旅途写生对于我嚟讲，唔係上载社交媒体扮文青，或者係因为彰显个性先去做嘅嘢。事实係，一边旅游一边画画，可以慢慢品味呢个世界嘅丰富多彩，同样一双眼，可以发现更多细节。
偶然得到一支MUJI万年笔，用完墨水，一直都想买墨囊更换。喺香港MUJI，等店员入仓库攞墨囊嘅期间，顺手拎起本方便随身携带，完全空白嘅簿。抚摸簿纸，手感细滑，纸质轻薄之余又有重量感，指尖划过木嘅颜色，沾上木嘅香味，实在爱不释手。MUJI嘅钢笔同速写簿，即将成为我嘅旅行伴侣。遇上呢本簿，我觉得係缘份。可以带着佢旅行，记录各个地方各种难忘片段，谂下都开心。
空白得可爱的簿，恩准它陪我着走
我爹哋鼓励我写生，但立志拎本簿出门嘅念头，源自一个好友嘅提议。写生系好特别嘅记录方式。相你可能随便影，揿快门，点一下就完事，于是随随便便就塞几千张相喺储存卡，有三分之二重复。但画就会更加慎重，就好似以前用菲林影相噉精打细算，要选好景，拣角度，谂定主次分明，先落笔，因为一落笔，就废一张纸，冇人想自己张画乱七八糟。当你拣好要画咩，你就确定咗，要用呢一个画面，代表呢段经历，日后勾起呢段回忆。正正因为呢个画面带有感觉又有想法嘅，就更加珍贵。
斋望唔会留意嘅嘢，当你执起笔同簿，就好似一个花花世界展现眼前。所有景物都会变到清晰，逃唔出你眼睛。电视剧《张保仔》就有一个桥段，陈展鹏演嘅贼王，户外写生是掩人耳目，实际係暗中侦察，记录地形，预谋作案。
香港夜色中嘅货运码头，一笔一笔画你会爱上有条不紊的生命力
不过同精确嘅地图测绘唔同係，艺术并非追求100%无误差，可能只有20%嘅真实，觉得唔重要，就会省略或者轻描淡写。重要嘅係嗰一刻令你心动嘅事物。当我去到契迪龙寺，我决心将宏伟嘅佛塔遗址画低，蓝天阳光下嘅断壁残垣纵然冇传统佛塔金光闪闪，但崩裂嘅红砖，破损嘅象雕，染上炭黑嘅楼梯，当然更带有残缺嘅壮丽。
有限嘅旅行时间冇办法令我将所见全盘刻印纸上，但重要嘅东西会更为深刻
我当然画得好业余好初哥，摆出嚟贻笑大方，但既然只系画俾自己做留念，倒冇咩所谓，当下心动嘅瞬间先係重要嘅，而画画正係可以通过内化再转化，使呢个瞬间更特别更深刻。至于提高技法就交俾平时去完成了。
呢个人踎喺寺庙前影相，影咗好耐。我係影低画面，返到旅馆再画嘅。
我喺素贴山双龙寺佛塔前走廊坐低速写，呢个过程帮助你睇得更仔细，而且写生本身都系好特别嘅体验
讲笑噉讲，再修炼多啲，或者都可以靠卖明信片搵食了
每个人都有特别嘅方式记录旅程，纸笔于我嚟讲，係一种类似存档案嘅一种方式，将最值得纪念嘅嘢，用我认为最啱我嘅载体，保管喺身边。你都不妨试下？
网友评论