ꍰꄖꈊꃀ，ꉢꈍꑍꃢꃅꅽꁧꌺꅂꑟꃅꉪ，ꅽꇭꀧꄩꑇꎸꐎꊭꀕꑍꍈꌠ，ꈍꃅꐛꋽꀒ！ꉢꉜꆏꆹꈍꃅꑌꉌꌤꑓꀖꌠꒌꆠꋋꂷꏮꄀꀋꀵꋭ；ꃆꏂꑍ，ꉢꃆꏂꑍꈨꑭꇂꃴꄉꈜꎼꏢꉂ，ꃆꏂꑍꑘꄡꅐꑟ！ꑠꅹꉢꇁꅽꃃꈐꇬꊐꇉꅽꀉꆂꑍꍈꌠꉠꑓꄩꄉꏸꌺꌡꃅꆗ；ꊂꆏꉣꑊꉂꁬꉂꈤꏿ；ꉣꑊꐯꐊꈜꎴꅉꇬꉜꄉꁧ……
ꀈꇭꃀꀋ，ꃆꏂꑍ，ꉣꑊꊿꌋꆀꌤꆿꋒꌥꑠꄡꊝꑞꉂ，ꇤꋲꌠꌊꆀꐛꅉꀋꐛꑠꀊꄂ，ꃆꏂꑍꄉꉣꑊꊝꑟꉂ！
ꊂꆏꉣꑊꐯꈿꅪꃅꅪꀠꀕꃅꐚꃅꏂꅔꃀꈚꇬꎍ，ꇱꄓꏂꋧꆌꄉ，ꑓꌺꃅꃴꏮꐺ，ꉢꁬꆏꄀ，ꆏꒉꉢꉜ，ꀆꐒꌤꆏꇁ，ꉌꂵꌦꈾꇁ……
ꄡꇗꃆꏂꑍꉘꇉ，ꌦꅲꈌꇬꃹꌠꉘꇉꑴꌦ；ꈁꄸꂷꌞꊿꇇꍹꅿꏢꅿꑠꋒꇂꃴꄉꊿꁳꈭꋏꏾꂯ！ꀈꇭꃀꀋꅆꃅꆏꈻꉠꉌꂵꀒꄩꉀ，ꅽꅋꏸꌊꆀꏿꅇꆹꉠꈲꒉꌊꆀꂸꄣ；ꉢꅽꇇꈐꄉꉠꉪꄟꌊꆀꐯꌠꃅꌗꈘ，ꁧꉘꀕ。
ꃆꏂꑍ，ꉠꋧꃅꈥꇤꀕꋋꂷꆽꄩ，ꉪꀋꐥꄅꀋꀀꑓꋪꀋꅐ，ꌦꅪꀋꍻ，ꆏꂷꌠꀉꄂꇬꑌꅊꇉ！ꆏꐈꉠꉌꃀꐛ，ꉢꑗꅽꉌꂵꇬꃹ。ꉣꑊꑓꋪꑓꇬꇉ……
ꆏꆹꑊꋌ，ꉢꆹꉱꃀ，ꃰꊿꋠꈔꋠꈤꃆꂮꉪꏢ，ꋌꆹꉣꑊꅋꏸꌋꆀꉂꏣ！
ꑍꄙꆀꊰꉆꈓꊰꑋꆪꑍꊏꋍꑍ
网友评论