའི་བདུད་པ་འདི།།

ལས་དང་སྨོན་ལམ་བཟང་པོས་དམ་དུ་བསྒྲིལ།།

ཁ་ཁོག་གཉིས་མེད་བྱང་ལམ་དྲང་མོ་ནས།།

སེམས་དང་སེམས་པ་གཤིབ་པ་ངེད་གཉིས་དགེ།།

དུང་བའི་སྙིང་གཏམ་མིན་ལ་བསྟོད་པ་མིན།།

ཆ་མེད་ལུས་ལ་སྤྲུལ་ནས་ཁྱོད་ལ་ལྟ།།

ཁ་ཡག་ཁོག་བཙོག་མ་ཡིན་སེམས་ཀྱི་གཏམ།།

དྲང་མོ་མདའ་ལ་བཅོལ་ནས་གློད་རྒྱུ་ཡིན།།

སྐྲ་ལོ་རྒྱ་ལྕང་སུམ་སླས་སྐེ་དཀྲིས་ཅན།།

བོད་ལྭ་རྒྱུན་གྱོན་ཕུ་ཐུང་གཉིས་ཡང་བསྣབས།།

འཛུམས་མདངས་ཉིན་མོའི་སྐར་མ་ཁྲོ་ཉམས་ཅན།།

གླེང་སྟེགས་རེ་ནས་བརྗིད་ཉམས་མཐོང་རྒྱུ་ཡོད།།

ཞོགས་པར་སྔ་ལངས་དཔེ་ལྟས་བྱས་ནི་མཐོང་།།

ནུབ་མོ་འཕྱི་ཉལ་གློག་སྒྲོན་དཀར་བའི་རིགས།།

སློབ་མ་ཡ་རབས་གྲལ་ལ་ཚུད་འགྲོ་སྙམ།།

ང་ལ་བཞག་པའི་བག་ཆགས་ཐོག་མ་ཡིན།།

ཞིབ་མོ་ཁ་བརྡ་གློད་བཞིན་ཡུན་གྱིས་འགྲོགས།།

བྱིས་དུས་རྨི་ལམ་འདྲ་བོ་ཕྱིར་སློག་བྱས།།

ཁ་མཚར་ཀུ་རེ་རྩེ་བཞིན་འཛུམ་ཆུང་གྲོལ།།

གདོང་གི་ཁྲོ་ཉམས་ཕྱིས་ནས་སྤྲོ་ཉམས་དོད།།

རྟོགས་སད་རེ་རེའི་ཁྲོད་ཀྱི་ཚོར་བ་གླེང་།།

འདས་མ་ད་གསུམ་ཟེར་བཞིན་ཚོགས་གཏམ་བྱས།།

སྣང་བ་མཁའ་དང་མཉམ་ལ་སྐར་མ་འཛིན།།

སེམས་སུ་གང་ཤར་གང་དྲན་ཐད་ཀར་གཏོང་།།

བྱ་བ་གང་དང་ཅི་ལ་འཕྲད་ཀྱང་རུང་།།

དོན་དག་བཟང་ངན་གང་ཞིག་བསྒྲུབ་དགོས་ན།།

གྲ་སྒྲིག་འཆར་གཞི་གང་ཡང་མེད་པའི་ཁར།།

འཚུབ་ཆ་རླུང་ཐན་ཞིག་གིས་རབ་སེ་འཇོག།

རང་གཞན་གཉིས་ཀྱི་དོན་ལ་མི་འདུག་ཟེར།།

དོན་དག་ཆེ་མ་ཕྲ་གསུམ་མི་སྐྱུར་ཟེར།།

ཕ་དང་ཨ་ཁུའི་སྐབས་བབ་ཤེས་དགོས་ཟེར།།

བུ་རབས་ཚ་རྒྱུད་ཚོགས་ལ་ཁྲིད་དགོས་ཟེར།།

བསམ་བློ་སྔོན་ཐོན་ཡིན་ལ་དེང་རབས་ཅན།།

གཞན་ཕན་ལྷག་བསམ་ཡོད་ལ་དོན་ལྡན་པ།།

དོན་མེད་འབྲེལ་མེད་མི་ཡིས་བསྟོད་འོས་ཀྱང་།།

ཁུངས་མེད་དྲེད་མོས་ཕྱི་བ་བསྐོས་ནི་འདྲ།།

བྱ་བའི་འབྲས་བུ་གལ་ཆེན་ཡིན་ན་འང་།།

བརྒྱུད་པའི་གོ་རིམ་གཅིག་དང་ཉམས་མྱོང་གཉིས།།

མ་འོངས་མི་ཚེའི་ལམ་བྲོ་ཡིན་པར་རློམ།།

དངོས་ཡོད་བསླབ་བྱ་གསོན་པོ་དྲོན་པོར་སྒོམ།།

རྟོགས་སད་རེ་རེ་ཆར་རྗེས་འཇའ་ཚོན་ཡིན།།

ཚོར་བ་སོ་སོ་ལུས་ཀྱི་སྦྲིད་ཤད་ཙམ།།

ལག་ལེན་ཉུང་ཉུང་ཉིན་མོའི་སྐར་མ་བཞིན།།

རྒྱུན་སྐྱོང་ཐུང་ཐུང་ལག་པའི་མཐོ་གང་ཡིན།།

མགོ་ལ་འཁོར་བ་མེད་པས་སྣང་བ་དྭངས།།

ལུས་ལ་བུ་ཕྲུག་མེད་པས་སེམས་ཁུར་མེད།།

ཆ་མེད་མི་ཚོགས་ཁྲོད་ན་འཚོ་བ་རོལ།།

འགྲོ་ཤེས་འདུག་ཤེས་བྱེད་དགོས་ཡིད་ཆེས་ཡོད།།