“女婿”一词顾名思义自然就是指“女儿呃丈夫”哦，伊最最早呃出处是来源于《史记·李斯列传》中，文中是迭能样子来讲到呃，曰道：“赵高教其女婿咸阳令阎乐劾不知何人贼杀人移上林。”勒拉笔者所在呃城市上海市，有的一种独有呃文化跟习惯，将一些“虽然还呒的正式转正”，但是已经畀女方家庭里向大多数人都认可呃、“列入了准女婿”行列呃囡鱼呃对象，一律都叫伊为“毛脚女婿”。
勒拉上海滩哴向，一般情况下头而言，通通习惯于把女方呃爷娘称之为“丈母娘”跟“丈人老头”，而北方人则称之为“岳父”跟“岳母”。噶么为啥勒拉上海，“丈母娘”跟“丈人老头”欢喜称未来呃女婿为“毛脚女婿”呢？！最最主要呃一嗰原因就是——因为勒拉伊拉俩嗰老人呃眼里看来，能够让自家呃囡鱼带男方上门，基本哴向上算是认可默认囡鱼呃对象了，双方是可以继续交往下去呃，就算是“派发了继续交往下去呃牌照”，如果呒的通过呃閒话，就覅会派发继续交往呃牌照。但畀过，还要经过一段辰光呃考察期，女婿头一趟上门见面呃辰光，畀定是一嗰愣头青小伙子“毛手毛脚”呃。
之所以 “丈母娘”跟“丈人老头”要把“未来呃女婿”一律叫伊为“毛脚女婿”，还是因为跟“大闸蟹”有一定呃关系，因为上海人欢喜把那些还未成熟呃大闸蟹一律都叫做“毛脚蟹”，“毛脚”迭俩嗰字就是意味着还邪气生嫩，还显得覅大成熟稳重老练，多多少少还有一眼眼毛毛糙糙，因此把刚刚上门呃女婿叫做“毛脚女婿”。
“丈母娘”跟“丈人老头”能够让“毛脚”上门，只畀过派发了一张牌照（通行证）而已，至于迭张通行证是一枪头就打了回头票呢，还是能够多次往返呃去使用，就要看男方有的多少花露水、是否能够多多去努力努力，正所谓“革命还么成功，同志仍需努力啊！”
外界一直都勒拉讲笔者所在呃上海市是一座“魔都”，伊代表着“时髦（尚）”、“洋气”、“前卫”、“开全国风气之先河”……实际哴向勒拉伊呃骨子里向还是邪气传统呃，就拿“毛脚女婿”头一趟上门迭桩事体来讲好了，覅单单要挑选一嗰交关好呃日脚，而且勒拉上门前后一嗰礼拜里向，双方屋里厢要是呒发生过啥呃“生病”、“争吵”、“摔坏忒过么事”等一系坏事体，那就意味着是“一嗰好前兆跟好兆头”，以后呃婚姻跟家庭畀定会得邪气幸福美满。反过来讲，要是勒拉迭嗰礼拜里向，碰到了一眼眼覅大好呃各类小事体，就会得认为是要“倒大霉”了，眼扳数一系列覅好呃事体也会紧跟着而来，假使真呃是迭能样子呃閒话，弄了覅好双方还会拗断分手。
选到了好日脚，只畀过是成功呃开始，万里长征只是刚刚迈出了第一步，第一趟上门送啥呃么事是邪气关键呃，正所谓“头炮打的好才会得有花头”，“头炮打得覅灵光”，“出来是一颗哑炮”，后头事体肯定是一天世界，所以讲“毛脚女婿”头一趟去上门，到底送啥呃么事（礼物）畀丈母娘跟丈人老头，绝对是一嗰决定性因素。
是人多多少少都有一眼眼“势力眼”呃，“毛脚女婿”第一趟到底带啥呃么事（礼物）去上女方屋里厢呃门，既是畀未来呃丈母娘跟丈人老头、以及女方呃各嗰亲戚去看一看，与此同时也是做畀周围呃邻居看一看，所以一旦到了迭嗰辰光，就算男方屋里厢经济条件（实力）覅是老好、交关推扳，迭嗰辰光无论如何也要把“台型”去扎扎好、扎扎牢。尤其女方是住勒拉石库门房子里厢，交关讲究迭套么事呃，只因为石库门里厢人家邪气多，覅单单是相互间紧挨着呃，而且还天天是抬头不见低头见呃，有一眼眼小事体，就交关容易畀传播开来，会的畀人家议论纷纷说三道四评头论足一番……为了覅让隔壁邻舍以及周围呃邻居少去讲覅大好呃閒话，就要尽可能去做做好、做的像样一眼，从而更有利于男方以后能走好每一步女婿之路。有些事体覅可覅信，也覅可全信，女方屋里厢隔壁邻舍及周围邻居对男方呃看法跟讲法，虽然覅一定是关键呃决定性因素，但是也是走好女婿之路呃重要因素之一，女方爷娘多多少少也是会的考虑进去呃，会的作为一嗰参考呃依据之一，因此势必要逼得男方覅得覅认真去对待！
最最好呃办法就是，男方勒拉上门之前，首先要想法设法去做一嗰有心人跟包打听，从女方呃口中，或者与之相关呃人员当中，去全方位了解女方屋里厢方方面面呃情况，以及女方爷娘跟伊拉亲眷到底是啥嗰类型、有啥呃喜好，覅怪三七廿一，一切呃一切都要尽自家最大呃可能，去弄得唻清清爽爽，要尽可能去做到有备而无患……
笔者清楚呃记得，勒拉上海、勒拉上嗰世纪八九十年代里向， 第一趟做“上门女婿”，有的四大件绝对是畀不可少呃，迭嗰四大件分别是“一挺机关枪”、“两百发子弹”、“两颗手榴弹”跟“一只炸药包”，经济条件稍稍微好一眼呃人家，会得送“四百发子弹”跟“四颗手榴弹”，所谓“一挺机关枪”是指“金华火腿”；“手榴弹”是指中高档次呃白酒，如：西凤酒、五粮液等等；“子弹”是指好香烟，“炸药包”是指“奶油蛋糕”，蛋糕最最好是“掼奶油蛋糕”。
顺便要讲讲清爽呃就是，大家千万覅要对蛋糕不屑一顾覅把了眼里哦，要晓得勒拉老底子喫奶油蛋糕，尤其是上海流行喫“掼奶油蛋糕”，绝对是一桩大事体跟重要事体啊，只有勒拉逢年过节、邪气重要呃场合才有可能去喫得到哦，勒拉平常日脚里向想啊覅要想！
勒拉掰搿辰光，迭嗰四样么事绝对是上门女婿第一趟上门呃标配哦，弄起来还是算邪气方便便当呃，基本哴向一些交关普通呃人家，经济条件又是稍微推扳一眼眼呃人家，只畀过要去省吃俭用一下，大约摸要省吃俭用一年左右才有可能去办得到。现在呃“毛脚女婿”去上女方屋里厢呃门，就要比老底子复杂的多了，再啊覅好去送烟酒等覅利于身体健康呃么事，开始流行送“保健品”等有利于身心健康呃么事，如：“鹿茸酒”啦，“十全大补酒”啦、“人参”啦……
上海人也有含蓄呃一面，送么事覅好“邪气野花花”、“赤裸裸”，既要讲到钞票，又要讲到经济实惠，还覅能邪气去讲究经济实惠，假使侬真呃去送上一只大大呃大红包，反而让对方觉得男方是一眼啊么啥嗰品味呃人，迭嗰人从今后就覅配做“我”女婿，分寸一定要掌握好，勒拉上海做一嗰毛脚女婿，基本哴向讲绝对是一嗰技术活。
也有覅欢喜吃烟酒呃丈人老头，等到要回去了，侬送畀伊烟酒退回来也是很有可能呃，真呃到伊嗰辰光乃么要戆忒唻，所以勒拉上门之前，最要紧呃事体是先把功课做做好，要对女方屋里厢方方面面都要了解清爽，有啥嗰需要避避开呃地方伐，投其所好才是正道！
到未来呃丈母娘跟丈人老头屋里厢礼品送好以后，交流了一段辰光，丈母娘一般会得端上来“一碗糖滚蛋”，要看碗里厢有几只糖滚蛋，糖滚蛋越多就表示对侬越是欢喜，最多也覅会超过三只，因为四只就是覅大吉利了，迭嗰辰光即使侬肚皮覅饿也要全部吃忒。只要是吃好了糖滚蛋，眼扳数要留侬喫一顿饭，贯穿整嗰过程当中，是勒拉考验侬，侬既覅好閒话讲得忒多，像饭泡粥一样一刻不停呃去讲，也覅能像一只“闷鸽子（格子）”一样，覅大响、覅大肯讲閒话。一条最最基本呃原则是“千穿万穿，马屁不穿”，捡好话、捡丈母娘跟丈人老头欢喜听呃閒话去讲，还要勒拉讲呃辰光去做到适可而止。
从第一趟做“毛脚女婿”到正式领证办了喜酒，搿段日脚对上海人来讲就算是“试婚期”，辰光有长有短呃，关键问题是侬要了解未来丈母娘家庭是哪能生活、有啥生活习惯、侬能否融入伊拉家庭，就要靠侬去通过“做各种事体”来了解清爽了。男女双方谈朋友谈了交关长，一旦觉着大家都谈覅下去就么必要再去谈了，双方还可以拗断分手。不过，对于一般人家来讲，覅是万不得已覅会走迭步路。
还有一条也要记牢呃，假使勒拉屋里厢喫饭，等到一顿饭喫好以后，一定要抢先一步畀事体先去做做忒，袖子管撸起来畀碗汏干净了。覅好翘二郎腿像姥爷一样，坐勒拉电视旁边看看电视，假使真呃迭能样子呃閒话，侬就准备好“吃回票”伐，再也么下一趟见面呃机会了，只有做到女方爷娘始终笑嘻嘻送侬出门，迭场考验才算结束。
一般情况来讲，上海人还是比较正宗呃，男女双方必定是奔着结婚为目的而去谈恋爱呃，能够让侬做上门女婿，基本哴向对侬是比较认可呃，假使对方呃爷娘对侬否是认可呃，既覅会让侬上伊拉屋里厢呃门，还会得让自家女儿跟侬马上拗断，要伊另外去寻找更加好、更加合适呃对象。老底子一代人，从双方认得开始谈恋爱，一直到双方长辈都认可、可以“正式敲定”成为结婚呃对象了，是邪气重要、交关隆重呃一桩事体，一般来讲就算能做毛脚女婿到正式敲定，也至少要有两年左右呃辰光，勒拉中间还有可能要去搞一个订婚仪式！
【备注：文章为作者原创；各类和文章有关的图片均来源于网络上；感谢原创图片】
杜老倌侠客居（陆伟）写于2018年05月16日星期三晚上
网友评论