笔者是土身土长呃上海人，勒拉笔者所在呃城市上海滩哴向、勒拉老底子，每年只要是步入到了夏天季节呃辰光，可以讲是骄阳似火，辣火火呃日脚是邪气难过呃，即便是辰光到了天气逐渐变得凉爽呃秋季季节，假使畀一波“秋老虎”给袭击忒了，照样会得酷热难耐让人交关难过噢。有得某些居住勒拉市区里向呃居民、勒拉空调还呒发明、还呒跨入到千家万户之前，覅管是居住勒拉老式石库门里厢呃居民，还是居住勒拉新式里弄里厢呃居民，尤其是居住勒拉顶楼（层）上头呃居民，伊拉眼扳数会得勒拉夏秋季节即将要到唻呃前头，跑到房管所去打一嗰申请报告，为呃就是好去开一嗰“老虎天窗”，以便让空气恁够多去流通一些，从而使得整嗰屋子里厢，多多少少恁去降降温，还可以让屋里厢变得凉爽一眼眼。顺便要去讲呃一句閒话就是——“老虎天窗”是上海人独有呃建筑样式，其他地方是呒呃。
笔者从一些历史文字资料跟历史纪录片当中看到了，国家是勒拉1978年呃11届三中全会当中提出了“改革开放”迭嗰口号跟决议，但畀过，全中国全面执行“改革开放”，还要勒拉二十世纪九十年中期以后唻，勒拉迭嗰前头、勒拉绝大多数呃城市里向，依旧还是处勒拉“计划经济时期”噢，一切人事物情侪要去听从政府各个部门呃计划安排，假使呒得计划安排，侬想啊覅要去想了。就算勒拉夏秋季节快要到唻之前，即便是去申请打了“开老虎天窗”迭嗰申请报告，假使呒是勒拉政府有关部门计划安排里向，房管部门（房管所）也覅一定肯去办理、去做啊。勒拉掰搿辰光呃老百姓，只恁是八仙过海各显神通了，大家侪会得一道去寻门路托关系找朋友开一嗰老虎天窗，而且最好是越快越好，为了畀“开老虎天窗”迭桩事体恁够一枪头就办好、就去办成功，自家也愿意多花忒一眼铜钿也是无所谓呃，今早仔呃日脚、情况跟老底子已经是覅大一样了，吾伲到处侪勒拉提违章建筑、举报各式各样呃违章建筑、还要花大力气去拆忒各类违章建筑，覅晓得勒拉掰搿辰光去开一嗰老虎天窗，是否也是属于违章建筑？！
同样是依据笔者去查阅了所恁查阅到呃各种历史资料以后晓得了，吾伲国家是勒拉1974年才开始研发空调呃，上海滩至少也要勒拉二十世纪九十年中期以后，侪逐渐开始去普及使用空调噢，勒拉迭嗰前头、勒拉上嗰世纪八十年代至九十年代中期前头，每家每户屋里厢侪开始拥有各式各样呃电扇，比方讲：吊扇、落地扇跟台扇，【备注：勒拉掰搿辰光，迭嗰三种电扇有得其中之一呃人家，已经好算是家庭条件邪气好了，假使拥有两件就恁算作大户人家了。】加之，勒拉掰搿辰光电压是覅大稳定呃、电量又是交关狭小，假使有得好几家人家同时勒拉开启好几件家用电器呃閒话，是邪气容易断电呃，只要是一到天热家，避暑呃方式就是去“乘乘风凉”。有覅少呃人家会早早喫好夜饭汏好浴，拿上屋里厢呃小板凳跟蒲扇，跑到弄堂口去乘风凉；有些人家会得边喫夜饭边乘风凉；有些人家会得边读书报边乘风凉；有些人家会得边下棋打扑克牌边乘风凉……勒拉乘风凉呃前头，多数人家会得勒拉地面上头去喷洒两三趟清水，为得就是恁够去畀地面降降温，之所以要迭恁样子去做，勒拉乘风凉呃辰光，多多少少恁变凉爽一点。另外一点也是要去讲清爽呃，为啥要跑到弄堂口乘乘风凉呢？！只因为勒拉弄堂口多多少少有得穿堂风，乘起风凉呃辰光恁凉快一眼，勒拉掰搿辰光，乘风凉起码要乘到半夜里以后，再回到自家屋里厢。
假使吾伲碰到了一些充满着生活情趣、有得一眼眼小资情调呃人家跟家庭，伊拉勒拉乘风凉呃辰光，眼扳数要勒拉自家呃身哴向去佩戴两朵或栀子花或白兰花噢，不仅伊拉自家会得去佩戴两朵或栀子花、或白兰花噢，伊拉还同样会得畀自家呃子女去佩戴上栀子花跟白兰花哩，栀子花跟白兰花淡淡呃、似有似无呃自然幽香咪道，霎时间就会得侵入到人呃口鼻当中，还一直要通到肠胃跟脑子里向唻，咪道是邪气好闻呃，就勒拉迭嗰辰光人呃精神面貌也会变得清爽一眼，迭嗰是老底子上海人最最欢喜去闻到呃三大香咪道之一了，剩下唻呃两道香咪道分别就是——“花露水呃香咪道”跟“檀香扇呃香咪道”。
勒拉笔者呃青少年时期，由于自家呃身体状况是邪气弱小、小模小样呃缘故，加之自家身体还有得一眼黄牛肩胛噢，基本哴向是买覅到交关合适呃衣裳跟皮带呃，衣裳只恁去量身定做，皮带只好去购买吊带型呃皮带，勒拉大多数情况下头，侪是穿吊带裤子呃，母亲也会得勒拉一些有得卖栀子花跟白兰花呃季节里向，去购买上几多栀子花跟白兰花噢，更会得勒拉笔者呃吊带裤子上头，左右各去佩戴上两朵或栀子花或白兰花，不单单是迭恁样子哩，母亲伊自家也是会得去佩戴呃，母亲之所以会欢喜佩戴栀子花跟白兰花，最最大呃一嗰原因就是——受到了外婆张榴妹呃影响，外婆张榴妹之所以也会得欢喜去佩戴栀子花跟白兰花，侪是因为伊本人交关欢喜去闻迭两种花呃香咪道。勒拉笔者青少年呃辰光，多多少少是有得一眼眼轻骨头跟贱骨头呃，还因为是出于好奇之心，自家就会偷偷较去摸栀子花跟白兰花呃花骨朵，只要是畀母亲发觉看到以后，就会大声呃唻对吾训斥道：“覅好去触摸伊呃，要是去触摸了，花骨朵就会得发黄枯死忒了，花瓣也会逐片呃掉光，到辰光侬再想闻迭种花香咪道就闻不到了！”……
笔者呃外婆张榴妹，勒拉伊生前呃辰光，不单单是交关欢喜各种鲜艳美丽呃花朵噢，还邪气欢喜去闻闻各种花朵呃香咪道，伊本人交关欢喜去闻栀子花跟白兰花呃香咪道了，伊本人还是迭恁样子唻理解并认为呃，伊就对笔者唻讲道：“栀子花跟白兰花是老天爷赏赐畀人世间最最好闻、最最香呃花香咪道了！”只要是到了那些有得卖栀子花跟白兰花呃季节里向，伊眼扳数要各去买上两朵带回屋里厢，一朵会得放勒拉衣橱里向，另外一朵就佩戴勒拉自家呃身哴向，以便恁够随时随地闻到迭两种花朵呃香咪道。伊还会继续对笔者迭能样子唻讲道：“侬晓得外婆身体覅是顶顶好呃，浑身上下侪有得毛病呃，闻到了迭嗰两种花朵呃香咪道，就好像自家呃身体也会去变得交关好了，毛病跟病痛也会随之减少了邪气多，真呃可以讲是神清气爽唻，侬还是一嗰小囡，生活方面覅一定侪是懂得呃，还要去多学习学习噢，迭两种花香呃咪道对衣裳跟被子还有得防蛀虫防霉功效哩！”……
自从笔者晓得了外婆张榴妹邪气欢喜闻栀子花跟白兰花呃香咪道以后，本人从开始工作呃第一年起，每逢到了有卖栀子花跟白兰花呃辰光里向，只要看到街上跟大马路哴有卖栀子花跟白兰花呃摊位，起码要买上四朵或白兰花或栀子花送畀外婆，伊看到了以后，总是会一边眯开眼笑笑得合不拢嘴，一边夸赞笔者是嗰有良心呃好小囡。
勒拉笔者呃印象里向，那些卖栀子花跟白兰花呃人，主要还是以乡下农村里向呃老阿奶为主，有一些市区里向呃老阿奶也同样会得去卖栀子花跟白兰花，不单单是迭恁样子，而且卖栀子花跟白兰花呃老阿奶是呒得一嗰固定摊位呃，伊拉侪是以打游击呃形式，勒拉那些天气晴朗呃日脚里向，今早仔可恁是勒拉迭嗰地方卖栀子花跟白兰花，到了明早仔有可恁勒拉另外一嗰地方去卖栀子花跟白兰花，所选择呃地方，往往侪是那些人来人往人流量交关大呃区域里去做买卖。
伊拉一边勒拉卖栀子花跟白兰花辰光，还会得一边去叫喊道：“栀子花白兰花要覅要买伐啊！要伐栀子花唻白兰花唻！”……也有极其少数、嗰别摊位呃老阿奶是覅大会得去叫喊些啥呃么事呃，吾伲假使去购买了，伊会得认真仔细呃服务，覅买也覅会得强求些啥呃！
勒拉通常情况下头，栀子花跟白兰花一朵是覅肯售卖呃，起码是要两朵侪肯去起卖噢，伊拉还会得畀两朵花用一根细铅丝串联勒拉一道，并去做成一嗰弯型呃钩子，以便于携带（佩戴）勒拉身哴向。伊拉总归是挎着一嗰竹制呃大篮头，勒拉大篮头呃最最底部，还去放置一块蓝印花布，勒拉花布上头就铺满了大大小小呃栀子花跟白兰花，再勒拉大篮头呃上头搁一块木板，木板基本哴向侪是以汏衣裳板子为主噢，有得韧条纹呃放置勒拉下头，平面呃就朝上头放置，勒拉木板呃平面上头，还会得去铺上一层要卖呃栀子花跟白兰花，再勒拉栀子花跟白兰花呃上头，还要去铺盖一层白颜色呃、薄薄呃纱布唻，每过忒一段辰光，老阿奶还要勒拉纱布上头去喷（洒）一眼眼水，之所以要迭恁去做，最终目的是防止栀子花跟白兰花马上变得干裂，假使最上头呃栀子花跟白兰花越卖越少，就从蓝头里向拿一眼出唻……
笔者自家也覅晓得到底是啥嗰原因，自从外婆张榴妹勒拉2008年2月16日礼拜六以虚岁91岁驾鹤西去以后，一直算到今早仔，即便是到了那些有得卖栀子花跟白兰花呃季节里向，还即便看到了有得卖栀子花跟白兰花呃摊位，就再也呒得去购买过栀子花跟白兰花……
【备注：①文章为作者原创；②各种和文章有关的图片以及各类文字动图图片均来源于网络上；③感谢原创图片。】
杜老倌侠客居（陆伟）写于2016年08月07日星期一晚上
网友评论