Wef muax nyax shid, Hmongb deuf drongx uat luak khed.
Wef dob ncaik geuf ndeud, naf zid geut drongx ndit mol ndouk ros.
Wef dout lob nenx rongt, yis yis draod leuf naf Mangb mit Shuad deb uat nof.
Wef Hmongb lob nenx sheud, raol raol zhaot pluad mit yout bos yeuf mol ndros Mangb Shuad shik dut kud.
Ndeud geuf dad, cheb ghuax vus, draod zos zhed.
Mit vangx mit zhed chab jit nblaif.
Ghangb vangs ghouf zhed ndraox zhuas nzhuab ghangl nab.
Drongx vangs drongx dangs nzhol nyaob nzhol, seb nyaob seb.
Ghouf zok zhit bof bangt deul nqot, ghangb zok duas job duas choud ndit.
Houd dangs zal ghangl daot, zangx qeut bous choud ndit, bangf led duax buf nab.
Sangd sangd shab zhos ncod, shaib shaib guat muas bongb.
Rongt vangx rongt zhed uat drout mit nangl mit ngeux nyaob, rongt lax rongt deb zhes drout mit gangb mit nongs rod.
Deb zhit muax dol duax laix, lax zhit muax dol lol haid, nbuat draos zhit muax dol lol duat.
Lax deb fangb uat fangb, ghongb longt shib let shib.
Rex raol bangf ndenl hluak nens zheus draod zheus.
Jaix nyongs dit ntangd cax boub zos.
Juad voud zhit muax dol hluak uat, ploub ndongt zhit muax duab nens gud.
Zhod hlit daof ghangb ndos ged duab nens bod, hnangb lox hnangb yout gud shangx yenl.
Naox zhab ndouk paib juab nongs yangf yangf muax.
Sab xangt sab yis nenb bod cheb, cheb bod ged.
Baob lox baob yout zheuk shout cheb, mit dob mit nyuas dreuk ged ghuax, bos yeuf guat muas ndros six shuax.
Ib xongt zex qif naox ghangb aob daos kuaf.
Bluas ghangb zhit dout uat get naox, lot zhuas duab lens shangx ndros guat muas.
Huaf nat, Hmongb lob nenx chab rongt suk let nat.
Dreuk let god sangd, nad yaos khaod zhit rongt.
Mit dob mit nyuas muax naf muax zid yos, zhit muax naf muax zid khat.
Zhos yos jax nyuas lob jed, yos zhit dout nyuas nblongx shab.
Bos yeuf muax dob draod muax nyangb, hod zhed dex nof bangb zhit dout ib nzhent lal ib nzhangl.
Zhax cod uat nbaox uat ndul, bos yeuf rongt suk dol zhax ib yangf kud.
Teuf nax teuf xongt, ndox gangx deuf ndox zhouk draod.
Rongt let nchangd ndul zhit dangl, draox zhuaf zhit khuad, ros ndouk zhit ghous.
Sangd ndout shab ncod, shaib ndout guat muas lol, shout ndout del chent.
网友评论