སེམས་སྡུག་གི་ཟེར་དོན་འདི་ཡིན།

གཞན་སྐྱོན་འཚོལ་ལ་ངལ་བ་མ་མཆིས་བའི།།
འཇིག་རྟེན་འགྲོ་བ་མི་འདི་ཨ་ཁ་ཁ།།
རང་སྐྱོན་རི་རབ་འདྲ་བོ་རང་སར་བཞག།
གཞན་སྐྱོན་ཁབ་ཙམ་འཚོལ་འདི་གད་མོའི་གནས།།

ལྟ་གྲུབ་ཟེར་བ་ཅི་ཡིན་ལྐོག་གྱུར་ཡང་།།
སུ་དང་གང་གི་ལྟ་བ་ལོག་འདུག་ཅེས།།
མི་ཤེས་ཤེས་མདོག་སྟོན་ལ་རྒྱུན་མོས་པའི།།
མི་གཟུགས་འཛིན་པ་དེ་ཚོར་སྐྱུག་རེ་བྲོ།།

རྒྱ་ཡིག་རྡ་རྡོག་ཙམ་རེ་འདོན་ཤེས་དུས།།
རང་སྐད་གསེར་ནག་འདྲ་བོར་སུན་ནོ་ཞེས།།
ཁ་གཉེར་སྣ་གཉེར་བྱེད་པའི་ཞབས་འདྲེན་པ།།
ང་ཚོར་ཡོད་པ་ལས་ཀྱང་མེད་ན་དགའ།།

གྲྭ་ཇོ་འདི་ཚོའི་ལྟ་སྟངས་མི་ཡག་ཚུལ།།
མཁན་ཚུལ་དེ་ཚོའི་མཛད་སྤྱོད་ནོར་འདུག་ཚུལ།།
ཡོད་ཚད་དགྲ་རུ་མཐོང་བའི་རང་རློམ་ཅན།།
ཞབས་འདྲེན་ནང་གི་ཞབས་འདྲེན་ངོ་མ་རེད།།

སངས་རྒྱས་ཟེར་བ་བྱོན་པ་རྫུན་ཡིན་ཚུལ།།
བརྒྱད་ཁྲི་བཞི་སྟོང་དེ་ཡང་དེ་བཞིན་ཞེས།།
ཕྱོགས་ལྷུང་དམ་བཅའ་འཛིན་པའི་བ་གླང་སྤུན།།
རིགས་མཐུན་སྤུན་ཟླར་ངེས་ཀྱང་མཁོ་གལ་མེད།།

ལེགས་པའི་ཡོན་ཏན་མཐོང་ལ་རྩིས་ཐང་ཆུང་།།
ཉེས་པའི་སྤྱོད་ངན་རིགས་ཀུན་ཁྱབ་བསྒྲགས་བྱེད།།
ལུགས་གཉིས་ལམ་བཟང་ལས་ལ་སྤྲོ་སྣང་དབེན།།
དེང་གི་འགྲོ་བ་མི་འདི་ཨ་ཁ་ཁ།།

ན་ཟུག་དབྱངས་ལ་གྱེར་བའི་སྡུག་བསྔལ་འདི།།
མིག་ཟུང་གྲོང་ལ་གྱེར་བའི་ལྟད་མོ་དང་།།
རང་སེམས་རང་གིས་གསོ་བའི་གཞས་ཆུང་སྟེ།།
ཐོལ་བྱུང་སྙུག་རྩེར་བཞུར་བའི་ཟིན་ཐོ་ཡིན།།