一、首先讲讲单休日搭双休日
据本人查到呃历史资料以后晓得了，吾伲国家从1995年5月1日开始起，勒拉全国范围内实行“双休日”迭嗰政策，做五天休息两天，即：每逢到了礼拜六搭礼拜天，作为国家呃法定假日，勒拉老底子、勒拉上嗰世纪九十年代初中期前头，国家执行呃却是“单休日政策”，做六天休一天，即：每逢要到了礼拜天，侪是国家呃法定假日。
笔者是土身土长呃上海人，但畀过，勒拉本人所在呃城市上海市，执行双休日政策要比国家法定呃辰光，唻得要早得交关多。自家还恁够清楚呃去记得，至少是勒拉1993年呃辰光，本人所居住呃城市就已经开始实施双休日政策了，勒拉掰搿辰光，本人读初中一年级，除忒礼拜六搭礼拜天放假以外，每嗰礼拜五呃下半日还要放半天假！
就勒拉国家实行单休日政策呃日脚里向，大人只好去休息一天，吾伲还勒拉求学呃高中小学生，要比大人多放半天呃假期哩，而且勒拉上海市、勒拉每嗰区县里向，对于放半日假呃假期，是覅相同呃。勒拉掰搿辰光，笔者所在呃区县川沙县，规定高中小学生，每嗰礼拜五呃下午可放半日假。但畀过，据比笔者年龄还要稍长五年左右呃学长告诉本人，勒拉掰搿辰光，所谓呃学生多去放半日假期，对于那些高中生而言，简直就是形同虚设呃，因为勒拉掰搿辰光，高中生呃学业也是邪气辛苦、繁忙、繁重呃，伊拉就生怕辰光覅够用，恨覅恁畀一天呃辰光当做两天去使用，覅管是到了每嗰礼拜五呃半日假期，还是到了国家法定假日礼拜天，伊拉仍旧是要到学堂里向上课答疑解惑呃，依然还要学海无涯苦作舟，一直到三年高中毕业结束为止！
据父辈一代人讲，勒拉国定单休日呃日脚里向，即便国家法定假日是礼拜天休息，畀过，勒拉掰搿辰光，既覅管是啥人，也覅管伊是从事啥呃行当呃，并覅是所有呃人侪都恁勒拉礼拜天休息呃，而是需要大家去轮休，轮到了侬休息呃辰光侪恁够去休息，轮覅到侬呃辰光是覅好去休息呃，假使辰光是到了下嗰礼拜，还假使呒轮到休息礼拜天呃人，只恁安排勒拉礼拜一到礼拜六呃辰光里向去休息，而且即便是勒拉礼拜一到礼拜六呃辰光里向，覅是侬想休阿里一天，就可以休阿里一天呃，还要根据覅同呃工作岗位、人员呃多寡，由领导唻安排休息呃。除非侬有正当呃、迫在眉睫、覅得覅休息呃理由，侪有可恁勒拉礼拜一到礼拜六呃辰光里向，想休阿里一天就休阿里一天。
勒拉老底子、勒拉那些国定单休日呃日脚里向，虽然国家畀“单休日”定义为“休息”日，好像是勒拉对老百姓讲，侬本人勒拉单位里向已经辛苦劳作了六天，迭嗰一天总算可以好好较去休息休息了！但畀过，依旧还是呒得办法去好好较休息呃，平常一到六呃日脚里向，勒拉单位里向忙碌嗰覅停歇，到了休息日迭嗰一天，则是要勒拉屋里厢忙碌嗰覅停歇，既要畀休息天掰成好几块，还要围着家务转。
二、讲讲申城呃“万国旗”
勒拉国定单休日呃日脚里向，每逢只要是到了礼拜天，还只要是勒拉阳光明媚艳阳高照呃好天气里向，便成了绝大多数家庭主妇们呃主战场，自会畀国家呃法定休息日权当作法定呃洗刷日来使用呃，除忒洗刷以外，买汏烧也是伊拉迭嗰一天里向呃重头好戏。之所以要畀“洗刷”搭“买汏烧”侪都放勒拉迭嗰一天，皆是因为勒拉掰搿辰光，绝大多数呃家庭僎都是属于双职工家庭，勒拉平常一到六呃日脚里向，每天侪都要早出夜归呃，上班辰光为了恁早一眼到单位覅至于迟到，下班后恨覅恁早一眼回家好烧夜饭，光光挤勒拉交通上呃辰光，每天起码要花上两三嗰钟头到三四嗰钟头，平均一天下来，即便是勒拉邪气顺利呃情况下头，正常呃上下班辰光也要勒拉三嗰钟头左右，所以根本是唻覅急去做啥呃家务事体呃，越是简单越好，就算是那些邪气要干净、邪气爱清洁卫生呃嗰人搭家庭，也同样是迭恁样子，勒拉平常呃日脚里向，只恁是睁一只眼闭一只眼眼开眼闭得过且过了！
凡到了洗刷呃日脚里向，尤其是住勒拉市区里向呃居民，眼扳数会得发生用水困难呃状况，皆是因为勒拉掰搿辰光，市区里向呃居民住房条件基本哴向侪都交关狭小，真可以讲是“螺丝壳里做道场”，多数家庭呃厨房间、刷洗（水）池、洗手间是要搭周遭呃邻居混合勒拉一道去使用呃，哪怕是最最少呃，至少也要俩家人家混合勒拉一道去使用，勒拉洗水池呃上方还挂满了各家人家呃水龙头，必定要等到前头一家人家使用好了，才恁轮到自家去使用唻，因此一旦要使用刷洗（水）池呃辰光，还要搭周遭呃邻居商量好如何唻分配使用。
勒拉掰搿辰光，是呒得啥呃洗衣机呃，一切呃一切侪都要靠自家呃一双手去劳作出唻呃，勒拉劳作呃辰光，顶多也就外加一块汏衣裳搓板好了。勒拉笔者所在呃城市，又畀叫做了“申城”，曾经也刮过“一道靓丽呃风景线，勒拉市区里向，到处可以看到侪都有悬挂着呃‘万国旗’”。所谓呃“万国旗”就是指：当年上海原住民将自家呃衣物床（被）单晾晒勒拉外头，从而形成了一种上海人独有呃生活场景。真呃可以去讲是“林林总总”“万花齐放”唻，只要是勒拉礼拜天、还只要是阳光明媚艳阳高照呃好天气，勒拉各式各样呃大小弄堂里向、勒拉各条大小马路呃上头、勒拉树木搭树木之间，鳞次栉比呃扎起了一根根粗绳子，勒拉绳子呃上头，还处处侪挂满了换洗呃衣物、床（被）单，远远较看过去，就像是勒拉悬挂“万国旗”一样。
上海电视台有一档节目叫做“上海故事”，讲呃就是上海呃历史以及各类人事物情，其中有一集专门记录了“申城悬挂万国旗”呃场景，而且还讲“悬挂万国旗”是长盛不衰呃。也曾有人呼吁道，“悬挂万国旗”绝对是一道顽疾搭陋习，到处侪悬挂着万国旗，覅仅显得杂乱无章，还有碍观瞻，与上海是嗰国际性呃大都市是覅相称呃，要改掉迭种覅文明呃现象……殊覅知，其实是上海市民实实在在呃俗常生活，“悬挂万国旗”是由最初呃建筑理念、建筑样式、人口变化因素、所处呃年代，是邪气紧密呃联系勒拉一道呃，是呒得办法呃办法，更是覅得已而为之，假使讲每户人家呃屋里厢，侪都有晾晒悬挂衣物呃地方，绝对是覅可恁到处去“悬挂万国旗”迭桩事体呃。即便是历史走到了今早仔，上海迭座城市已经步入了现代化，现代化率也蛮高呃，勒拉市区里向依旧还保留（存）着覅少呃石库门房子哩，仍然呒得改变过去“悬挂万国旗”呃习惯。勒拉许多呃弄堂里向，还是有交关多“悬挂呃万国旗”，还依旧恁看到居民们公开晾晒呃衣裳。
假使是家庭主妇勒拉单休日里覅劳作覅洗刷呃辰光，又假使讲是勒拉冬天季节里向，伊拉又会得去做点啥呢？！伊拉就会得三五成群呃聚集勒拉一道排排坐，一边晒晒太阳结结各种绒线衫，一边嘎讪胡，山南海北呃讲讲张家长李家短、以及自家所了解呃各类趣闻轶事。勿单单是迭恁样子唻，相互之间还会得交流哪恁去编织好绒线衫。
三、讲讲普通老百姓勒拉单休日里向都做点啥
一些家庭主妇勒拉洗洗刷刷呃辰光，一些男人又会得去做啥呢？！其实伊拉也呒闲着噢，有些男人勒拉卖力呃擦着车；有些动手恁力邪气强、会点三脚猫功夫呃男人，勒拉做其他修修补补方面呃家务活；有些会点水木泥工呃男人，就会得自家设计动手做起了家具……
所谓呃“车”就是指“自行车”。中国曾经畀全世界号称为“自行车”王国，勒拉那些只有国定单休日呃日脚里向，老百姓呃俗常出行，假使讲只要依靠自行车就恁去解决出行呃，坚决覅会得去乘坐公交车噢，为呃就是恁畀屋里厢省一眼眼铜钿，省一眼是一眼，只因为勒拉掰搿辰光，每家每户呃经济条件侪都覅是邪气好呃，相互之间僎都是相差无几差大覅多呃。加之自行车又是每嗰家庭最为贵重呃固定资产之一了，经济条件稍稍好一眼呃家庭，会得有两辆自行车，夫妻俩嗰人各人一辆，“自行车”绝对是可以拿唻炫耀一嗰家庭经济实力呃么事。勒拉掰搿辰光呃男人，未必就会得比今早仔呃男人唻得勤劳整洁，只是因为购买一辆自行车，也覅是邪气容易呃一桩事体，手里单单只有铜钿也是覅唻三呃，还要“凭自行车票”才恁购买到。
为了恁够好好较保护好自家屋里厢最为贵重呃资产之一，更为了恁延长自行车呃使用寿命，而覅得覅迭恁去做噢。勒拉掰搿辰光、勒拉自行车上头，还会得去放上一块抹布唻，基本哴向小型呃擦拭，天天侪都会得去做呃，就是顺大便去擦一把，大型呃擦拭基本哴向是一嗰礼拜一趟，完整、仔细、认真呃去擦拭一遍，顶顶起码要有得两嗰钟头左右呃辰光噢，伊拉还会得畀整辆自行车擦拭呃精光锃亮一尘覅染，每当男人擦拭完车子以后，满手侪会得沾满了油污搭污渍。
假使讲是勒拉法定休息日呃日脚里向，还假使讲覅做各类家务事体呃辰光，男人还会得去做眼啥么事呢？！伊拉会得跑到各类旧货市场，去淘换一眼自家屋里厢需要去使用呃各类么事，一些有眼小本事呃男人，就会得跑到旧货市场去淘嗰半导体晶体管等各类零件回唻，自家去组装一嗰小收音机唻听听。就算上述事体一眼也覅大会得去做呃男人、啥么事也呒得呃男人，会得去报刊栏阅读当天呃壁报。
勒拉那些春暖花开呃好时节里向，也会得有踏青呃辰光，但畀过，是千年难般偶尔为之，也覅是经常性去做呃。覅像今早仔，只要有得铜钿搭空余呃休闲辰光，可以到处去旅游去白相，假使觉着国内游感到已经呒啥好白相了，还可以去国外旅游白相。勒拉那些单休日呃日脚里向，根本就呒得啥呃“旅游”搭“旅行”迭俩嗰词语呃概念噢。勒拉掰搿辰光，去“踏青”也就跟今早仔去旅游是一色似样呃。“踏青”勒拉绝大多数情况下头，侪都由男人（父亲）带领着。笔者就记得有得一趟仔，大概是勒拉自家读小学三年级呃辰光，父亲讲今早仔下半日带侬去共青森林公园白相。【备注：勒拉掰搿辰光，本人是居住勒拉有着800多年历史呃高桥古镇上头呃，距离笔者屋里厢最近呃一嗰公园就是要数杨浦区共青森林公园了。】勒拉公园里向划了船，坐了俩圈卡丁车，就整整白相了一下半日，心里向高兴得覅得了……
四、讲讲自家勒拉单休日呃日脚里向会得做点啥
勒拉国定单休日呃日脚里向，到了冬天季节里向还要去汏浴唻，迭嗰也算作是一桩头等大事体了，勒拉交关多呃男小囡身哴向侪都曾经生过老白虱呃，还是搭缺少汏浴呃缘故多多少少是有得关系呃。居住勒拉市区里向呃居民，屋里厢基本哴向是呒得啥呃浴缸搭卫生间设备呃，覅管是居住勒拉郊区里向呃居民，还是居住勒拉市区里向呃居民，即便有得卫生间设备搭浴缸呃家庭里向，勒拉天气炎热呃里向，还恁够去应付应付呃，一但辰光走到了大冬天里向，必然是难以承受吃覅消呃，覅像今早仔家家户户僎都有得空调搭浴霸呃，勒拉掰搿辰光是呒得迭嗰俩样么事呃，只恁是花1块洋钿，跑到公共浴室里向去汏一把浴。据说勒拉老底子呃辰光，去公共浴室汏一把浴，只要花五分洋钿搭一角洋钿就好去解决问题了，等到笔者独自一嗰人也恁够去公共浴室汏一把浴呃辰光，伊呃价格已经是上涨到了一块洋钿一趟了。辰光走到了今早仔，也去开设了覅少呃、各种类型呃大型浴场唻，有得啥呃欧洲式呃、罗马式呃、日韩式桑拿浴，最主要呃一嗰目的——就是奔着休闲而去呃，覅是去汏浴呃，更覅是冲着去搓老垢呃。
勒拉国定单休日呃日脚里向，家父是勒拉县城上班呃，然而笔者呃屋里厢是居住勒拉有着“营造之乡”、800多年历史呃高桥古镇上头呃，伊每嗰礼拜只好回唻一趟，每逢到了礼拜六呃日脚才恁回到屋里厢，每趟仔到屋里厢呃辰光，侪都是勒拉夜快头六七点钟左右。
由于家父迭嗰一辈子恁文覅恁武，是属于掰搿辰光大家口中所讲呃“啥么事也覅会、啥么事僎都是呒得呃一类男人”，简直可以去讲就是属于“手无缚鸡之力”，伊只会得去耍耍笔杆子，勒拉第三段里向所写呃有关于男人所做呃事体，通通搭伊呒得一眼眼关系呃。
尽管家父是迭恁样子呃一嗰男人，但畀过，勒拉老底子、就勒拉国定单休日呃日脚里向，还有俩桩事体，是伊眼扳数要去做呃。
第一桩事体就是：每间隔一嗰礼拜，下半日会带领笔者去看伊呃阿奶朱义义，还会买点吃呃么事，诸如苏打饼干之类呃小零食。
第尼桩事体就是：买汏烧，煤饼覅够用了，踏着黄鱼车跑到煤球店买买煤饼，去小菜场里向买买各类小菜，回来之后再烧烧小菜。勒拉掰搿辰光，笔者所居住呃古镇上头就有三爿小菜场，家父兴趣高涨起唻呃辰光，会得一天去逛两趟，三爿小菜场呃距离也覅是老远呃，而且还要带着笔者一道去哩，每趟去三爿小菜场侪要逛到家，伊可以花上三四嗰钟头去买菜，即便啥么事也覅买，也要问问菜价钿。
至今还恁够清楚呃去记得，勒拉掰搿辰光，荤小菜当中买得顶顶多呃就是要数带鱼搭公鸡了。带鱼中间段属于是邪气好呃部位，就拿唻红烧烧，头搭尼巴就属于交关推扳呃部位，就畀伊唻清蒸蒸。公鸡要买回唻自家去活杀，鸡呃血做嗰鸡血汤，鸡呃内脏会得配上花菜去炒嗰时鲜，鸡肉一半红烧烧，另外一半配上洋山芋，烧嗰咖喱洋山芋鸡块，偶尔自家屋里厢也会得去买些黄鳝，基本哴向一嗰季度左右去购买一到两趟，基本哴向每趟买半斤回唻。当时父亲买一趟小菜，要花忒铜钿二三十块，据家父讲二三十块小菜钿好去喫上三四天。
勒拉掰搿辰光，为啥只去买公鸡而覅去买母鸡呢？！只是因为公鸡尼巴呃羽毛勿单单是五颜六色呃，而且还邪气适合拿唻做毽子，就勒拉笔者读小学呃辰光，一到冬天季节里向，学堂眼扳数要求男女学生们自备或自带一些体育用品。比方讲：跳绳呃绳子、踢呃毽子、沙包之类呃各种体育用品，实际哴向学堂里向也是有得迭些体育用品呃，但畀过，因为学生人数太多了，各种体育用品交关少，呒办法分覅均匀，就只好让学生子自家去准备了。为了恁够畀屋里厢去省一眼眼铜钿银子，故而爷娘就会得用公鸡呃羽毛去做一只毽子，由于一只公鸡一趟只恁采集到一两根羽毛可以留用，剩下唻呃羽毛侪都是派覅着用场呃，因此，至少要去收集三四趟羽毛，才恁够去做一只毽子。
就勒拉国定单休日呃日脚里向，人搭人之间呃关系也要比今早仔唻得真诚跟融洽噢，勒拉掰搿辰光就覅像今早仔，嗰人是呒得啥呃私人电话呃，亲朋好友之间呃聚会也是用覅着事先去打啥呃招呼呃，想唻就唻想走就走，要是人覅勒拉屋里厢呃閒话，顶多就打道回府好了。家父呃好友蔡洪根先生自会得独自一嗰人，隔三差五呃唻到吾伲屋里厢白相相嘎嘎讪胡，而且每趟仔唻呃辰光，基本哴向僎都是要接近中哴向了，家父眼扳数要留伊勒拉屋里厢喫一顿中饭呃，要伊覅肯喫中饭、还要是饭覅喫好，绝对是覅肯让伊跑唻。伊迭嗰人还喜好去咪一眼眼小老酒，勒拉掰搿辰光呃家父，是一眼眼老酒也覅会得喫呃，但畀过，还是会去买几瓶啤酒搭黄酒放勒拉屋里厢呃，只要是蔡洪根先生唻到了吾伲屋里厢白相嘎讪胡，就恁去咪一眼眼小老酒了，尽管家父是覅会喝酒、滴酒覅沾呃，却允许笔者陪着客人喝一杯啤酒！
五、讲讲勒拉单休日里自家还会去做点啥呢
笔者屋里厢原唻是居住勒拉原川沙县、有着800多年历史呃高桥古镇上头呃，今早仔为浦东新区高桥镇，就勒拉浦东地区还有得老八样菜肴，所谓呃“浦东老八样”分别就是指：“八宝饭”、“扣蹄肉”、“扣三丝”、“走油肉”、“咸肉片”、“红烧鲫鱼”、“蛋饺（卷）”搭“三鲜肉皮汤”，还要外加一只什锦大拼（冷）盆，勒拉拼（冷）盆呃里向还放有“海蜇皮子”、“白斩鸡”、“猪肝”、“肚片”、“白切咸肉”、“花生米”、“松花皮蛋”搭“太仓肉松”。据笔者所晓得呃情况，勒拉上海呃覅同地区，伊拉呃老八样菜肴当中，搭浦东地区勿单单是略有覅同呃，还有一眼眼区别唻，伊拉就会得畀“桂花肉”、“响油鳝丝”、“百叶扣咸肉”等食物算作是老八样。
就勒拉浦东老八样呃菜肴当中，每年每逢到了秋冬两嗰季节里向，吾伲还会得自家动手去做蛋饺。勒拉掰搿辰光搭今早仔根本就覅好去比呃，今早仔只要侬手里向搛俩眼铜钿、有得铜钿，任何喫呃食品侪都恁去买得着呃，今早仔就勒拉各类大小型超市里向，僎都有得各种现成呃半成品食品可以去购买，就勒拉那些国定单休日呃日脚里向，科技远覅如今早仔唻得发达，就算屋里厢呃经济条件比老早仔要好得交关多了、还就算自家口袋里向搛俩眼铜钿银子了，是呒得啥呃半成品食品可去购买呃，绝大多数呃食品，侪都是靠自家做出唻呃。
勒拉掰搿辰光，自家去制作蛋饺，绝对是一道功夫菜，还要去考验着制作者呃耐心哩，要是伊本人是呒得一丁点呃耐心，绝对是做覅好蛋饺呃，要么覅要去制作蛋饺，要去制作蛋饺了，顶顶起码要花忒半天功夫。吾伲勒拉掰搿辰光，每家人家侪是用煤球炉子去制作蛋饺呃。还恁够清楚呃去记得，蛋饺呃制作全过程是迭恁样子呃：事先就要畀买回唻呃猪肉清洗干净并切成肉糜，猪肉呃比例是迭恁样子呃，70％到80％为精肉，20％到30％为肥肉；勒拉肉糜里向，还配有一定比列呃“料酒”、“盐”、“葱”、“酱油”搭“胡椒粉”，还要去搅拌均匀；畀蛋打散成蛋液，所使用呃蛋僎都是鸡蛋，再勒拉蛋液里向去添加一眼眼水淀粉，也同样是要搭蛋打散搅拌均匀呃，笔者还记得勒拉掰搿辰光呃鸡蛋还是有一眼厚实呃，家父还会得添加一眼眼凉白开水；拿一嗰烧菜用呃铁勺子，而且迭只铁勺子呃大小，邪气适合去制作蛋饺，所以讲，迭只铁勺子，既好去炒菜，又好去制作蛋饺。预先勒拉火上烧热，再勒拉勺子里向抹上一层猪油，放上一调羹蛋液，不停呃去旋转勺子使鸡蛋液铺均匀，放入适量呃肉馅，等到蛋皮凝固了，然后将上下两边对折即可拿出，依次循环往复呃去制作，直到畀蛋饺侪都去做好；若是还有剩余呃蛋液，吾伲会去做嗰蛋皮卷。
虽然笔者本人基本哴向是做大覅唻各种家务事体呃，但是对哪恁去制作好蛋饺，还有得一眼眼精通呃。还为啥本人会得对制作蛋饺呃全过程记得交关清爽呢？！只因为就勒拉掰搿辰光，每家每户还勒拉用煤球炉子呃辰光，家父曾经亲自教会了本人是哪恁去制作好蛋饺呃。之所以家父要教会本人去制作好蛋饺，只因为有得一趟仔，家父讲自家今早仔觉着身体有眼覅大适宜要去睏忒一觉，教会了笔者以后，就去做了一下半日，从中哴向12点钟一直做到夜快头五点半左右。
勒拉那些国定单休日呃日脚里向，一周只恁够去休息一天，就显得交关弥足珍贵了，正是因为显得交关弥足珍贵呃缘故，有一些头脑邪气活络、人脉关系又是邪气广泛呃人，自会得去想尽所有呃办法搭手段，畀自家去增加休息日，一定要想方设法去混嗰“病假”或“病休”，就要去寻人托嗰医生，跟医生去搞好私人关系，开一眼头疼脑热呃病假，哪怕只恁休息半天也是好呃，至少勒拉迭嗰半天里向，覅需去劳作点啥了，覅像今早仔，真有了“病休”还未必恁休息！
勒拉那些国定单休日呃日脚里向，休息日呃一天总是迭恁行色匆匆呃过去了。勒拉老底子远覅如今早仔，畀“单休日”一律去定义为“休息日”，今早仔呃“两天休息日”畀定义为了“休闲日”，就勒拉两天休闲日呃日脚里向，假使讲，碰到了自家心情大好呃辰光、还假使讲自家实在是覅愿意去做家务事体呃閒话，或一家三口，或约上一帮亲朋好友，去周边呃省市唻嗰休闲游，放松一下心情，畀自家搭家庭唻一嗰缓冲，以便勒拉未唻呃日脚恁走得更好、更为长远！
从“过去呃纯单休日休息日”，演变到今早仔呃“纯双休日休闲日”，勿单单是一嗰时代去跨越到了另外一嗰时代，更是从“老底子交关苍白呃日脚里向”跨越到了“多姿多彩五彩缤纷色彩斑斓呃日脚里向”，实际哴向彼此之间还是一脉相承呃，虽然讲，勒拉那些苍白呃单休日休息日里向，也有得自身独有呃一种情趣搭趣味，恐怕任凭啥人侪都覅愿意回到老底子呃日脚里向去了，覅管是啥呃人，僎都覅愿意去走老路呃，勒拉某些辰光顶多也就拿唻回眸一下罢了……
【备注：①文章为作者原创；②各种和文章有关的图片均来源于网络上；③感谢原创图片。】
杜老倌侠客居（陆伟）写于2018年11月30日星期五晚上
网友评论