首先搞清楚一樣嘢，係"茶餐廳"定係"茶餐厅"？本來在下對使用繁簡體字沒咩意見，寫俾自己睇嘅，當然係繁體字，自小讀慣寫慣，使用起來效率最高。但寫嘢就係對外，對讀者，入鄉就隨俗，改用簡體字寫文章。不過唔知點解，一打"茶餐厅"三字出来，居然覺得其莫名陌生。無他，茶餐廳來自香港，香港習慣用繁體字寫的茶餐"廳"，冇"厅"，這成咗茶餐廳文化一部分。也許因為噉，茶餐廳傳到上廣州，啲舖頭名都仲係寫成"茶餐廳"，冇得將就，改咗，就變了另一樣嘢。
也就因此，以下都寫繁體。
在廣州，要搵"茶餐廳"就唔難嘅，要搵好茶餐廳就要花啲工夫。廣州有好多分店嘅"九龍冰室"，在下覺得其實就係廣州版嘅"華星"，一樣有咩"校長多士"，分店裝潢都相似。老實講，呢種唔算茶餐廳，茶餐廳本質係平民飯店，平民又點會食"松露多士"做茶餐？香港人所謂茶餐，係兩次正餐之間填下肚，唔會大洗，唔使食好飽，所以最傳統嘅茶餐廳係"冰室"，賣飲品、西式麵包、小食為主，檔次唔會好高，但主打飲品一定要"留客"，即係客人真係會為飲杯嘢而嚟。
如果用呢一點來做茶餐廳基本條件，有冇哪間廣州嘅茶餐廳達標？在下揾到一間，叫"廣九餐室"，基本上係使人受佢杯嘢飲吸引而再返去幫襯。咩嘢飲？"200%重度阿華田"，真係正，濃重朱古力味(香港茶餐廳一般只有"華田"，叫朱古力有時最後都係變咗華田；香港人從來唔講"巧克力"，呢個同粵音翻譯有關，有機會寫下呢點)來自朱古力粉、朱古力雪糕同華田，帶過幾位廣州香港朋友去試，同聲讚"掂！"。喺香港，在下反而未飲過咁過癮嘅朱古力飲品，一般茶餐廳能夠吸客嘅都係奶茶、咖啡，仲有紅豆冰。紅豆冰而家冇乜邊間做得好，繼續物色。
冰室"進化"成茶餐廳後，漸漸變咗普羅市民嘅三餐解決地，正餐變得越嚟緊要，食件蛋撻、菠蘿油等小食醫唔到肚(其實西多嘅熱量應該同正餐差唔多)。所以茶餐廳同"飯堂"越嚟越接近，要出埋碟頭飯。又要推"廣九餐室"嘅碟頭飯，不論最茶餐廳風格嘅"汁撈飯"，定係中式小菜白飯一碟過，都係大大份，在下呢種食量嘅人兩人一碟都夠飽。喺香港在下好鍾意叫"雜扒飯"，加埋黑椒汁最正，一次過牛、豬、雞、腸仔食齊晒，滿足所有"肉望"。腸仔最正宗係"美國廚師腸"(寫文時聽聞間製造商就快執笠，唔知第日仲有冇得食)，鹹味、脆感都係香港人最愛----或者講係香港人俾佢塑造咗集體喜好----略為煎一煎，外皮小小縮水，皺皺哋，最好食，成碟雜扒飯最重要嘅，可能就係佢。
除咗廣九，廣州仲有"表叔""永盈""翠華"等等，分店比較多。在下比較欣賞"黃恩記"，冇乜分店，格局同食品都比較似平民化嘅茶餐廳，而且可能比較少受餐飲大集團影響，不至於同大型連鎖店做到一模一樣。翠華、太興之類大型連鎖，間間分店開到一模一模，其實好冇特色。
講到茶餐廳特色，一樣好緊要嘅嘢係"人"味，伙記個個衣着態度講嘢用語都好似高級廳館嘅Waiters噉款，就顯得制度化，少咗"趣味"。咩叫趣味？其實就係相異，喺同類事物當中被人睇得見微細差別，可以勾起好奇，可以比較，可以分析，人類最基本嘅遊戲性行為就係咁，在下謂之趣味。人之所以為最有靈性嘅生物，亦在於此。所以話人性衍生趣味，茶餐廳有"人味"先有"趣味"。當然"人味"唔一定係人人喜歡，茶餐廳伙記有人味，有時就冇禮貌，粗粗俗俗；但有時就會細心、幽默，各有各嘅趣味。不論如何，茶餐廳要發展落去，必定要有人味，要用人味主導，否則就變成工廠產品，失去魅力。
网友评论