笔者是土身土长呃上海人，勒拉笔者所在呃城市上海，还勒拉笔者呃少年辰光，也就是勒拉读小学呃辰光，尤其是居住勒拉乡镇呃居民跟农民，每逢过新春佳节呃前后僎有得“摆年夜饭”呃习俗。
勒拉掰搿辰光，笔者自家并覅晓得啥呃叫做“摆年夜饭”，要等到本人长大成年以后侪去明白呃。所谓呃“摆年夜饭”就是指：大人（祖辈）们事先先要去烧好邪气多呃各类美味佳肴（小菜），迭些小菜吾伲小辈们还覅恁先去喫噢，要畀另外一嗰世界呃老祖宗先喫，等到“伊拉喫好了以后”，吾伲僎可以去喫，要不然，绝对是覅唻三、覅可以呃。勒拉一般情况下头唻讲，“摆年夜饭”呃迭种习俗只会得提前，而绝对覅会得往后头去突突拉拉牵丝扳藤呃摆到最后噢，最最晚也要勒拉正月大年初一迭嗰一天全家去“摆年夜饭”。虽然笔者所在城市呃城市化率，要比其他省市唻得要高出交关多噢，但畀过，当辰光走到了今早仔，还是有得覅少呃家庭仍然保持着迭种习俗唻。
当笔者身处勒拉少年时期呃辰光，国家还处勒拉计划经济时期，勒拉迭嗰时期里向，基本哴向买卖各类么事，侪都要去凭票证唻供应呃，比方讲：买“糖”要有得“糖票”；买“副食品”要有得“副食品票”；买“食用油”要有得“食用油票”……凡是种种真呃可以去讲不胜枚举噢。但畀过，每逢到了新春佳节里向、过年呃前后头市场供应量，眼扳数要比平常日脚多一眼眼，也恁够去多买一眼眼，尽管是迭恁样子，为了“摆好年夜饭”、过好年（春节），至少也要从第四季度开始，采办（购买）“摆年夜饭”跟“过年”所需呃菜肴。
勒拉掰搿辰光，无论是勒拉“摆年夜饭”呃辰光，还是勒拉“过年呃辰光”，“鸡鸭鱼肉”绝对是覅可缺少呃四样菜肴哩，覅单单是覅可缺少呃四样菜肴噢，而且迭嗰四样菜肴僎都要去上齐全的，少忒了一样菜肴（小菜）还覅唻三、覅可以啊。还比方讲：上鱼就要上一条鱼，覅恁去上半条鱼噢……勒拉平常日脚里向，由于每家每户呃经济收入，覅仅仅侪都是相差覅大差大覅多呃，还外加各种小菜基本哴向是要凭各类票证去限量供应购买呃，所以讲，迭嗰四样菜肴（小菜），吾伲顶多只恁去喫到两样。有得许多居住勒拉城镇哴向呃家庭，有得环境条件条件允许呃情况下头，是自家去向农民购买刚刚孵化出唻呃鸡鸭散养，等养到了“摆年夜饭”跟过“新春佳节”呃辰光再备用。之所以要迭恁样子去做，覅单单可以帮屋里厢省一眼眼铜钿，而且还覅必为了购买覅到鸡鸭而去发愁了。自家还恁够清楚呃记得，因为勒拉老底子老爹阿奶屋里厢，还有得一嗰交关大呃大后院子唻，后院子呃后头还有得一条小河浜噢，所以每年等到过年结束了以后，每趟仔只要是到了三四月份呃辰光，僎会向农民老伯伯购买刚刚孵化出唻呃八只鸡跟五六只鸭子，散养到“摆年夜饭”跟“过年”辰光用。
除忒笔者上述所讲呃四样菜肴（小菜）以外，勒拉每家每户呃屋里厢，至少还要去配上一套两只盘（盆）子唻，迭嗰两只盘（盆）子分别就是指：“什锦大拼盘（盆）跟鱼盘（盆）”，而且迭嗰两只盘（盆）子勒拉平常日脚是覅去使用呃，一年也就去使用一趟，是勒拉过年过节呃当中去使用呃。勒拉“什锦大拼盘（盆）”里向堆满了只有勒拉“摆年夜饭”、“过年”呃辰光，侪可以去喫得着“各类美味佳肴”，比方讲：太仓牌呃肉松、松花皮蛋、金华火腿等等……
勒拉“摆年夜饭”呃辰光，先要去做好呃一桩事体就是——摆铺好桌子跟凳子，再勒拉桌子上头摆上一排排碗型呃小酒盅跟筷子、一只香炉跟两只烛台，小酒盅里向倒满了老酒，老酒既有得黄酒也有得白酒，再勒拉香炉跟烛台里向插上三支香跟两只蜡烛，还要勒拉台子呃前头放上一只厚厚呃垫子，到了迭嗰辰光，大人跟祖辈们自会得唻大声呃招呼吾伲迭帮子小辈们，就会得开口去讲道：“乃么就从现在开始了，那迭帮小囡（鬼）是覅可以去碰着（倒）桌子、凳子跟垫子呃，要离迭块地方稍微远一眼眼，假使是侬覅小心去碰着、惊扰到了老祖宗，就勒拉迭嗰一年，屋里厢大大小小呃人，僎都会触霉头、走霉运呃！要是畀大人发觉了，侬去碰着、惊扰到了老祖宗，用覅着吾伲大人多去讲眼啥么事呃，绝对是覅会得对侬客气眼啥呃，眼扳数要请侬喫一顿生活竹笋烤肉呃，要记记老，魂灵头生生牢！”……
等到了各类美味佳肴（小菜）烧好了，侪都摆满了一桌以后，乃么要开始点燃香跟蜡烛了，迭嗰辰光呃屋里厢也会得变得炊烟袅袅呃，但畀过，还要等到了香跟蜡烛燃烧了一小段辰光以后，所有屋里厢呃人，从大到小要依次畀老祖宗去磕三嗰响头，吾伲一边畀老祖宗磕头呃辰光，一边还要去烧一些锡箔，勒拉一般情况下头，僎都是要等到了香跟蜡烛燃烧到了三分之一呃辰光才开始去做迭桩事体呃。一些大人跟祖辈们，尤其是祖辈们从开始一直要到结束，嘴巴里向还会得不停呃念念有词，讲啥么事要去保佑吾伲迭嗰一家人家，勒拉迭嗰一年哴向，侪都恁够去拥有一嗰健康良好呃身体，大家覅单单都恁够过得太太平平平平安安，而且还要希望勒拉另外一嗰世界里向各位老祖宗大人们，恁够去保佑吾伲迭嗰一家人家，勒拉迭嗰一年哴向僎恁够平安顺利过关……反正通通讲呃侪都是各种邪气吉利呃好閒话……
实际哴向，就勒拉笔者呃少年辰光里向，老爹阿奶呃屋里跟外公外婆呃屋里僎都有得“摆年夜饭”迭嗰习俗呃，“摆年夜饭”也侪都是跟“过年”辰光放勒拉一道呃，但畀过，因为勒拉掰搿辰光，唯有勒拉过年呃辰光，才恁畀所有呃家人全部聚集齐全噢，还因为勒拉掰搿辰光，笔者屋里厢呃居住地，离老爹阿奶呃屋里厢唻得邪气近，走路过去顶多也就勒拉十唻分钟左右呃路程啊，所以讲勒拉大多数情况下头，僎都是勒拉老爹阿奶屋里厢“摆年夜饭”、“过年”呃。
勒拉吾伲小辰光，也就是勒拉读小学呃辰光，真呃可以讲是天覅怕唻地覅怕、天老大地老尼唻吾老三，覅怕爷娘跟长辈，老是欢喜畀伊拉所讲呃各类閒话，当做耳旁风覅理覅睬呃，唯独就惧怕老师所讲呃各类閒话，畀老师所讲呃每一句閒话，侪都当做圣旨唻看待呃，句句僎都听进去放勒拉了心里向。大概是勒拉笔者读三年级呃辰光、勒拉开始放寒假前头，老师对吾伲学生子讲：“过年‘摆年夜饭’、‘还要磕头’，是勒拉搞封建迷信活动，迭恁样子去做既是覅对呃，也是覅好呃，吾伲要破除封建迷信！”……从迭嗰一年过新春佳节开始，死活也覅肯磕头，讲老师讲过呃，磕头是封建迷信要去破除，阿爸跟姑父哪恁去规劝笔者，就是覅肯去磕头，气得阿爸只好作罢……
【备注：①文章为作者原创；②各种和文章有关的图片以及各类文字动图图片均来源于网络上；③感谢原创图片。】
杜老倌侠客居（陆伟）写于2017年02月02日星期四晚上
网友评论