ཁོ་བོ་ལྗང་མྱུག་གི་སྐོར་གཉོར་རྒྱུར་ཧ་ཅང་དགའ་བོ་ཡོད། ལྗང་མྱུག་མ་གཏོགས་པའི་དཀར་དམར་གྱི་མེ་ཏོག་ལ་དག་ལ་དེ་ཙམ་སྤྲོ་བ་མེད། དེ་ནི་གཉོར་དཀའ་བས་ཡིན་ནམ་ཅི་ཆ་སྟེ། རང་སེམས་ལ་ཆེས་ལ་ལྷོད་ཡངས་དང་ལྷིང་འཇགས། རང་བྱུང་གི་སྣང་བ་འདྲེན་མཁན་ནམ་མྱོང་རོོལ་ཁྱར་པར་བ་སྟེར་མཁན་ནི། སྐྱེ་དངོས་ཀུན་ལས་ལྗང་མྱུག་ཁོ་ན་ཡིན་ནོ།། ལྗང་མྱུག་ལ་དགའ་ཞེན་ཆེ་བས་རྨི་གྲུ་བཞི་མ་དྲུག་བདུན་ལས་མེད་པའི་རང་གི་ཁང་མིག་ཆུང་ཆུང་ནང་དུ་ཡང་ལྗང་མདོག་གི་ལོ་མས་བཀངས་ཡོད། ཉིན་ཤས་སྔོན་ལ་བྱང་ཆུབ་ཤིང་གི་སྡོང་ཕྲུག་ཅིག་གཉོར་ཡོད་པ་ཡང་། ཉི་མར་ལྡེ་ཕྱིར་སྒེའུ་ཁུང་ཕྱི་ལ་བཞག་མོད། ཕྱི་དྲོར་ནང་ལ་ལེན་རྒྱུར་བརྗེད་པས་ཕྱི་ཉིན་བལྟས་པ་ན་ཡོད་ཚད་འཁེངས་ནས་འདུག བྱང་ཆུབ་ཤིང་གི་སྡོང་བོ་ནི། ནང་བ་ཚོའི་ངོས་ནས་བཤད་ན་རིན་ཐང་ཆེ་ཞིང་། རྟེན་འབྲེལ་ལ་དཔྱད་རྒྱུ་ཡོད་པ། རྒྱབ་ལྗོངས་ཀྱི་ལོ་རྒྱུས་མཐུག་པས་ཤིང་སྡོང་གཞན་དང་མ་འདྲ་བ་ཞིག་ཡིན་སྟབས། རང་གི་བྱང་ཆུབ་ཤིང་གི་སྡོང་ཕྲུག་ནི་དེ་ལྟར་འཁྱག་པས་བསྡམས་ཡོད་པ་མཐོང་དུས། སེམས་སུ་གར་ཡོང་ཆ་མ་འཚལ་བའི་སྡུག་ཡུས་ཀྱི་རླུང་བུ་འཁྱམ་པོ་ཞིག་གློ་བུར་དུ་ལྡིང་བྱུང་། རྣམ་པ་དེ་དག་ཅུང་ཙམ་དང་ལེན་བྱ་མ་འདོད་པའི་རྐྱེན་བྱས་ཏེ། ད་ལྟ་དགུན་དཀྱིལ་ལ་སླེབས་ཡོད་ནའང་དྲྭ་ལམ་ནས་ཡང་བསྐྱར་བྱང་ཆུབ་ཤིང་གི་སྡོང་ཕྲུག་གི་མངགས་ཉོ་བྱས་ཏེ། དེ་རིང་དངོས་སུ་ལག་ལ་འབྱོར་སོང་། བསྐུར་ཡོང་བའི་ལམ་བར་ནས་གནམ་གཤིས་འཁྱག་དྲག་པས་སྡོང་ཕྲུག་གི་ཚེ་སྲོག་འཆོར་ལ་ཁད་ཅིག་བྱས་པ་འདྲ་མོད། སྟབས་ལེགས་ཏེ། བདེ་འཇགས་ངང་རང་ལག་ཏུ་འབྱོར་བ་སོང་བ་དེ་སྡོང་ཕྲུག་དང་ངེད་གཉིས་ཀྱི་བསོད་ནམས་རེད། ངེད་གཉིས་དབར་ལ་ཐུན་མིན་ལས་འཕྲོ་བཟང་བོ་ཞིག་ཡོད་པའང་མཚོན་ནོ།། དེ་དག་ཡོད་ཚད་ཁོ་བོ་ལྗང་མྱུག་ལ་དགའ་བའི་རྣམ་འགྱུར་ཡིན་ཞིང་ལྗང་མདོག་གི་འཚོ་བར་བསྐྱོད་བཞིན་པའི་ཁ་དོག་མ་འདྲ་བ་དེ་ཡང་ཡིན་ནོ།། ལན་རེར་ལྗང་མྱུག་དག་སྒོ་ཕྱི་ཁྱིམ་ལ་ལེན་པ་དང་དེ་དག་ལ་དུས་ལྟར་ཆུ་འདྲེན་དགོས་པ་སོགས་ཀྱི་ཆ་ན་དཀའ་སྡུག་ཉུང་ཙམ་ཡོད་པ་བདེན་ཡང་། ལྗང་མདོག་གི་མཛེས་པ་དེས་བྱིན་པའི་ལྷིང་འཇགས་ཀྱི་སེམས་ཁམས་དང་རང་བྱུང་གི་མྱོང་རོོལ་དེས་ནི། ཐམས་ཅད་བདེ་སྐྱིད་དང་སྤྲོ་སྣང་འབའ་ཞིག་ཏུ་བསྒྱུར་ཡོང་ངོ་།།
网友评论