如风往事之——閒话“关于回忆”迭桩事体

作者: 杜老倌侠客居70后欢喜写作 | 来源:发表于2020-03-18 15:30 被阅读0次

前天仔已经写好了《如风往事之——闲话“关于回忆篇”》迭篇文章，个人总是觉着还有得一眼眼意犹未尽哩，就决定再畀迭篇文章改写成为上海閒话版本文章，只因笔者是土生土长呃上海人噢！

每趟仔只要是到了年终岁末呃辰光，各类新闻媒体总归要去讲到“回归”迭两嗰字，勒拉讲到“回归”呃辰光，里向又包含了“回忆”呃咪道唻，讲到嗰人辰光啊一样是迭恁样子呃。譬如讲：勒拉某些大型呃国企、外资企业工作呃员工，每趟仔到了年末呃辰光，眼扳数要去写一些述职报告、要去好好较总结并回忆一年唻自家勒拉工作当中呃得与失，是否还有得需要去有待提升跟改进呃地方，唻年本人会得有啥呃打算，啊里一些方面还要自家努力要去做到呃；嗰人回归并回忆到某嗰幸福呃时光或某嗰幸福阶段；回归并回忆自家过往呃种种，包括好与坏、对与错等等……凡是种种真呃可以讲是不一而足。

今朝仔，各行各业也逐渐开始流行起了一股“怀旧风”，还要去让某些具有代表性呃人物，唻“回忆”过往呃种种，勒拉“回忆”呃全过程当中，还有得并包含“情怀”迭两嗰字在内，但畀过，假使讲“怀旧风”跟“回忆”泛滥成灾了，就覅大好白相了。比方讲：勒拉某些电视台呃某些娱乐节目当中，会得去邀请曾经红极一时呃电视连续剧演员唻怀念过去拍戏呃种种情况、勒拉拍戏全过程当中呃点点滴滴跟演员自家呃感受，而且每间隔一段辰光，还要再去唻一趟，横一趟竖一趟，往往又呒办法一趟仔全部去凑齐，迭趟仔是迭嗰一部分人员，到了下趟仔，又是另外一部分人员，观众啊畀看得呒劲了。

假使有人问笔者，侬如果真呃可以回归到过去，并回忆过往种种呃閒话，欢喜回忆并回归到啥呃辰光呢？！笔者就会得诚恳呃去回答道：“本人最最愿意回归并回忆到上嗰世纪呃九十年代噢，只因为掰搿辰光既是一嗰蒸蒸日上意气风发呃良好时代，与此同时又是一嗰无法回避、绕也绕不开呃一嗰年代，还因为勒拉华夏呃大地上，可以讲是起了翻天覆地、旧貌改新颜呃巨大变化唻，真呃可以讲是一年一变样，三年大变样，老百姓呃日脚也是过得一天比一天好！”……

以啥呃么事为标杆呢？！又好去例举出唻啥呃例子呢？！当时光跨入到了上嗰世纪九十年代初中期呃辰光，国家基本哴向已经取消了“计划经济”时期，逐步跨入到了“市场经济”时期，大力搞改革开放并搞活了国内市场。勒拉老底子、勒拉国家还身处勒拉计划经济时期，老百姓每天过日脚呃辰光，购买各类商品呃辰光、俗常呃衣食住行，基本哴向侪是要凭各类票证唻供应呃。比方讲：有得“糖票”、“香烟票”、“副食品票”、“粮票”、“各类轻工业产品票证”、“自行车票”等等……老百姓从今朝仔开始，再也用覅着发愁如何才恁去搞到各类票证、特别是邪气紧俏呃各类商品票证了，老底子去买卖各类商品跟各类么事，购买呃人既要手里向有钞票，还要凭各种票证才可以去购买得到噢，迭嗰日脚就好像黄鹤一去覅再复返了！

笔者既出生勒拉上嗰世纪七十年代呃末期，又是土身土长呃上海人，被大家称之为“70后”，也同样是经历过一段“票证岁月”噢，勒拉掰搿辰光、勒拉那些有得票证、凭票证过日脚呃岁月里向，购买任何商品侪需要去凭各类票证唻供应噢，每嗰家庭或者每嗰人，光光手里向有得钞票，而呒得各类票证是买不到商品呃。还比方去讲：上段文字当中所提到呃“香烟票”，它就畀分成了上中下三旬，还有呃就是，本人还恁清楚呃去记得，勒拉掰搿辰光大多数人家所使用呃是火柴，火柴是包含勒拉香烟票里向呃，要跟香烟一道去搭卖出售呃；要去买布料做衣服呃閒话，就需要有得“布票”，一些人数比较少呃人家，一年呃布票，覅够去做一套衣裳唻；去购买各类粮食，就需要有得“购粮证”，而且大米还要去跟“洋西米”一道搭卖出售呃……只有自家想不到呃，呒有做不到呃，勒拉计划经济呃年代里向，绝大多数呃商品侪需要凭各类票证唻供应呃，凡是种种也同样可以讲是不一而足举不胜举噢。【备注：“洋西米”就是指“籼米”，而且迭种米一喫就饱，但畀过邪气容易消化，要覅了多久肚皮又变得饿了。】

当时光呃步伐跨进了上嗰世纪九十年代初中期以后，老百姓呃生活水平也变得越唻越好了，勒拉高速发展、发展得邪气好呃大城市里向，只要是日脚还过得去呃家庭，每家每户侪拥有了“三件套”，勒拉掰搿辰光流行词语就叫做“三大件”，即：彩电、电冰箱跟洗衣机。电冰箱要去分双开门呃跟单开门呃、有霜跟无霜呃，双开门呃、外加除霜呃电冰箱，就要比单开门呃、不除霜呃电冰箱价钿唻得要稍微贵那么一眼眼，“无霜”呃电冰箱就覅要再去“除霜”了，顶多也就是一年去除一次霜罢了。洗衣机要去区分分单缸跟双缸呃，双缸呃洗衣机伊嗰价钿也要比单缸呃洗衣机唻得贵那么一眼眼，只因为单缸呃洗衣机只能洗涤，双缸呃洗衣机既可以洗涤，又可以拧干水分哩，自从有了双缸洗衣机，家庭妇女呃双手从此基本得以解放，告别了依靠洗衣板洗衣服呃苦日脚。笔者到了今早仔还恁够清楚呃记得，家里所拥有呃第一台彩电是18寸“飞跃牌”呃、所使用呃第一台单门电冰箱是“益友牌”175立身呃、第一台双缸洗衣机就是“水仙牌”呃。

勒拉上嗰世纪九十年代初中期、勒拉笔者所在呃城市上海，再一次去刮起了一股各类“港台文化”呃热潮，形成了第二股冲击波唻，第一股冲击波则是勒拉上嗰世纪呃八十年代，就拿“港台流行音乐”迭桩事体唻举例去加以说明，勒拉上嗰世纪呃八十年代，港台流行音乐文化是以邓丽君呃歌曲跟台湾呃校园民谣为代表呃，到了九十年代初中期以后，则是以港台地区最最新、最最流行呃音乐为代表，老牌港台地区男性呃音乐人有得李宗盛、罗大佑、刘文正、谭咏麟、罗文、张国荣等人……新生代呃男性音乐人就有得“四大天王”，“四大天王”就是指：刘德华、张学友、黎明跟郭富城；女性音乐人有得陈淑桦、潘美辰、梅艳芳、赵咏哗、林忆莲、方季惟等人……组合派呃音乐人有得：小虎队、达明一派、优客李林、草蜢、beyound等人……是伊拉最先攻入到了内地（大陆）市场，紧接着一波就是港台地区拍摄呃电视连续剧跟电影，继续比方去讲：电视连续剧有得《星星知我心》、《昨夜星辰》、《戏说乾隆》、《陀枪师姐》……电影有得《妈妈再爱我一次》、《英雄本色》三部曲、《喋血双雄》，以及成龙呃功夫电影系列……一些港台地区呃多栖演员就畀大家所熟悉追捧跟热爱，比方讲：周润发、赵雅芝、寇世勋、刘德凯、刘雪华、米雪等人……凡是种种举不胜举，假使还要去例举呃閒话，还有很多、还恁去寻找出很多！

到了今朝仔，笔者还恁够清清楚楚呃去记得迭恁一出场景唻，当笔者勒拉读小学六年级呃辰光，尽管勒拉掰搿辰光考初中呃任务是交关繁重繁忙呃，班级里向呃全体同学大家侪勒拉学海无涯苦作舟，但畀过，勒拉空闲呃辰光，就会得跟班级里最最要好呃三位男生好友（同学）朱天翔、葛群跟程大地，一道去高谈阔论呃讨论着那些港台流行音乐文化以及音乐人，广播电台最新出炉呃十大男女歌手呃排名又是哪恁样子呃、最最好听呃歌曲又是啊里一首啊、啊里一嗰男性歌手，伊嗰卖相是长得最最帅气呃……勒拉掰搿辰光，朱天翔（同学）跟笔者是最最要好呃好友，伊最最痴迷于台湾地区呃流行音乐组合“小虎队”，还省吃俭用呃去购买了三四盘小虎队盒带，笔者跟另外两位好朋友（同学）就呒得啥呃最最欢喜呃港台男女歌手（音乐人）了，只要嗰人认为是交关好听呃歌曲，就会得相互之间推荐畀对方听，收听得最最多呃音乐类节目，就是广播电台103.7呃《东方风云榜》。

虽然讲是迭恁样子噢，但畀过，勒拉全班60嗰同学当中，也有得对外面世界呃变化一脸茫然一无所知呃同学，伊本人也是“一心只读圣贤之书”、“两耳不闻窗外事”唻，勒拉掰搿辰光，班长高翼（男生）就是迭恁样子呃人，伊从小学一年级一直到初中毕业，侪是班长、三好学生。最最主要呃原因是伊拉呃爷娘对伊呃管教是最严最紧呃，尤其是伊呃老娘管得更加严紧了，只希望伊学习、学习再学习，好好学习天天向上，除忒学习迭桩事体，其他啥呃事体侪覅好去做……还只允许伊勒拉每嗰礼拜天呃夜到头，去收听顶多一嗰钟头左右呃收（录）音机，伊本人收听呃内容也就仅限于盒带“黑猫警长”了，据伊本人讲，迭嗰是伊本人最最喜欢聆听呃，当吾伲四嗰人听到迭嗰消息以后，侪勒拉背后头讥笑不已，并异口同声呃讲班长迭嗰人太落伍了！