དབྱིག་ཡིག་གི་འགྲུལ་བཞུད།

ཤོག་གྲངས་བཞི་ལྔ་ཡིས་གྲུབ་པའི་དབྱིག་ཡིག་གི་སྒུང་ཐུང་གྲགས་ཅན་ཞིག་བཀླགས་ཁུལ་བྱས། མིང་ཚིག་རེ་འགའ་འཚོལ་དགོས་བྱུང་མ་གཏོགས་ཕལ་བ་ཆེ་བ་སྦྱངས་ཟིན་པ་རྐྱང་རྐྱང་ཡིན་འདུག་ན། དེ་འདྲའི་ཀློག་དཀའ་བ་མ་བྱུང་།  ད་ནི་གོ་སླ་བའི་དབྱིག་ཡིག་གི་སྒྲུང་ཐུང་དག་ཀློག་ཐུབ་ཀྱིན་འདུག་སྙམ་ན། སེམས་པ་སྤྲོ་བས་བརྟས་ཡོང་ལ། སྐྱིད་སྣང་མ་འདྲ་བ་ཞིག་གིས་ཡོངས་སུ་ཁེངས་ཡོང་། གཞན་སྐད་ཀྱི་མིག་དབང་སྤྱད་དེ་ཤེས་བྱ་གསར་བའི་མེ་ཏོག་འཐུ་རྒྱུའི་ལས་སྐལ་བྱུང་བ་ནི་ཁྱད་དུ་འཕགས་པའི་ལོངས་སྤྱོད་དམ་འཚོ་བ་གསར་བའི་བདེ་སྐྱིད་མ་འདྲ་བ་ཞིག་གོ། འདི་ཡང་རང་གི་དཀའ་སྡུག་གི་གྲུབ་འབྲས་ལས་བྱུང་བའི་རེ་བ་གསར་བའི་ལྗང་མྱུག་ཡིན་ཞིང་། སུན་སྣང་གིས་གཙེས་ཀྱང་རེ་ཐག་མ་ཆད་པར་ཨམ་གཙིགས་བསྡམས་ཏེ་མདུན་དུ་བསྐྱོད་པའི་རྒྱལ་ཁ་ཡང་ཡིན།  མ་འོངས་པར་འདི་ལས་ལྷག་པའི་དབྱིག་དེབ་མང་བོར་བཀླག་ཐུབ་པར་བརྩོན་པའི་ངལ་བ་ཇི་ཙམ་དང་དུ་ལེན་དགོས་ཀྱང་ཕྱི་ནུར་མེད་པར་རྒྱུན་འཁྱོངས་མཐའ་ཆོད་པ་བྱ་རྒྱུའི་ཆོད་སེམས་དང་གྲ་སྒྲིག་སྔར་ནས་བྱས་ཡོད། དུས་རབས་གསར་བའི་འགྲོས་ཏེ་བསྟུན་ཏེ། དེང་རབས་ཤེས་བྱ་སྣ་ཚོགས་ཀྱི་མུ་མཐའ་བྲལ་བའི་རྒྱལ་ཁམས་འགྲིམ་བསམ་ན། དབྱིག་ཡིག་སྦྱང་རྒྱུ་ནི། ཆེས་བཟང་བའི་གདམ་གསེས་དང་པོ་དེ་ཆགས་འདུག་པ་འདིའི་ཆ་ནས་བལྟས་ནའང་། དབྱིན་ཡིག་སློབ་པའི་ལས་སུ་ཞུགས་པ་དེ་ནི། དོན་ལ་རང་ཉིད་ཀྱི་རྗེས་ལུས་གྱི་རྣམ་པ་བསྒྱུར་འདོད་དང་སྣ་གཅིག་པའི་བསམ་བློའི་ར་བ་ཐར་བའི་ལམ་སྣ་བསྙེག་ཚུལ་གལ་ཆེན་ཞིག་ཡིན་འདུག་པས། དེང་རབས་ཤེས་བྱའི་ནོར་གྱིས་དབུལ་བ་ཞིག་བྱ་བར་མི་འདོད་ན། དེ་ནི་མ་བརྒྱུད་ཐུ་མེད་ཀྱི་སྐས་རིམ་དང་པོའོ།།