བར་དོ་བ།     . གཅན།

ཉི་འོད་རི་དང་གངས་ནས་འཕྲོ།།

གཟུགས་གཞི་ས་དང་ཆུ་ལ་ཐིམ།།

གཏམ་རྒྱུད་ལོ་དང་ཟླ་བར་བྲིས།།

མིག་ཆུ་སྟོན་དང་དཔྱིད་ལ་སྐམ།།

དྲན་པ་གཙང་བོའི་རྒྱུན་དང་འདྲེས།།

མིག་ཟུར་གཙང་བོའི་མཐའ་ལ་ཧད།།

སྙིང་དང་རུས་པའི་ཧུད་ཤ་འཐེན།།

དུས་དང་བུ་མོར་དྲན་པ་ཆགས།།

དབྱངས་ཀྱི་ཐུག་པ་ལུས་ལ་ཟག།

དར་དང་བུ་མོའི་ནབ་གཟའ་ཞུ།།

ང་སྟེ་དྲན་པས་སྐྲ་ལོ་འཐོར།།

དབྱར་དང་བུ་མོ་དྲན་པས་བཟི།།

མཚན་དང་རྨི་ལམ་སེམས་ནས་འཁྲུག།

རྒྱང་དང་མཐའ་ཡུལ་རི་ནས་གཟིམས།།

གངས་དང་ཁ་བ་ཡིད་ནས་ཆགས།།

སྡུག་དང་དྲན་པའི་གནམ་གཤིས་འཁྱམས།།

ཚེ་ཡི་གྲིབ་མ་རི་ནས་འདྲོགས།།

དགའ་སྐྱོའི་ཅང་ཤེས་ཆད་ནས་ཤི།

ཁྲག་དང་གཙང་བོའི་སྡུག་དབྱངས་གྱེར།།

ལ་དང་ལུང་ནས་བར་དོ་རྫོགས།།

སྲིད་པའི་ལ་ཁར་གྲིབ་གཟུགས་འཁྲུངས།།

འཁོར་བའི་རི་ནས་གནམ་གཤིས་ཆགས།།

གངས་དེས་ཟུར་གྱི་བཙན་པོ་བར།།

ད་ཤི་གང་སྐྱེ་འདི་ནས་རྟགས།།

ཚེ་ཉི་ལ་ཁའི་རྟ་བདུན་ཟུར།།

གཟིམས་ན་བར་དོ་མུན་པའི་སྒྲིབ།།

རྩྭ་མགོའི་ཟིལ་བ་འོད་ཀྱིས་སྐམ།།

གང་ཚེ་དེ་ནས་ཆགས་མིན་ཅི།།

མི་ཚེ་གནའ་ནས་ད་ལ་རག།

འཛིན་དང་སྒྱུ་མའི་སྣང་བ་སླུས།།

སླུས་ཀྱང་ཚོར་བའི་ཅང་ཤེས་དགོད།།

ད་ནི་བར་དོ་འགྲིམ་ལ་ཆས།།

ཕ་དང་དྲིན་མོར་འཛུམ་ཞིག་དགད།།

ཡུལ་དང་རི་ཆུར་གཞས་ཞིག་ལེན།།

རུས་དང་ཆུང་མར་གྱེས་ཚིག་འབྲི།།

སང་ཞོགས་སྐྱ་རིངས་ལ་ནས་གྱེས།།