2017-12-11

2017-12-11

ཤེས་རབ་སེང་གེ།

ལས་ནི་ལས་ཞིག་ཡིན་པས། །

ཁྱོད་ཀྱང་དེད་ནས་ཐོན་བྱུང་། །

སྲིད་པའི་ཁ་ཡི་ཁ་འདིར། །

ངུ་རེས་དགོད་རེས་ཐོན་ཐལ། །

ཕ་མ་ལས་ལ་བསྐོས་པས། །

ཤ་ཚའི་རྩེ་བ་འབུས་བྱུང་། །

རྟག་ཞིག་ཡོད་ན་ཆོག་ཀྱང་། །

འདི་ལྟར་ཁྱོད་ཀྱང་གྲུབ་སོང་། །

སྲིད་པའི་འཁོར་སྟང་ཞིག་གི །

ལས་དེ་ང་ལ་འབྲེལ་བྱུང་། །

ང་ཡང་ཤ་ལས་གྲུབ་པའི། །

བརྩེ་བའི་ཚིག་འགའ་ཕུལཡོད། །

ཁྱོད་ཀྱང་སྐུ་ཚེ་བརྟན་ནས། །

དགའ་བའི་ཉི་མ་དེ་ཡང་། །

དེ་དང་དེ་ལས་འཕེལ་ན། །

བདག་གི་སྨོན་ལམ་དེའོ། །

གློ་བུར་གཏམ་དེ་གོ་བའི། །

ཚིག་འདི་བཙན་གྱི་བསྒྲིག་བཞག །

ཁྱོད་ཀྱི་ཕྱོགས་སུ་འཕུར་དུས། །

ང་ཡང་དྲན་པ་མཛད་རོགས། །

2017/12/11/ གློ་བུར་དུ་འཛིན་གྲོགས་ས་མཐའ་བའི།