成为酒店正式员工之后，主管罗杰将阿飞调咗去方机组。洗衣房嘅每日工序系从一间叫布草喉嘅房里面收集从三十层房间换落嚟嘅被套，床单，浴巾，面巾，枕套，用桶车推送过嚟水洗机组清洗，洗完如果系比较厚嘅诸如餐厅台布，浴面巾之类就再送风干机组风干到七，八成，最后统统经大烫机烫干净，折整齐一车车再由布草房推走出去等领用，所以方机组里面又分水洗机组同风干机组。花园酒店洗衣部所有设备都系外国进口，有唔同类型洗衣机8部，风干机4部，系当时最先进嘅洗衣房。操作二米高一米半阔嘅巨型洗衣机，要编排洗唔同衣物，用唔同洗涤程序，配合落唔同嘅洗涤剂，否则二百斤一机嘅布草系永远洗唔干净。方机组系个有啲技术含量嘅工作岗位，对于洗衣房仲系比较重要嘅岗位，好多时都要独当一面，调嚟哩度证明主管睇得你起。阿飞惗住反正识多啲嘢无坏，将来出去搵嘢做都怕有用处，而且大烫组嗰边宜家无嗮男仔，留喺度都无意思。
阿飞一直都好想同佢拍档嘅高佬健，系同佢一批签合同，调咗去布草喉，同一个老员工叫老嘢嘅拍档，两人负责一早返嚟执布草。矮仔强原来就系啱考完车牌，因为喺实习期无车开，先入嚟酒店做。佢以前系喺街边摆地摊，饱经过好多世故，每日返工都系醉醺醺，做嘢求其儿戏。督导阿毛曾经话过好快炒佢，果然就唔再见佢返工。阿飞见到矮仔强就好似见到自己未来嘅样板，一时之间渺茫起心。
方机两个组总共有6个人，组长就系茹女。阿飞惗唔到做咗老同学女友嘅下属，想想都好笑。另外4个：高佬辉，大象，雄仔，一个阴阳怪气傻傻哋嘅女仔阿清，茹女同大象都话佢系诈傻扮懵，其实精过鬼，偷鸡蛇王专会搵人笨，系个世界女。嚟咗几日，阿飞就感受到哩度嘅冷漠气氛，高佬辉同雄仔喺风干机组，极少过嚟。大象个人一副高深莫测嘅样，唔多想同人倾谈，而且经常做做下嘢就不知所踪，连组长茹女有时都一样，撇低个乜都唔识嘅阿飞喺度看机，冷冷清清。好在啱啱过嚟，好多嘢要学都唔觉得太闷。花园酒店楼高房间多，员工近二千人，每日替换工衣数量惊人，基本占水洗组半日时间，4个人仲要负责将邋遢工衣逐件搜袋分色，以防有囄色嘢染坏一大机衣物，哩样系水洗组最烦嘅工作。洗工衣又要控温又要称准洗涤剂，因为酒店工衣大部分都系色彩鲜艳嘅布料，稍一不慎就容易洗坏。
当阿飞对开机，落料，控温能操控自如，每到下午开始洗工衣，大象就通常自动无影无踪，茹女要照应两个组两边走，安排边啲最赶衣物先洗，先风干，以便应对布草房催促，方机组嘅工作每日都系好紧张。分拣工衣就多数由阿飞，阿清两人做，有时大象返嚟，阿清借头借路马上消失唔见，水洗哩边好像永远都系只得两个人做嘢。
89年元旦前一日，工衣特别多，因为酒店员工都想赶喺节日前替换定干净工作服。仲系得阿飞，阿清两个分拣工衣，同阿清拍档，阿飞同佢无咩嘢讲。不过阿清会自己同自己解闷，自己唱歌自己听，益己娱人，唱得兴奋仲得戚咁要阿飞讲歌名出嚟由佢唱，咁样都几好玩，彼此之间工作轻松唔少，做嘢无咁死闷。
“你识唱鲍翠薇嘅《期待》咩？”
“期待，我又期待，”阿清开口就唱“但我心似在世外、、、、、、咦，你执咗咩入袋？”阿清突然停低，机警咁盯住阿飞问。
“无嘢啊。”阿飞心慌，口气都唔对。
“呃我，肯定系钱。”阿清满有把握。
“我都唔知系咩，好似系外币。”阿飞从裤袋小心翼翼翻出一张。
阿清一手抢过去：“哗，系美金啊。”
佢睇睇面额：“先系10文。”
停咗一停，话：“肯定唔止一张。”狐疑嘅目光盯实阿飞，阿飞小心翼翼又从裤袋翻出一张，图案有啲唔同。
“哗，100文美金啊。”
连阿飞都吓一大跳。
“我咁大个女，开张以嚟做咁耐都未见过100文美金，成日听到佢哋拣工衣执到钱，但都未听过有人执过咁大笔，有人嚟追问好大锅咖。”阿清讲完又憎恨自己：“你阿妈，我拣嗰件工衣唔得嗝？”
阿飞惊起嚟一时都六神无主：“咁我交去办公室啦。”慌失失就要行。
“我就唔交啦，不过嗰啲系你自己嘅事。”阿清怂恿到。
阿飞贪念起亦唔甘心交出去，“我去问问茹女。”突然想起总算有个可靠朋友。
“唔好去啊，”阿清即刻制止：“你傻嗝？多个人知道仲容易衰，我唔讲出去，你放心。”两个人一边讲一边继续分拣衣物，阿飞个心定咗啲：“又唔系偷，怕咩啫。”
阿清唔出声一阵，又讲：“你放喺身上好危险嗝，一阵有人搵到嚟就出事啦，不如攞嚟俾我帮你藏起先？”
“唔使。”哩个阿清真唔系食斋，不过都提醒咗阿飞。惗咗一阵，借口话去饮水，见阿清望佢唔到闪入去厕所，从裤袋翻出5张美金，将钱收埋喺座厕上头天花板里面，然后气定神闲施施然返翻喺阿清面前继续分拣工衣。
“收埋喺边度啊？”阿清心知肚明。
“无人搵到嗝。”阿飞自鸣得意。
“喂，110文美金值得好多钱，宜家美金兑换好高，又好市。喂，我都应该有份呱。”跟住探问：“就个尾数呢？”
“得啦，等过咗风头无事先，搞掂搵你食饭。”阿飞心惗听日开始元旦放假连休两日，再返工就过海神仙乜都诈唔知。
阿清见佢无嚟诚意又唔忿：“食饭咁低庄，嘿嘿，咁大笔钱实有人嚟搵，办公室一查，炒硬。”
“炒。”哩下即刻点中阿飞死穴，成个魂飞魄散咁藕嗮，脚都好似企唔稳，只系机械式，条件反射将工衣按色分类。啱签嘅正式合同实际要过元旦先正式开始，如果被人查出，搵够钱学车嘅计划岂唔系前功尽弃？宜家离随时随地通知开学肯定越嚟越近，槽钱唔多，行出社会实死梗。今次做错啦，阿飞真切体会到不义之财不可贪，一失足成千古恨等前人警训。但你要佢认错？无可能！佢咁大个人都未认过衰仔，喺街度摆档，撩事，唔理你米八又好，二百斤又好扑上去就先出手，佢系唔识死嘅人。老窦经常闹佢最多嗰句就系：“你都未死过。”佢心嚟惗：“咁边个又死过？”宜家感到前景绝望，惊慌失措，先发现自己竟然开始有识惊嘅弱点。阿飞好唔容易等到落班，带住失常，鬼鬼祟祟从厕所攞返啲美金，迅速换衫返屋企，一直感觉好似被人追咁。
元旦休息两日都周身唔自在，自己总结出啲钱开头就唔应该要，又唔知边个国家嘅钱？值唔值钱？然后唔应该俾阿清见到，死都唔应该攞出嚟，仲俾佢知道有过百文美金咁多，触发起佢贪念，日后手尾要长。宜家既然攞咗返嚟，就唔应该惊青，天跌落嚟都的起心口面对。
3号返工，一切风平浪静，办公室无开过咪叫人。阿飞完全心定嗮，只系见到阿清又开始心虚不安，觉得佢啲眼神意味深长，阿清仲喺一大堆人嘅时候故意问美金汇率黑市咩价。过两日下午又到只有佢两个分拣工衣，阿清话有人嚟搵过啦，罗杰好重视，叫咗茹女入办公室，茹女一口咬住好多员工喺其他地方跌咗嘢就经常咬定喺洗衣房唔见。“佢讹诈我。”阿飞惗，自己留意咗几日，一啲都未见过佢讲嘅迹象，虽然佢唔敢四围打听怕引人猜忌。不过阿清始终有心病系自己心腹大患，要惗下办法。阿飞嘅办法有两种：对付哩种女人搵人打佢一锅金嘅吓窒佢，或者俾少少钱拉埋佢落水，要炒一齐炒。
阿清日日一味问宜家啲美金点样？使唔使佢帮手搵人换？阿飞同佢讲已经俾咗朋友扐去搵人换拖住佢。日日就感到周围危机四伏，又好似被人用导火索绑实迟早要爆大锅咁。夜晚发梦行行下路，脚下面突然变咗一条钢丝索，吓一身冷汗，或者梦到已经俾人炒咗喺街摆紧地摊。
美金总共有200文，阿飞搵阿荣帮手换成1560文港纸，阿荣香港亲戚多。抓住一大沓五颜六色好似鲜花咁灿眼嘅港纸，从未试过咁有钱嘅阿飞，个心卒之完全定嗮，觉得人生冒险仲系值得嘅，试问人嘅一生点可以唔经过担惊受怕？其实人每天都喺度担惊受怕，经历危险，解决难题：有啲用钱解决，有啲凭能力解决，有啲需要知识解决。有钱喺手拖到月尾，阿清仲系咁缠住问，阿飞俾咗50文人民币佢，心惗如果佢仲人心不足就马上抹面嚟个鱼死网破大家一了百了，宜家有咁多钱喺手佢再都唔怕被人炒，只系一直瞒住茹女觉得有啲对佢唔住。
网友评论